ފަރުހާދަށް ކުރާ ތުހުމަތުތައް ސާބިތެއް ނުވޭ: މިނިސްޓަރު

މަގާމުގެ ނާޖައިޒު ބޭނުން ކޮށްގެން ދަރިފުޅުގެ މައްޗަށް ތުހުމަތު ކުރި މައްސަލަތަކެއްގެ ހެކި ނައްތާލަން އުޅުނު ކަމަށް ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީގެ މައްޗަށް ކުރި ތުހުމަތުތައް ސާބިތުނުވާ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ފަރުހާދުގެ މައްޗަށް ކުރަނީ ފެބްރުއަރީ 27، 2025 ގައި އޭނާގެ ފިރިހެން ދަރިފުޅު މަސްތުގެ ހާލަތުގައި ހުރެ ފުލުހަކަށް ހަމަލާ ދިން މައްސަލައިގައި ހައްޔަރު ކުރުމުން، ފަރުހާދުގެ ނުފޫޒުން އޭނާ ސަލާމަތް ކުރުމުގެ ތުހުމަތެވެ. އަދި ދަރިފުޅު ދުއްވި ސައިކަލު ޓޯކުރުމުން އެ ސައިކަލު ނެރެދިން ތުހުމަތެވެ.

އޭގެ އިތުރުން ފިރިހެން ދަރިފުޅަށް ކުރާ ރޭޕް އާއި ޖިންސީ ގޯނާގެ މައްސަލައެއްގެ ހެކި ނައްތައިލި ކަމުގެ ތުހުމަތު ވެސް ކޮށްފައިވެ އެވެ.

އެ ތުހުމަތުތައް އެހެން އޮއްވައި ފުލުހުންގެ އިދާރީ ހިންގުން ވަގުތީ ގޮތުން ހަވާލުކޮށްފައިވަނީ ފަރުހާދާ އެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ނޫސްވެރިއަކު ސުވާލުކުރުމުން މިނިސްޓަރު އިހުސާން ވިދާޅުވީ، ރާއްޖޭގެ ގާނޫނުގައި މީހެއްގެ މައްޗަށް ތުހުމަތެއް ކުރުމުން އަމަލު ކުރަން ޖެހޭ ގޮތަށް ފަރުހާދާމެދު ވެސް އަމަލުކޮށްފައިވާ ކަމަށެވެ. ނަމަވެސް މިހާތަނަށް އެ ތުހުމަތުތައް ސާބިތުވެ، ފިޔަވަޅެއް އަޅާފައި ނުވާ ކަމަށެވެ.

"އެއިން އެއްވެސް މުއައްސަސާއަކުން ފަރުހާދާ ދޭތެރޭ އަޅަންޖެހޭ ފިޔަވަޅެއް ކަމަށް އަދި ތަނުން ވަކިކުރުމަށް ނުވަތަ ޕްރޮމޯޝަން ހިފެހެއްޓުމަށް ކަނޑައަޅުއްވާފައެއް ނެތް. އެ މައްސަލަތައް ތަހުގީގުކޮށް ބެލި އެ މައްސަލަތަކަކީ ފަރުހާދުގެ މައްޗަށް ސާބިތުނުވާ މައްސަލަތަކެއް ކަމަށް ވަނީ ކަނޑައަޅާފައި،" އިހުސާން ވިދާޅުވި އެވެ.

އިތުރަށް ވިދާޅުވެފައިވަނީ ކޮންމެ މީހަކަށްވެސް ފިޔަވަޅެއް އަޅަންޖެހޭ ނަމަ މައްސަލަ ބަލައި ފިޔަވަޅު އަޅާނެ ކަމަށެވެ. އެހެންނަމަވެސް ފިޔަވަޅު އަޅަން ނުޖެހޭ ހާލަތެއްގައި ބޭއިންސާފުން ފިޔަވަޅު ނޭޅޭނެ ކަމަށްވެސް ވިދާޅުވި އެވެ.

އިހުސާން ވިދާޅުވީ އެކްޓިން ސީޕީ ކަމަށް މިނިސްޓްރީން ފަރުހާދު އައްޔަނު ކޮށްފައި ނުވާ ކަމަށާއި، އެއީ ގާނޫނީ ގޮތުން އޮޓޮމެޓިކުން ހިނގާފައިވާ އިޖުރާއަތެއް ކަމަށެވެ.