މެދުއިރުމަތީގެ ނުތަނަވަސްކަމާއެކު ތެޔޮ ފީފާއެއްގެ އަގު 90 ޑޮލަރަށްވުރެ މައްޗަށް

މެދުއިރުމަތީގައި ހިނގަމުންދާ ހަނގުރާމައިގެ ނުތަނަވަސްކަން އިތުރުވެ، ދުނިޔޭގެ ބާޒާރުގައި ސާފުނުކުރާ ތެލުގެ އަގު ބޮޑުތަނުން އުފުލި ސާފު ނުކުރާ ތެޔޮ ފީފާއެއްގެ އަގު 90 ޑޮލަރަށްވުރެ މައްޗަށް އަރައިފި އެވެ. މިއީ ފާއިތުވި ދެ އަހަރެއްހާ ދުވަހުގެ ތެރޭގައި ތެލުގެ އަގު މިހާ މައްޗަށް ދިޔަ ފުރަތަމަ ފަހަރެވެ.

މިއަދުގެ ނިޔަލަށް ތެލުގެ އަގުތަކަށް ބަލާއިރު، މި ހަފުތާ ނިމުނުއިރު ބައިނަލްއަގުވާމީ ބެންޗްމާކް ކަމަށްވާ ބްރެންޓް ކުރޫޑް ފީފާއެއްގެ އަގު ވަނީ 92.69 ޑޮލަރަށް އަރާފަ އެވެ. މިއީ އެއް ދުވަސް ތެރޭގައި 8.5 އިންސައްތައިގެ ކުރިއެރުމެކެވެ. ހަމައެއާއެކު، އެމެރިކާގެ ޑަބްލިއު.ޓީ.އައި ތެލުގެ އަގުވެސް ވަނީ 90 ޑޮލަރަށްވުރެ މައްޗަށް ގޮސްފަ އެވެ.

ތެލުގެ އަގުތައް އުފުލެއް ދިމާވި ސަބަބީ އެމެރިކާ އިސްރާއިލުން އިސްވެ އީރާނަށް ހަމަލާ ދިނުާއެކު އީރާނުން ސްޓްރެއިޓް އޮފް ހޯރްމޫޒް ބަންދު ކުރުމާއެކު ދުނިޔޭގައި އެންމެ ގިނައިން ތެޔޮ އުފުލާ މަގު ކަމަށްވާ ހޯރްމޫޒް ކަނޑުއޮޅިން ދަތުރުފަތުރު ކުރުން ހުއްޓުމަކަށް އައުމެވެ. މީގެ އިތުރުން ސަޕްލައިއަށް ބިރުވެރިކަން އޮތުމެވެ. އީރާނާއި އިސްރާއީލާ ދެމެދު ހިނގަމުންދާ ހަމަނުޖެހުންތަކާ ގުޅިގެން ތެޔޮ އުފައްދާ މައި ސަރަހައްދުތަކުން ތެޔޮ އެކްސްޕޯޓް ކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. މީގެ އިތުރުން ދުނިޔޭގެ އިގްތިސާދީ ނުތަނަވަސްކަން އޮތުމެވެ. މިއާއެކު ތެލުގެ އަގު އުފުލުމުގެ ސަބަބުން ދުނިޔޭގެ އިންފްލޭޝަން ނުވަތަ ތަކެތީގެ އަގުތައް މައްޗަށް ގޮސްފާނެ ކަމުގެ ބިރު ވަނީ ބޮޑުވެފަ އެވެ.

ގަތަރުގެ ހަކަތައާ ބެހޭ ވަޒީރު ސައުދު އަލް-ކާބީ ފައިނޭންޝަލް ޓައިމްސް އަށް ދެއްވި އިންޓަވިއުއެއްގައި ވިދާޅުވީ، މެދުއިރުމަތީގެ ހަނގުރާމައިގެ ސަބަބުން ގަލްފުގެ ގައުމުތަކުން ތެޔޮ އުފެއްދުން މެދުކަނޑާލަން ޖެހިދާނެ ކަމަށެވެ. މިކަމުގެ ސަބަބުން ތެލުގެ އަގު ބަރަހަނާއަކަށް 150 ޑޮލަރަށް އުފުލިގެންދާނެ ކަމަށް އޭނާ ލަފާކުރެއްވިއެވެ.

އަލް-ކާބީ އިތުރަށް ވިދާޅުވީ އީރާނުން ދިން ޑްރޯން ހަމަލާތަކަށްފަހު ތެޔޮ ސަޕްލައި ކުރީގެ ހާލަތަށް ގެނައުމަށް "ހަފުތާތަކެއް ނުވަތަ މަސްތަކެއް" ނަގާފާނެ ކަމަށެވެ. މިއީ ދުނިޔޭގެ އިގްތިސާދު އެކަމުގެ ސަބަބުން "ބިމާ ހަމަވެދާނެ" ފަދަ ނުރައްކާތެރި ހާލަތެއް ކަމަށް އޭނާ ސިފަކުރެއްވިއެވެ.

މި ނުތަނަވަސްކަމާއެކު މާކެޓަށް ބޮޑު ސިހުމެއް ލިބުނު އަނެއް ކަމަކީ އިރާގުގެ ކުރުދިސްތާން ސަރަހައްދުގައި އެމެރިކާގެ "އެޗް.ކޭ.އެން އެނާޖީ"  އިން ހިންގަމުންދިޔަ ސަރްސަންގް ތެޔޮ ވަޅަށް ދިން ޑްރޯން ހަމަލާ އެވެ. މި ހަމަލާއާ ގުޅިގެން އެތަނުން ތެޔޮ އުފެއްދުން މިހާރު ވަނީ މެދުކަނޑާލާފައެވެ.