ސީރިއާގެ ހަނގުރާމައަށް ދިޔަ ދެމައިން ތުރުކީގައި ތާށިވެފައި ތިއްބައި ރާއްޖެ ގެނެސްފި

ހަނގުރާމައިގައި ބައިވެރިވުމަށް ސީރިއާއަށް ދިއުމަށްފަހު ފަހުން ތުރުކީއަށް ހިޖުރަކޮށް، ހާލުގައި ޖެހިފައި ތިބި ދިވެހި ދެމައިން ރާއްޖެ ގެނެސް ރިހެބިލިޓޭޓް ކުރުމުގެ މަސައްކަތް ކުރަމުންދާ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ސީރިއާގައި ހިނގަމުންދާ ދާހިލީ ހަނގުރާމައިގައި ބައިވެރިވާން ދާ ދިވެހިން އަނބުރާ ގެނައުމަށްފަހު، އެމީހުންގެ އެސެސްމެންޓްތައް ހަދައި، ރިހެބިލިޓޭޓް ކުރުމަށްފަހު އަލުން މުޖުތަމައުއަށް ނެރުމުގެ މަސައްކަތް ރައީސް ޑރ. މުހައްމަދު މުއިއްޒުގެ އެންގެވުމުގެ މަތިން މިނިސްޓްރީން ދަނީ ކުރަމުންނެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އިހުސާން ވިދާޅުވީ ތުރުކީގައި ތިން މީހަކު ހާލުގައި ޖެހިފައި ތިބި ކަމުގެ މައުލޫމާތު ލިބިގެން އެކި މުއައްސަސާތަކާ ގުޅިގެން 14 އަހަރުގެ އަންހެން ކުއްޖަކާއި އެކުއްޖާގެ މަންމަ ރާއްޖެ ގެނެސްފައިވާ ކަމަށެވެ. އަދި ދެމައިންނަށް ނޭޝަނަލް ރީއިންޓެގްރޭޝަން ސެންޓަރުގައި ފަރުވާ ދެމުންދާ ކަމަށްވެސް ވިދާޅުވި އެވެ.

މިނިސްޓަރު ވިދާޅުވީ ޖިހާދުގެ ނަމުގައި ހަނގުރާމައަށް ގޮސް ހާލުގައި ޖެހިފައި ތިބޭ މީހުން އަނބުރާ ރާއްޖެ ގެނައުމުގެ މަސައްކަތުގެ ތެރެއިން 23 މީހަކު ރީއިންޓެގްރޭޓް ކޮށްފައިވާ ކަމަށެވެ.

އަދި ސީރިއާގެ ދެ ސަރަހައްދެއްގައި ތިބި 60 އެއްހާ ދިވެހިންނާއި އެހެން ގައުމުތަކުގައި އެގޮތަށް ތާށިވެފައި ތިބި ދިވެހިން ގެނައުމުގެ މަސައްކަތް ކުރިޔަށްދާކަން ވެސް ފާހަގަކުރެއްވި އެވެ.

އެގޮތަށް ގެންނަ މީހުން ރާއްޖެ ގެނައުމަށްފަހު ކ. ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރަށް ގެންދަނީ މެޑިކަލް ޓެސްޓްތަކެއް ވެސް ހެދުމަށްފަހު އެވެ.

މީގެ ކުރިން މިނިސްޓަރު އިހްސާން ވިދާޅުވެފައި ވަނީ މި އެސެސްމެންޓްތައް ހެދުމަށްފަހު އެމީހުންނާ ދޭތެރޭގައި އަޅާނެ ފިޔަވަޅަކީ ކޮބައިތޯ ބަލާނެ ކަމަށެވެ. އެގޮތުން ދައުވާ ކުރަން ޖެހޭ މީހުންނަށް ދައުވާ ކުރާނެ ކަމަށް ވިދާޅުވި އެވެ.

އެހެންކަމުން، ހަދާ އެސެސްމެންޓްތަކުގެ ތެރޭގައި، އެމީހުންނަކީ ހަނގުރާމައިގައި ބައިވެރިވެފައި އައި މީހުންތޯ އާއި އެފަދަ ވިސްނުން ގެންގުޅޭ މީހުންތޯ ބަލާނެ އެވެ. އެކަން ބެލުމަށް އެމީހުންނާ ދޭތެރޭ އަޅާނެ ފިޔަވަޅު ކަނޑައެޅިގެންދާނެ އެވެ.

ޓެރަރިޒަމް މަނާ ކުރުމުގެ ގާނޫނުގެ ދަށުން ހަރުކަށި ފިކުރުގެ ވިސްނުން ގެންގުޅުމާއި ހިތްވަރު ދިނުމާއި، ހަނގުރާމައިގައި ބައިވެރިވުމުގެ ނިޔަތުގައި އެފަދަ ތަންތަނަށް ދިއުމާއި އަދި ހަނގުރާމައިގައި ބައިވެރިވުމަކީ ކުށެކެވެ.