އިންތިހާބާ ދިމާކޮށް ދޫކޮށްލި ގައިދީން އަލުން ބަންދު ކުރުމުގެ މަސައްކަތް ދަނީ ކުރަމުން: އިހުސާން

މިދިޔަ ރިޔާސީ އިންތިހާބާ ދިމާކޮށް ކުރީ ސަރުކާރުން މިނިވަންކުރި ގައިދީންގެ ތެރެއިން އަލުން ބަންދުކުރަން ޖެހޭ މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

އެ މިނިސްޓްރީގެ ކަންކަމާ ގުޅިގެން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ ކުރީ ސަރުކާރުން ރާއްޖޭގައި ހުރި އެންމެ ފެންވަރު ރަނގަޅު ޖަލު ކަމަށްވާ މާލޭ ޖަލު ބަންދު ކުރުމާއި އަދި 100 އެއްހާ މީހުންގެ ޖާގައިގެ ކަސްޓޯޑިއަލް ޖަލެއް ތަޅާލުމުގެ ސަބަބުން އެތަންތަނުގައި ތިބި މީހުން ދޫވެފައިވާ ކަމަށެވެ.

މާލެ ޖަލު ބަންދު ކުރީ، ކުރީ ސަރުކާރުން އެ ޖަލާ އިންވެގެން ސްކޫލެއް އަޅައި، ސްކޫލާ ޖެހިގެން ޖަލު ނުހިންގޭނެ ކަމަށް ބުނެ އެވެ.

"އެކީ ޖުމްލަ 450 ގައިދު ކުރެވޭނެ ޖާގަ މުޅި ކަރެކްޝަންސްގެ ކަސްޓޯޑިއަލް އިންފްރާސްޓްރަކްޗާގެ ތެރެއިން ވަނީ ދުއްވާލާފައި. މި ގެއްލުނު ޖާގަތަކުގައި ތިބި ގައިދީން ވަނީ ދޫކޮށްލާފައި އިންތިހާބުތަކާ ގުޅިގެން،" މިނިސްޓަރު ވިދާޅުވި އެވެ.

އިންތިހާބާ ދިމާކޮށް ދޫކޮށްލި މީހުންގެ ތެރެއިން އަނބުރާ ޖަލަށް ގެންނަން ޖެހޭ މީހުންނާއި އަދި މުޖުތަމައުގައި އެކި ގޮތްގޮތުން ދޫވެފައި ތިބި މީހުން އެކަހެރިކޮށް، ޖަލަށް ގެނައުމަށް ކުރާ މަސައްކަތަށް އަންނަ އެންމެ ބޮޑު ލޮޅުމަކީ އެ އިންފްރާސްޓްރަކްޗާ ނެތުން ކަމަށް އިހުސާން ވިދާޅުވި އެވެ.

އެހެންނަމަވެސް މިހާރު ކަރެކްޝަނަލް ސާވިސް އާއި ގައިދީން ގުޅިގެން ކުރި މަސައްކަތުން، ފާއިތުވި ދެ އަހަރެއްގާ ދުވަސްތެރޭ 400 އެއްހާ ޖާގަ ޖަލަށް އިތުރު ކުރެވިފައިވާކަންވެސް އޭނާ ފާހަގަކުރެއްވި އެވެ. އަދި ވިދާޅުވީ އެ ޖާގަތައް ފުލްވާވަރަށް މީހުން ބަންދުކޮށްފައި އެބަތިިބި ކަމަށެވެ.

މިނިސްޓަރު އިހުސާން އިތުރަށް ވިދާޅުވީ ކުރީ މި ސަރުކާރު އައިއިރު ކުރީ ސަރުކާރުން 100 އެއްހާ މީހުންގެ ޖާގައިގެ ޖަލެއް ހެދުމުގެ މަސައްކަތް ކުރަމުން ދިޔަ ކަމަށެވެ. އެ މަސައްކަތް ހަވާލުކޮށްފައި އޮތީ 39 މިލިއަން ރުފިޔާއަށެވެ. ނަމަވެސް މިދިޔަ ގާތްގަނޑަކަށް ހަތަރު މަހެއްހާ ދުވަސްތެރޭ ހުޅުމާލޭގައި 100 މީހުންގެ ޖާގައިގެ ޖަލެއް ގާއިމްކުރަން ފަސް މިލިއަންވެސް ހަރަދު ނުވާ ކަމަށް މިނިސްޓަރު ވިދާޅުވި އެވެ.

ކުޑަ އަގެއްގައި ކުރެވެން އޮތް ކަމެއް ބޮޑު އަގު ދީފައި ކުރުމުން މިނިސްޓަރު ވަނީ ކަންބޮޑުވުން ފާޅުކުރައްވާފަ އެވެ.

މީގެ ކުރިން ރައީސް ޑރ. މުހައްމަދު މުއިއްޒު ވިދާޅުވެފައި ވަނީ ރިޔާސާ އިންތިހާބާ ދިމާކޮށް 2023 ވަނަ އަހަރު އެމްޑީޕީ ސަރުކާރުން 429 މީހުން ދޫކޮށްލާފައިވާ ކަމަށެވެ. އަދި 2022 ގައި 256 ކުށްވެރިން ދޫކޮށްލާފައިވާއިރު، އޭގެ ކުރީ އަހަރުގައި އޮތް ލޯކަލް ކައުންސިލު އިންތިހާބާ ދިމާކޮށް 458 ކުށްވެރިން ދޫކުރި އެވެ. އަދި ރައްޔިތުންގެ މަޖިލީހުގެ އިންތިހާބާ ދިމާކޮށް 2019 ވަނަ އަހަރު 762 ކުށްވެރިން ދޫކޮށްފައިވާ ކަމަށް ރައީސް ވިދާޅުވެފައިވެ އެވެ.

ރައީސުލްޖުމްހޫރިއްޔާގެ ގާނޫނީ ބާރުގެ ދަށުން، މައާފު ދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ގިނަ އަދަދެއްގެ ގައިދީން އިންތިހާބުތަކާ ގުޅުވައިގެން ހުރިހާ ސަރުކާރަކުން ވެސް މިނިވަންކޮށްފައިވެ އެވެ. މިއީ ސިޔާސީ ނުފޫޒު ފޯރުވުމަށް ކުރާ ކަމެއްކަމަށް ގިނަ ބަޔަކު ތުހުމަތު ކުރެ އެވެ.