ބަދަލެއް | އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް ކުރިމަތިލެވޭނެ

ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް ނަމަވެސް، ގޯއްޗަކަށް ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް އިއުލާނުކޮށްފި އެވެ. 

މިކަމާގުޅޭ އުސޫލު އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން މިހާރު ވަނީ ގެޒެޓުގައި އާންމުކޮށްފައެވެ. މި އުސޫލުގެ ދަށުން ގޯއްޗަށް އެދި ހުށަހެޅުމުގެ ފުރުސަތު މިމަހުގެ އަށް ވަނަ ދުވަހު ފެށިގެން ހުޅުވާލާނެ އެވެ. މި އުސޫލަށް ބަދަލު ގެނެސްފައިވަނީ ރައީސް ޑރ. މުހައްމަދު މުއިއްޒު މާލޭގެ ރައްޔިތުންނާ އެކު ބޭއްވި ބައްދަލުވުންތަކުގައި ގިނަ ބަޔަކު އެކަމަށް އެދިފައިވާތީ އެވެ. 

ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ގޯތި ގެދޮރުގެ ނަމުގައި އާ ސްކީމެއް ތައާރަފު ކުރަން ނިންމީ ގޯއްޗަށް އޮތް ޑިމާންޑު ދަށްވުމާއެކު ގޯތި ހޯދުމަށް އިތުރު ފުރުސަތެއް ދޭށެވެ. މ ބަދަލާއެކު ފިރިމީހާ ނުވަތަ އަނބިމީހާ ތަނެއް އޮތް ނަމަވެސް އެމީހަކަށް ގޯއްޗަށް ކުރިމަތިލުމުގެ ފުރުސަތު ލިބޭނެ އެވެ. އޭރުން ފިރިމީހާ އަނބިމީހާ ފްލެޓެއް އޮތްނަމަވެސް މުސްތަޤުބަލުގައި ބިމެއް ހޯދުމުގެ ފުރުސަތު ފަހިވެ އެވެ. 

ގޯތިދޭނީ ކޮން ތަނަކުން ؟ - މި އުސޫލުގެ ދަށުން މިހާރު ފުރުސަތު ހުޅުވާލާފައިވާ ބޯހިޔާވަހިކަމުގެ ސްކީމުގައި ކެޓަގަރީ 1، މާލޭ ރަށްވެހިންނަށް އަދި ހާއްސަ އިސްކަންދެވޭ ކެޓަގަރީތަކަށް ގޯތި ދޫކުރާނީ ގްރޭޓާ މާލޭ ސަރަހައްދުންނާއި ރަސްމާލެ އިންނެވެ. އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޭނީ ރަސްމާލެއިން ނެވެ.

ހައުސިން މިނިސްޓްރީގެ ތަފާސް ހިސާބުތައް ދައްކާ ގޮތުން މިހާތަނަށް ހުށަހަޅާފައިވާ ފޯމުތައް ހިމެނޭޙެން ޖުމްލަ 18،399 އެޕްލިކޭޝަނެއް ވަނީ އެކިމަރުހަލާތަކުގަ އެވެ. މީގެތެރޭގައި ހިމެނެނީ ފްލެޓަށް ލާން ހުށަހެޅުމުގެ މަރުހަލާގައި ހުރި 8466 އެޕްލިކޭޝަނާއި ހުށަހަޅާފައި ހުރި 3396 އެޕްލިކޭޝަން އަދި ގޯއްޗަށް ހުށަހެޅުމުގެ މަރުހަލާގައި ހުރި 2851 އެޕްލިކޭޝަންގެ އިތުރުން ހުށަހަޅާފައިވާ 2513 އެޕްލިކޭޝަނެވެ. މީގެ އިތުރުން ހިމެނެނީ ހިޔާ ކެޓަގަރީގެ ހުށަހެޅުމުގެ މަރުހަލާގައި ހުރި 220 އެޕްލިކޭޝަން އަދި ހުށަހަޅާފައިވާ 953 އެޕްލިކޭޝަނެވެ. މި ދެ ޕްރޮގްރާމަށް ވެސް ފޯމު ހުށަހަޅަން ޖެހޭނީ ބޯހިޔާވަހިކަން ޕޯޓަލް މެދުވެރިކޮށެވެ.