ޕޮލިސް ކޮމިޝަނަރު ކަމަށް ކުރިމަތިލާން ހުޅުވާލައިފި

ކޮމިޝަނާ އޮފް ޕޮލިސްގެ މަގާމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.

ޕޮލިސް ކޮމިޝަނަރުގެ މަގާމު ހުސްވީ އެ މަގާމުގައި ހުންނެވި އިސްމާއިލް ނަވީން މިދިޔަ މަހުގެ 19 ވަނަ ދުވަހު ޝަރަފުވެރިކަމާއެކު ރިޓަޔާ ކުރެއްވުމުންނެވެ. 

ހޯމްލޭންޑް މިނިސްޓްރީން ކުރި އިއުލާނުގައި ބުނީ އެ މަގާމަށް ކުރިމަތިލެވޭނީ އެސިސްޓަންޓު ކޮމިޝަނަރު އޮފް ޕޮލިސްގެ މަގާމަށްވުރެ މަތީ ރޭންކުގައި ތިބި ފުލުހުންނަށް ކަމަށެވެ. މިމަހުގެ 23 ވަނަ ދުވަހުގެ 14:00 ގެ ކުރިން މަގާމަށް ކުރިމަތިލުމުގެ ފުރުސަތު ވަނީ ހުޅުވާލައިފަ އެވެ.

ނަވީން ރިޓަޔާ ކުރެއްވުމުން ފުލުހުންގެ ހިންގުން ވަގުތީ ގޮތުން ހަވާލުކޮށްފައި ވަނީ ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއާ އެވެ.

ދެން އައްޔަނުކުރާ ޕޮލިސް ކޮމިޝަނަރު ވެގެންދާނީ މި ސަރުކާރުން އައްޔަނު ކުރާނެ ތިންވަނަ ކޮމިޝަނަރަށެވެ. ނަވީންގެ ކުރިން އެ މަގާމުގައި ހުންނެވީ އަލީ ސުޖާއު އެވެ. އޭނާ ވެސް ވަނީ ރިޓަޔާ ކުރައްވާފަ އެވެ.