ދުނިޔޭގެ ތެލުގެ އަގު ބޮޑުތަކުން މައްޗަށް | އެސްޓީއޯއިން ތެލުގެ އަގަށް ބަދަލެއް

މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އެތައް ގުނައަކުން އިތުރުވުމާ ގުޅިގެން، ރާއްޖޭގައި ޕެޓްރޯލާއި ޑީސަލް ވިއްކާ އަގު އެސްޓީއޯއިން ބޮޑުކޮށްފި އެވެ.

އެސްޓީއޯއިން ރޭ ދަންވަރު ކުރި އިއުލާނެއްގައި ބުނީ، އެ ކުންފުނީގެ ސަބްސިޑިއަރީ އެފްއެސްއެމްގެ ޕެޓްރޯލް ޝެޑުތަކުން ވިއްކާ ޕެޓްރޯލާއި ޑީސަލްގެ އަގަށް ބަދަލު ގެނެސްފައިވަނީ މިއަދުން ފެށިގެން ކަމަށެވެ.

އެސްޓީއޯއިން ޕެޓްރޯލާއި ޑީސަލްގެ އަގަށް ގެނައި ބަދަލު، އަތޮޅު ތެރެއަށް ފުޅާދާއިރާއެއްގައި ތެޔޮ ސަޕްލައި ކުރާ ކުންފުނި، ހޯކްސްއިން ވެސް ވަނީ ގެނެސްފަ އެވެ.

އެ ކުންފުނިން ރޭ ކުރި އިއުލާނެއްގައި ބުނީ، އެސްޓީއޯއިން ބޮޑުކުރި އަގުތަކާ އެއް މިންވަރަށް އެ ކުންފުނިން ވެސް ޕެޓްރޯލާއި ޑީސަލް ވިއްކާ އަގު ބޮޑުކޮށްފައިވާ ކަމަށެވެ.

މީގެ ހަ ދުވަސް ކުރިން، އެމެރިކާ އާ ގުޅިގެން އިޒްރޭލުން އީރާނަށް ދޭން ފެށި ހަމަލާތަކާ އެކު މުޅި މެދިއިރުމަތީގައި ދަނީ ވަރުގަދަ ހަމަނުޖެހުންތައް ހިނގަމުންނެވެ.

މިގޮތުން، އިޒްރޭލުން ފެށި އުދުވާނުގެ ރައްދުގައި، އީރާނުން ދަނީ މެދުއިރުމަތީގެ އެކި ގައުމުތަކުގައި އެމެރިކާ ސިފައިން ތިބޭ މަރުކަޒުތަކަށް އަމާޒުކޮށް ހަމަލާތައް ދެމުންނެވެ.

އެކަމުގެ ސަބަބުން، ކަނޑާއި ވައިގެ މަގުން މުދާ ބޭރުކުރަން ބޮޑެތި ހުރަސްތައް ކުރިމަތިވެ، ދުނިޔޭގެ ބާޒާރުގައި ތެލާއި ގޭހުގެ އަގު ވަނީ އެތައް ގުނައަކުން އިތުރުވެފަ އެވެ.

މިގޮތުން، ދުނިޔޭގެ ބާޒާރުގައި ތެޔޮ ފީފާއެއްގެ އަގު މިހާރު ވެސް ވަނީ 82 އެމެރިކާ ޑޮލަރަށް އިތުރުވެފަ އެވެ. މިއީ މިދިޔަ އަހަރު ފެށުނު ފަހުން، ތެލުގެ އަގު މި މިންވަރަށް ބޮޑުވި ފުރަތަމަ ފަހަރެވެ.

ދުނިޔެއަށް މުދާ ސަޕްލައި ކުރުމުގައި ދިމާވާ ދަތިތަކުގެ އަސަރު ކުޑަކުރަން މަސައްކަތް ފަށާފައިވާ ކަމަށް ސަރުކާރުން ވަނީ ބުނެފަ އެވެ.

މި ވަގުތަށް ރާއްޖެއަށް ބޭނުންވާ މިންވަރަށް އަސާސީ މުދާ ހުރި ކަމުގެ ޔަގީންކަން ރައީސް ޑރ. މުހައްމަދު މުއިއްޒު ވެސް ދެއްވާފައިވާއިރު، ކާބޯތަކެއްޗާއި، ތެލާއި ގޭހަށް ނުޖެހޭނެކަމުގެ ޔަގީންކަން އިކޮނޮމިކް މިނިސްޓަރު މުހައްމަދު ސައީދު ވަނީ ދެއްވައިފަ އެވެ.