ހާއްސަ ކެޓަގަރީތަކުގެ ފްލެޓު | ވަޒީފާގެ މުއްދަތު އެއް އަހަރުން ފަސް އަހަރަށް އިތުރުކޮށްފި

މި ސަރުކާރުގެ "އާއިލީ ބޯހިޔާވަހިކަން" ސްކީމުގައި ހިމެނޭ ހާއްސަ ކެޓަގަރީތަކުގެ ފްލެޓްތަކަށް ކުރިމަތިލެވޭ ޝަރުތުތައް އަނެއްކާވެސް ބަދަލުކޮށް، މަދުވެގެން ވަޒީފާ އަދާކުރި މުއްދަތު ފަސް އަހަރު ދުވަހަށް އިތުރުކޮށްފި އެވެ.

ހާއްސަ ކެޓަގަރީތަކުން އިސްލާހުކުރި އުސޫލުގެ ދަށުން ފަސް ދާއިރާގެ މުވައްޒަފުންނަށް ޖުމްލަ 1،000 ފްލެޓު ވަނީ ކަނޑައަޅައިފަ އެވެ.

މިދިޔަ ހޯމަ ދުވަހު އެ އުސޫލު ގެޒެޓުކުރިއިރު، މި ފްލެޓުތަކަށް ޝަރުތު ހަމަވާ ކަމަށް ކަނޑައަޅާފައި އޮތީ، މި ފަސް އިދާރާގައި މެދުނުކެނޑި ފުލްޓައިމްކޮށް މަސައްކަތްކުރާތާ އެއް އަހަރުވެފައިވާ މުވައްޒަފުންނަށެވެ.

ނަމަވެސް، އެ އުސޫލު އަނެއްކާވެސް އިސްލާހުކޮށް، މިއަދު ހައުސިން މިނިސްޓްރީން ޝާއިއުކުރި އުސޫލުގައި ވަޒީފާ އަދާކޮށްފައިވާ މުއްދަތު ވަނީ ފަސް އަހަރަށް އިތުރުކޮށްފަ އެވެ.

މި ބަދަލު ގެންނަން ނިންމީ، ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެފައިވާ ގޮތުގައި، އެއް އަހަރުގެ މުއްދަތެއް ކަނޑައެޅީ، ސިޔާސީ މުވައްޒަފުންނަށް ވެސް އެ ފްލެޓުތަކަށް ކުރިމަތިލެވޭ ގޮތަށް ހަދަން ކަމަށް ތުހުމަތުކުރާތީ އެވެ.

"ހަގީގަތުގައި އެ އުސޫލު މިހާރު އޮތްގޮތުން ވެސް ސިޔާސީ މުވައްޒަފުންނަށް ކުރިމަތިލެވޭ ގޮތަކަށް ނޫން އެ އޮތީ. ސަރުކާރުގެ އެއްވެސް ވިސްނުމެއް ނެތް ސިޔާސީ ގޮތުން ވަކި ބަޔަކަށް، އާންމުކޮށް އެ އޮންނަ ކެޓަގަރީގެ ބޭރުން ހާއްސަ ކެޓަގަރީއެއް ހަދައިގެން ކުރިމަތިލެވޭ ގޮތަށް ބޭއްވުމަކީ،" އިއްޔެ ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވި އެވެ.

އޭނާ ވިދާޅުވީ، ހާއްސަ ކެޓަގަރީގައި ހިމެނޭ އިދާރާތަކުގައި މަސައްކަތްކޮށްފައިވާ މުއްދަތު ފަސް އަހަރުން އެއް އަހަރަށް އޭރު ބަދަލު ގެނައީ އެ އިދާރާތަކުގައި އުޅޭ ގާބިލު މުވައްޒަފުން އެ ތަންތަނުގައި ދިގު މުއްދަތަކަށް ބޭތިއްބުމުގެ މަގްސަދުގައި ކަމަށެވެ.