ހުރުމޫޒު ކަނޑުއޮޅި ގަދަކަމުން ހުޅުވަން އުޅޭތީ އީރާނުގެ އިންޒާރެއް

މެދުއިރުމަތީގެ ހަނގުރާމަ ހޫނުވެފައިވާ ދަނޑިވަޅެއްގައި، ހުރުމުޒު ކަނޑުއޮޅިން ދަތުރުކުރާ އާގުބޯޓުތަކަށް ރައްކާތެރިކަން ދިނުމަށް އެމެރިކާގެ ކަނޑުގެ ސިފައިން ހަރަކާތްތެރިވާން ފަށާނެ ކަމަށް އެމެރިކާގެ އެނާޖީ ސެކްރެޓަރީ އިއުލާންކުރެއްވުމާ ގުޅިގެން، އީރާނުގެ އިންގިލާބީ ފައުޖުން އެކަމަށް ރައްދު ދީފި އެވެ.

ރިވޮލިއުޝަނަރީ ގާޑްސްގެ ތަރުޖަމާނު އަލީ މުޙައްމަދު ނައިނީ ވިދާޅުވީ، އެމެރިކާގެ ބޯޓުތައް ހުރުމުޒު ކަނޑުއޮޅިއަށް ވަންނާނެ ވަގުތަކަށް އީރާނުން އިންތިޒާރު ކުރަމުންދާ ކަމަށެވެ. އަދި އެމެރިކާ އިން މިފަދަ ނިންމުމެއް ނިންމުމުގެ ކުރިން، 1987 ވަނަ އަހަރު އެމެރިކާގެ ސުޕަޓޭންކަރު "ބްރިޖްޓަން" އަށް ލިބުނު ގެއްލުންތަކާއި، ފަހުން އީރާނުން އަމާޒުކުރި އެހެން ތެޔޮ ޓޭންކަރުތަކުގެ ހާދިސާތައް ހަނދާންކުރުމަށް އޭނާ ގޮވާލެއްވި އެވެ.

"އެމެރިކާގެ ބޯޓުތައް މި ސަރަހައްދަށް އަންނާނެ ވަގުތަކަށް އަހަރެމެން މިތިބީ އިންތިޒާރުގަ،" ފާރސް ނިއުސް އެޖެންސީއާ ވާހަކަދައްކަވަމުން ނައިނީ ވިދާޅުވި އެވެ.

ބްރިޖްޓަންގެ ހާދިސާ - މީގެ ކުރިން 1987 ވަނަ އަހަރު، އެމެރިކާގެ ކަނޑުގެ ސިފައިންގެ ބެލުމުގެ ދަށުން ފާރަވެރިކަމާއެކު ދަތުރުކުރަމުން ދިޔަ 'ބްރިޖްޓަން' ނަމަކަށް ކިޔާ އެމެރިކާގެ ސުޕަޓޭންކަރެއްގައި އީރާނުގެ ރިވޮލިއުޝަނަރީ ގާޑްސްއިން ވަނީ މައިންއެއް ގޮއްވާލާފަ އެވެ. މިއީ އެ ސަރަހައްދުގެ ސަލާމަތާ ގުޅޭގޮތުން އީރާނާއި އެމެރިކާއާ ދެމެދު އުފެދުނު ބޮޑު ކުރިމަތިލުމެއްގެ ގޮތުގައި ތާރީހުގައި ފާހަގަކުރެވިފައިވާ ހާދިސާ އެކެވެ.