އަވައްޓެރި ގައުމުތަކަށް ހަމަލާދިނުން ހުއްޓައިލިކަން އީރާނުން އިއުލާނުކޮށްފި

އަވައްޓެރި ގައުމުތައް މެދުވެރިކޮށް އީރާނަށް ހަމަލާތައް އަމާޒުނުކުރާހާ ހިނދަކު، އެ ގައުމުތަކަށް ދެން އިތުރު ހަމަލާއެއް ނުދޭނެކަމަށް އީރާނުން އިއުލާނުކޮށްފި އެވެ.

އެމެރިކާ އާއި އިޒްރޭލު ގުޅިގެން، ފެބްރުއަރީ 28 އިން ފެށިގެން އީރާނަށް ދެމުންދާ ހަމަލާތަކުގައި އެ ގައުމުގެ ރޫހާނީ ލީޑަރު އާޔަތުﷲ އަލް ޚާމަނާއީ އަވަހާރަކޮށްލުމުން، ގައުމުގެ ހިންގަން އެކުލަވައިލި ގައުމީ މަޖިލީހުން ވަނީ އަވައްޓެރި ގައުމުތަކަށް ހަމަލާދިނުން ހުއްޓައިލަން ނިންމައިފަ އެވެ.

އެކަން އިއުލަނުކުރައްވަމުން އީރާނުގެ ރައީސް މަސްއޫދު ޕިޒިޝްކިޔާން ދާދި ދެންމެ އަކު ވިދާޅުވީ، އަވައްޓެރި ގައުމުތައް މެދުވެރިކޮށް އީރާނަށް ހަމަލާތައް އަމާޒުނުކުރާނަމަ، އީރާނުން ވެސް އެ ގައުމުތަކަށް ދެން ހަމަލާ ނުދޭނެ ކަމަށެވެ.

އަދި ފާއިތުވި ދުވަސްތަކުގައި އެ ގައުމުތަކަށް އީރާނުން ދިން ހަމަލާތަކަށް ޕިޒިޝްކިޔާން ވަނީ މާފަށް ވެސް އެދިވަޑައިގެންފަ އެވެ.

އެމެރިކާ އާއި އިޒްރޭލުން ގުޅިގެން ދޭން ފެށި ހަމަލާތަކުގެ ރައްދުގައި އިޒްރޭލުގެ އިތުރުން، މެދުއިރުމަތީގެ އެކި ގައުމުތަކުގައި އެމެރިކާ ސިފައިން ތިބޭ މަރުކަޒުތަކަށް އަމާޒުކޮށް އީރާނުން ވަނީ ވަރުގަދަ ހަމަލާތައް ދީފަ އެވެ.

އޭގެ ތެރޭގައި ގަތަރާއި، ޔޫއޭއީ، ސައުދީ އަރަބިއްޔާ، އުރުދުން ވެސް ހިމެނެ އެވެ.

އެކަމުގެ ސަބަބުން މެދުއިރުމަތީގެ ވައިގެ ސަރަހައްދު ބަންދުކޮށް، މުޅި ދުނިޔޭގެ ވައިގެ ދަތުރުފަތުރަށް ވެސް ވަނީ ބުރޫ އަރައިފަ އެވެ.

އަދި ކަނޑު މަގުން މުދާ އުފުލުމަށް އެޅިފައިވާ ހުރަސްތަކާއެކު، ތެލާއި ގޭހުގެ އަގު ވެސް ވަނީ އިންތިހާއަށް އުފުލިފަ އެވެ.