އަކްރަމް އާއި ވަހީދު ވީޑިއޯ ނެގީ ހޯމް މިނިސްޓަރު އާއިލާއަށް ސެކިއުރިޓީ ދޭތީ: އިހުސާން

ހޯމް މިނިސްޓަރު ކުޑަ ދަރިފުޅު ހިމެނޭހެން ވީޑިއޯ ނަގައި ގޮތް ނޭނގޭ އެކައުންޓްތަކަށް ދިނީ، އާއިލާއަށް ސެކިއުރިޓީ ދޭތީ ކަމަށް ގަބޫލު ކުރައްވާތީ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ. 

އެމްޑީޕީ ސަރުކާރުގެ ހައުސިން މިނިސްޓްރީގެ ނައިބުކަން ކުރެއްވި އަކްރަމް ކަމާލުއްދީން އާއި އެންސްޕާގެ / ފެނަކަ ކުންފުނީގެ އިސް މަގާމުތަކެއް ފުރުއްވި މުހައްމަދު ވަހީދު ހޯމް މިނިސްޓަރު އަލީ އިހުސާންގެ އާއިލާ މަގުމަތީގައި އުޅެނިކޮށް ވީޑިއޯއެއް ނަގަގައި ކާކުކަން ނޭނގޭ ސޯޝަލް މީޑިއާ އެކައުންޓަކަށް ފޮނުވި މައްސަލާގައި އިހުސާން ވަނީ އެ ވީޑިއޯ ނަގާ މަންޒަރު ސޯޝަލް މީޑިއާގައި އާއްމުކޮށްފަ އެވެ. 

މިކަމާ ގުޅިގެން މިއަދު އޮތް ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ 10 އަހަރު ނުފުރޭ ދަރިފުޅު ހިމެނޭހެން އެ ވީޑިއޯ ނެގުމަކީ ވަރަށް ގައިރު ޒިންމާދާރު ކަމެއް ކަމަށެވެ.

އަދި ރަސްމީ އެކައުންޓުން އެ ވީޑިއޯ ޕޯސްޓްކުރީ ކޮންމެހެން އޭނާގެ ދަރިފުޅުގެ ވީޑިއޯ ނެގީތީ ނޫން ކަމަށާއި، ކުޑަކުއްޖެއްގެ ވީޑިއޯ އެގޮތަށް ނެގުމުން ކަމަށްވެސް ވިދާޅުވި އެވެ. އެހެން ކުއްޖެއްގެ ވީޑިއޯ އެގޮތަށް ނެގި ނަމަވެސް އަމަލުކުއްވާނީ އެގޮތަށް ކަމަށް ވިދާޅުވި އެވެ.

"ބޮޑެތި ސިންގާ ފިރިހެނުން 10 އަހަރު ނުވާ ކުޑަކުދިންނާ އަދި ދައުލަތުގެ އެކި މަގާމުގައި ރަސްމީ ހައިސިއްޔަތުން ކުރާ ކަންތަކުގެ ތެރެއަށް އާއިލާ ވައްދާނަމަ އަޅުގަނޑުމެންވެސް އެ ޑީސަންސީއާ އެއްކޮށެއް ނޫން ކަންތައް ކުރާނީ. އަޅުގަނޑުމެން ކޮންމެ ދިވެހި ރައްޔިތަކަށްވެސް ރެސްޕެކްޓް ކުރަން. ނަމަވެސް ތިމާމީހާއަށް ލިބިފައިވާ ހައްގުތަށް ބޭނުން ކުރާއިރު އަނެކާގެ ހައްގުތަކަށް އަރައިގަނެގެން ނުވާނެ. ހައްގުތަކާ އިންތަކެއް ކަނޑައަޅާފައި ވަނީ. ހުސް ހައްގުތަކެއް ނޫން،" މިނިސްޓަރު ވިދާޅުވި އެވެ. 

ވީޑިއޯ އަންމު ކުރައްވައި އިހުސާން ކުރެއްވި ޕޯސްޓުގައި ލިޔުއްވާފައި ވަނީ، ޑިމޮކްރަސީއާއި އިންސާނީ ހައްގުތަކަށް ވަކާލާތުކުރާ ސިޔާސީ ޕާޓީއެއްގެ އިސް ސަފުގައި ތިއްބެވި ބޭފުޅުން، މަގުމަތިން އާންމު ރައްޔިތުންގެ އާއިލާތަކަށް ފާރަލައި ވީޑިއޯކޮށް އާއްމު ކުރުމަކީ އަހުލާގީ ގޮތުން ރަނގަޅު ކަމެއް ނޫން ކަމަށެވެ.

މިފަދަ އަމަލުތަކުގެ ސަބަބުން ރާއްޖޭގެ ސިޔާސީ މަޝްރަހުގައި އޮތް ބަދަލުހިފުމާއި، އާއިލާތަކަށް އަމާޒުކޮށްގެން ހިންގާ ނަފުރަތުގެ ސިޔާސަތު އިތުރަށް ގޯސްވެގެންދާކަން އިހުސާން ފާހަގަ ކުރައްވާފައިވެ އެވެ.