ބަންޑާރަ މިސްކިތަކީ އާސާރީ މިސްކިތްތަކުގެ ލިސްޓުގައި ހިމެނޭ ތަނެއް ނޫން: ޝަހީމް
"ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފަ އޮންނަ މިސްކިތެއް ނޫންވީމާ އެތަނުގައި ބޮޑު މިސްކިތެއް ބިނާކުރަން ގަސްތުކުރީ. މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފައި،"
މާލޭގައި ހުންނަ ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ތަޅާލައި، އެތަނުގައި ބޮޑު މިސްކިތެއް އަޅަން ނިންމާފައިވާކަން އިއުލާނުކުރުމުން، އެއީ އާސާރީ ތަނެއް ކަމަށް ގިނަ ބަޔަކު ބުނަމުންދާތީ، އިސްލާމިކް މިނިސްޓަރު ޑރ. ޝަހީމް އަލީ ސައީދު އެކަން ދޮގު ކުރައްވައިފި އެވެ.
ޝަހީމް އިއްޔެ ވިދާޅުވެފައި ވަނީ މާލޭގެ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަ މަހުގެ ފަހުން ފަށާނެ ކަމަށެވެ. އެކަމަށް ބޭނުންވާ އެހީވެސް ލިބިފައިވާ ކަމަށާއި، އެ މިސްކިތް އެޅުމާއެކު މާލޭގައި ހުރި ހުރިހާ މިސްކިތެއް އާވެގެން ދާނެ ކަމަށްވެސް ޝަހީމް ވިދާޅުވެފައިވެ އެވެ.
ނަމަވެސް ތާރީހަށް ލޯބިކުރާ ބޭފުޅުންނާއި އާންމުންވެސް ވަނީ އެކަމާ ދެކޮޅު ހަދައިފަ އެވެ.
ތާރީހު ދިރާސާ ކުރައްވާ ބޭފުޅެއް ކަމަށްވާ ނާޖިހު ދީދީ ވިދާޅުވީ ބަންޑާރަ މިސްކިތް ތަޅާލައިފިނަމަ އެއީ ރާއްޖޭގެ ތާރީހަށް ދެވޭނެ އިއާދަނުކުރެވޭނެ ގެއްލުމެއް ކަމަށެވެ. އަދި އެއީ ރާއްޖޭގެ ސަގާފީ ތަރިކަ ރައްކާތެރިކުރުމަށް ހަދާފައިވާ ގާނޫނާ ވެސް ހިލާފު ކަމެއްކަން އޭނާ ފާހަގަކުރެއްވި އެވެ.
ކުރީގެ ހެރިޓޭޖް މިނިސްޓަރު ޔުމްނާ މައުމޫން ވެސް ވިދާޅުވީ 98 އަހަރުވެފައިވާ އެ މިސްކިތަކީ ރާއްޖެއަށް މުހިންމު ދީނީ، ތާރީހީ އަދި ސަގާފީ ބިނާއެއް ކަމަށެވެ.
"ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފަ އޮންނަ މިސްކިތެއް ނޫންވީމާ އެތަނުގައި ބޮޑު މިސްކިތެއް ބިނާކުރަން ގަސްތުކުރީ. މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން،" އެކި މީހުންގެ ޝަކުވާތަކަށް ރައްދު ދެއްވަމުން ޝަހީމް ވިދާޅުވެފައިވެ އެވެ.
ޝަހީމް ވަނީ އެކަން ސިޔާސީ ނުކުރުމަށާއި، އެކަމާ ގުޅިގެން ރައްޔިތުންނާއި ކަމާބެހޭ ފަރާތްތަކާ މަޝްވަރާ ކުރައްވާނެ ކަމަށް ވިދާޅުވެފަ އެވެ.
ކޮމެންޓް
Republic of Maldives