އުލިގަމްގައި ޔޮޓްމެރީނާއެއް އަޅަން ހުޅުވާލައިފި

ރާއްޖެއަށް އެންމެ ގިނަ ޔޮޓް އަންނަ ހއ. އުލިގަމުގައި ޔޮޓް މެރީނާ ތަރައްގީކޮށްދޭނެ ބަޔަކު ހޯދުމަށް މޯލްޑިވްސް ޕޯޓްސް ލިމިޓެޓް (އެމްޕީއެލް) އިން ހުޅުވާލައިފި އެވެ.

އުލިގަމްގައި ޔޮޓް މެރީނާ އަޅަން ކުރިންވެސް ވާހަކަ ދެކެވުނެވެ. އަދި މި މަސައްކަތް ކުރަން އެމްޕީއެލާއި އުލިގަމު ކައުންސިލާ ދެމެދު އެއްބަސްވުމެއްގައި ސޮއިކޮށްފައިވަނީ އޮގަސްޓް 1، 2024 ގަ އެވެ. ނަަމަވެސް މި މަޝްރޫއު ބީލަމަށް ލާފައެއް ނުވެ އެވެ.

އެމްޕީއެލްއިން މި މަޝްރޫއު އިއުލާނުކޮށްފައިވަނީ އުލިގަމު ޔޮޓް މެރީނާ ޑިޒައިންކުރުމާއި އިމާރާތް ހޯދާ ގޮތަށެވެ. މި އެ މަސައްކަތަށް އަގު ހުށަހެޅުމުގެ ސުންގަޑިއަކީ އަންނަ ހޯމަ ދުވަހުގެ މެންދުރު ފަހު 1:00 ކަމަށް އެމްޕީއެލްއިން ވަނީ ވިދާޅުވެފަ އެވެ.

އުލިގަމުގައި ތަރަށްޤީކުރާ ޔޮޓް މެރީނާ ތަރައްގީކުރުމަށް ވަކި ހާއްސަ ސަރަހައްދެއްވަނީ ކަނޑައަޅާފަ އެވެ. މެރީނާ އަޅަނީ މޫދުގަ އެވެ. އެގޮތުން އަޅާ ފްލޯޓިން ޕްލެޓް ފޯމް 3 މީޓަރު ފުޅާވާން ޖެހެ އެވެ. މިސަރަހައްދަށް ކައިރިކުރެވޭނީ 12 މީޓަރާއި 15 މީޓަރުގެ ދިގު އުޅަނދު ފަހަަރަށެވެ.