ޖުމްލަ ރިޒާވް އެއް ބިލިއަނަށް | ޔޫޒަބަލް ރިޒާވަށް % 5.2 ގެ އިތުރުވުމެއް

ރާއްޖޭގެ ރަސްމީ ރިޒާވް ނުވަތަ ގްރޮސް އިންޓަނޭޝަނަލް ރިޒާވް މިދިޔަ ޖެނުއަރީ މަހުގެ ނިޔަލަށް އެއް ބިލިއަން އެމެރިކާ ޑޮލަރަށް އަރައި، ޔޫޒަބަލް ރިޒާވަށް 5.2 ޕަސެންޓުގެ އިތުރުވުމެއް ލިބިއްޖެ އެވެ. 

މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ އިކޮނޮމިކް އަޕްޑޭޓް (އީޔޫ) ތަފާސްހިސާބުތައް ދައްކާ ގޮތުން، މިދިޔަ އަހަރުގެ ޑިސެމްބަރު މަސް ނިމުނުއިރު 983.0 މިލިއަން ޑޮލަރުގައި ހުރި ރަސްމީ ރިޒާވް ވަނީ މިދިޔަ ޖެނުއަރީގެ ނިޔަލަށް ހަތަރު ޕަސެންޓުގެ ކުރިއެރުމެއް ލިބިފަ އެވެ. މީގެ އިތުރުން، މިދިޔަ އަހަރުގެ ޖެނުއަރީ މަހާ ހަމައަށް ބަލާއިރު އޭރު ރިޒާވްގައި ހުރީ 708.1 މިލިއަން ޑޮލަރެވެ. އެހެންކަމުން އެއް އަހަރު ދުވަހުގެ ތެރޭގައި ރާއްޖޭގެ ރިޒާވަށް ވަނީ 318.1 މިލިއަން ޑޮލަރު އިތުރުވެފަ އެވެ. މިއީ އަހަރުން އަހަރަށް ބަލާއިރު 45 ޕަސެންޓުގެ ބޮޑު ކުރިއެރުމެކެވެ.

ޖުމްލަ ރިޒާވް އިތުރު ވެގެން ދިއުމާއެކު، ޔޫޒަބަލް ރިޒާވް ނުވަތަ އިމްޕޯޓަށް ބޭނުންވާ ފައިސާ ނަގަން އަތް ލެވޭ ރިޒާވް މިދިޔަ މަސް ނިމުނުއިރު 232.1 މިލިއަން އެމެރިކާ ޑޮލަރަށް އިތުރުވެފަ އެވެ. މިއީ ޑިސެމްބަރު 2025 ނިމުނުއިރު ޔޫޒަބަލް ރިޒާވްގައި ހުރި 220.5 މިލިއަން އެމެރިކާ ޑޮލަރާ އަޅާބަލާއިރު 5.2 ޕަސެންޓުގެ އިތުރުވުމެކެވެ. އަދި މިއީ އަހަރުން އަހަރަށް ބަލާއިރު މިދިޔަ އަހަރުގެ ޖެނުއަރީ މަހު ޔޫޒަބަލް ރިޒާވްގައި ހުރި 110 މިލިއަން ޑޮލަރާ އަޅާބަލާއިރު ޔޫޒަބަލް ރިޒާވަށް ލިބުނު ބޮޑު ކުރިއެރުމެކެވެ. 

ޔޫޒަބަލް ރިޒާވްއަކީ ބޭރުގެ ފަރާތްތަކަށް ދައްކަންޖެހޭ ކުރު މުއްދަތުގެ ދަރަނިތަކާއި އެހެނިހެން މަޖުބޫރު އިލްތިޒާމްތައް ޖުމްލަ ރިޒާވުން އުނިކުރުމަށްފަހު ކާބޯތަކެއްޗާއި ތެޔޮ ގަތުމަށް ވަގުތުން ބޭނުންކުރެވެން ހުންނަ ފައިސާ އެވެ. މިގޮތުން ޖުމްލަ ރިޒާވްގައި 1,026.2 ބިލިއަން ޑޮލަރު ހުރިއިރު، ކުރު މުއްދަތުގެ ދަރަންޏާއި އެހެނިހެން އިމްތިޒާމްތަކަށްވާ ފައިސާގެ ގޮތުގައި 794.1 މިލިއަން ޑޮލަރު އުނި ކުރުމުން ޔޫޒަބަލް ރިޒާވްގެ ގޮތުގައި ހުރި ކަމަށް ދައްކަނީ 232.1 މިލިއަން ޑޮލަރެވެ. މިއީ ގާތްގަނޑަކަށް ދޮޅު މަހުގެ އިމްޕޯޓަށްވާ ފައިސާ އެވެ.