މަގުބޫލު އުޒުރެއްނެތި އުމްރާ ދަތުރު ކެންސަލް ކުމުރުން އަލް-އަބްރާރު ކުންފުނީގެ ހުއްދަ ހިފަހައްޓައިފި

އަލް-އަބްރާރު ހައްޖު އެންޑް އުމްރާ ކުންފުނިން ފަހު ވަގުތު 100 އަށްވުރެ ގިނަ މީހުންގެ އުމްރާ ދަތުރު ކެންސަލް ކުރި މައްސަލައިގައި އެ ކުންފުނީގެ ލައިސަންސް ހިފަހައްޓައިފި އެވެ.

ޖުމްލަ 110 މީހުންނާއެކު އުމްރާއަށް ފުރާން އޮތީ މިދިޔަ އަންގާރަ ދުވަހު އެވެ. ނަމަވެސް ފުރާން އޮތް ދުވަހު ވަނީ ކުއްލި ގޮތަކަށް ދަތުރު ކެންސަލްކޮށްފަ އެވެ.

އެ މައްސަލައާ ގުޅިގެން އިސްލާމިކް މިނިސްޓްރީން ނެރުނު ނޫސްބަޔާނެއްގައި ބުނީ، އެ ދަތުރު ކެންސަލް ކުރުމުގެ ޝަކުވާ ލިބުމާއެކު އެ މިނިސްޓްރީން މިހާތަނަށް ބެލިބެލުމުން، އެ ދަތުރު ކެންސަލް ކޮށްފައިވަނީ އެއްވެސް މަގުބޫލު ސަބަބެއް ނެތި ކަމަށެވެ. އަދި ރާއްޖޭން އުމްރާއަށް މީހުން ގެންދިއުމާ ބެގޭ އުސޫލާވެސް ހިލާފަށް ކަމަށެވެ.

"މި ސަބަބަށްޓަކައި މި ކުންފުންޏަށް ދޫކުރެވިފައިވާ ދިވެހިރާއްޖެއިން މީހުން އުމްރާއަށް ގެންދިއުމާބެހޭ ހުއްދަ ވަގުތީ ގޮތުން ހިފަހައްޓައި، އެކަން ކުންފުންޏަށް މިހާރު ވާނީ އަންގާފައި،" މިނިސްޓްރީން ބުންޏެވެ.

އަދި އެކަމާ ގުޅިގެން އިތުރަށް ބަލަން ޖެހޭ ކަންކަން ބަލައި، ކުންފުންޏާ ދެކޮޅަށް އަޅަންޖެހޭ އެހެން ފިޔަވަޅުތައް ވެސް އަޅާނެ ކަމުގެ އިންޒާރުވެސް ދީފައިވެ އެވެ.

އޭގެއިތުރުން، އުމްރާއަށް ނުދެވުނު މީހުންނަށް އެހީތެރިކަން ފޯރުކޮށްދިނުމުގެ ގޮތުން އެމީހުން ކޮބައިތޯ ބަލައި، އެ ހިދުމަތް ފަހިކޮށްދިނުމުގެ މަސައްކަތް ކުރަމުންދާ ކަމަށްވެސް ބުންޏެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރޭ ވިދާޅުވެފައިވަނީ ނުފުރި ތިބި 150 މީހުން މިވަގުތު އެބަތިބި ކަމަށާއި، އެމީހުން ފުރުވާލެވޭނެ ގޮތެއް ހޯދަމުންދާ ކަމަށެވެ. 

"ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މީގެ އިތުރުން ވެސް ޖާގަ އެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ވާހަކަ ދަންނަވަން. ވަގުތު ކުޑަތަންވެފައިވުމުން މިކަމުގައި ހުރި ދަތިތައް ހައްލުވޭތޯ މަސައްކަތްކުރަމުންދާ ވާހަކަ ދަންނަވަން،" މިނިސްޓަރު ވިދާޅުވެފައިވެ އެވެ.