ދުނިޔޭގެ އެންމެ ބޮޑު ޓޫރިޒަމް ފެއާ ހޯސްޓުކުރަން ރާއްޖެއަށް

ފަތުރުވެރިކަން އިސްތިހާރު ކުރާ ދުނިޔޭގެ އެންމެ ބޮޑު ފެއާ، "އައިޓީބީ ބާލިން 2027" ހޯސްޓް ކުރާ ގައުމެއް ގޮތުގައި ރާއްޖެ ހަމަޖެހިއްޖެ އެވެ.

މިއީ ރާއްޖެ އަށް ހޯސްޓިން ކަންޓްރީގެ މަގާމް ލިބުނު ދެވަނަ ފަހަރެވެ. މީގެ ކުރިން އެ ފުރުސަތު ލިބުނީ 2016 ވަނަ އަހަރުގަ އެވެ.

މިހާރު ކުރިޔަށް "އައިޓީބީ ބާލިން 2026" ގައި ރާއްޖޭގެ އެގްޒިބިޝަން ސްޓޭންޑުގައި ބޭއްވި ހާއްސަ ރަސްމިއްޔާތެއްގައި އެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ ވިސިޓް މޯލްޑިވްސް ކޯޕަރޭޝަން (ވީއެމްސީ) ގެ ސީއީއޯ އަދި އެމްޑީ އިބްރާޙިމް ޝިއުރީ އެވެ. އަދި މެސޭ ބާލިންގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ ޑރ. މާރިއޯ ޓޯބިއަސް އެވެ.

އެ ރަސްމިއްޔާތުގައި ޑރ. ޓޯބިއަސް ވިދާޅުވި ގޮތުގައި ރާއްޖޭގެ ހިތްގައިމު ރީތި ކަމާއި ކުރިއަރަމުން އަންނަ ފަތުރުވެރިކަން ބައިނަލްއަގުވާމީ މައިދާނުގައި އިޝްތިހާރު ކުރުމަށް އައިޓީބީ ބާލިންއަކީ އެންމެ އެކަށީގެންވާ ފްލެޓްފޯމެވެ. 

އަދި އެ ފެއާއަކީ މުޅި ދުނިޔޭގެ ފަތުރުވެިރކަމުގެ ދާއިރާގެ ހިއްސާދާރުންނާއި މާހިރުން އަދި ގިނަ ވިޔަފާރިތަކަކުން އެއް ތަނަކުން ބައްދަލުވާ ތަނަކަށްވުމުން އެއީ ރާއްޖެ އަށް ލިބޭ ވަރަށް މުހިންމު ފުރުސަތަކަށް ވާނެ ކަމަށް އޭނާ ވިދާޅުވި އެވެ.

ޝިއުރީ ވެސް ވިދާޅުވި ގޮތުގައި ހޯސްޓިން ކަންޓްރީގެ ގޮތުގައި ރާއްޖެ ހަމަޖެހުމަކީ ރާއްޖޭގެ ރަށްތަކުން ލިބޭ ތަފާތު ތަޖުރިބާތައް ދުނިޔެ އަށް ހާމަ ކޮށްދިނުމަށް ލިބޭ ރަނުގެ ފުރުސަތެކެވެ. 

ރައީސް ޑރ. މުހައްމަދު މުއިއްޒު މި ފަހުން ޖަރުމަނަށް ކުރެއްވި ދަތުރުފުޅަކީ ވެސް ދެ ގައުމުގެ ގުޅުން ބަދަހިވެ ފަތުރުވެރިކަމުގެ ދާއިރާގައި ރާއްޖޭގެ މުހިންމުކަން ހާމަވެގެން ދިޔަ ދަތުރުފުޅެއް ކަމަށް ވެސް އޭނާ ފާހަގަ ކުރެއްވި އެވެ.

މި އެއްބަސްވުމާ ގުޅޭ ގޮތުން ވީއެމްސީން ބުނި ގޮތުގައި ހޯސްޓިން ކަންޓްރީގެ ހައިސިއްޔަތުން ރާއްޖޭގެ ފަތުރުވެރިކަމުގެ ހުރިހާ ދާއިރާއެއް އިސްތިހާރު ކުރާނެ އެވެ. 

އޭގެ ތެރޭގައި ލަގްޒަރީ ރިސޯޓުތަކާއި ބުޓީކް ހޮޓާތަކާއި ޑައިވިން މޫދު ކުޅިވަރާއި ވެލްނަސް އަދި ސަގާފީ ފަތުރުވެރިކަން ހިމެނޭ ކަމަށާއި ތިމާވެށި ހިމާޔަތް ކުރުމާއި ދެމެހެއްޓެނިވި ފަތުރުވެރިކަމަށް ރާއްޖެއިން ކުރާ މަސައްކަތް ވެސް ފެއާގެ ތެރެއިން ދައްކާލެވޭނެ ކަމަށް ވީއެމްސީން ބުންޏެވެ.