މާލެއިން މީހަކު ގެއްލިގެން ހޯދަނީ

މާލެއިން މީހަކު ގެއްލިގެން ހޯދަން ފަށައިފި އެވެ.

ގެއްލިގެން ހޯދަމުންދަނީ ޅ. ނައިފަރު، ކަށިމާގެ، ފާތިމަތު ނޫރާ 32، އެވެ.

ފުލުހުން ބުނީ ރޭ 20:00 އެހައިކަންހާއިރު ނޫރާ ގެއިން ބޭރަށް ދިޔަ ފަހުން ހަބަރެއްނުވެ ގެއްލިފައިވާކަމަށް ރޭ 12:19 އެހައިކަންހާއިރު އާއިލާއިން ފުލުހުންނަށް ވަނީ ރިޕޯޓް ކޮށްފައިވާ ކަމަށެވެ.

މި މައްސަލަ ރިޕޯޓްކުރުމާ ގުޅިގެން، ފުލުހުންގެ ކަމާގުޅުންހުރި ހުރިހާ ބަހާތަކަށް އެ މައުލޫމާތު ހިއްސާކޮށް، އޭނާ ހޯދުމުގެ މަސައްކަތް ކުރަމުންދާއިރު، މިހާތަނަށް ކުރެވުނު މަސައްކަތުން އޭނާ ފެނިފައި ނުވާ ކަމަށް ވެސް ފުލުހުން ބުންޏެވެ.

ނޫރާއާ ބެހޭ އެއްވެސް މައުލޫމާތެއް ލިބިފައިވާނަމަ ގަލޮޅު ޕޮލިސް ސްޓޭޝަން ނަންބަރު 9631696 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރުމަށް ފުލުހުން ވަނީ އެދިފަ އެވެ.

ނޫރާގެ ދައްތަ ފޭސްބުކްގައި ކުރި ޕޯސްޓެއްގައި ބުނެފައި ވަނީ އޭނާއަކީ ފިޓު ޖެހޭ، ސިކުނޑީގައި މައްސަލަ ހުންނަ މީހެއް ކަމަށެވެ. އަދި ރޭ ގެއިން ނުކުމެގެން ދިޔައީ ރުޅިއައިސްގެން "މިދަނީ މަރުވާން" ކަމަށް ބުނުމަށްފަހުގައި ކަމަށެވެ.

ގެއިން ނުކުމެގެން ދިޔައިއިރު ނޫރާ ހުރީ ގަދަ ޗޮކްލެޓް ކުލައެއްގެ ޓޮޕެއް ލައިގެން ކަމަށްވެސް އޭނާގެ ދައްތަ ބުނެފައިވެ އެވެ.