މި އަހަރު ތެރޭގައި 23 އައިސްޕްލާންޓު އޮޕަރޭޝަނަށް ގެންނަން އަމާޒު ހިފައިފި

މި އަހަރުގެ ނިޔަލަށް ޖުމްލަ 23 ރަށެއްގައި އައިސްޕްލާންޓް ގާއިމުކުރުމަށް ކުރަމުންދާ މަސައްކަތް ނިންމައި، އޮޕަރޭޝަނަށް ގެނައުމަށް އަމާޒު ހިފާފައިވާކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޝިޔާމް ވިދާޅުވީ، މަސްވެރިންނަށް އައިސް ލިބުމުގައި ދިމާވާ ދަތިތައް ހައްލުކުރުމަށް ސައުދީ ފަންޑުންނާއި ސަރުކާރުން ހަރަދުކޮށްގެން 23 ރަށެއްގައި އައިސްޕްލާންޓް ތަރައްގީކުރުމަށް ނިންމާފައިވާކަމަށެވެ.

އެގޮތުން ހަ ރަށެއްގައި ގާއިމްކުރި އައިސްޕްލާންޓްތައް އޮޕަރޭޝަނަށް ގެނެސްފައިވާއިރު، އިތުރު ނުވަ އައިސްޕްލާންޓެއްގެ އަމަލީ މަސައްކަތް ކުރިއަށްދާކަމަށް މިނިސްޓަރު ވިދާޅުވި އެވެ. 

މީގެއިތުރުން، ފަސް އައިސްޕްލާންޓެއްގެ މަސައްކަތް ސައުދީ ފަންޑުން ކުރިއަށް ގެންދިޔުމަށް ވަނީ ހަމަޖެހިފަ އެވެ. އޭގެތެރޭގައި، ގދ. ރަތަފަންދޫ، އއ. ރަސްދޫ، ހއ. ދިއްދޫ، ގއ. ދާންދޫ އަދި ކ. ގާފަރު ހިމެނެ އެވެ.

ސަރުކާރު ބަޖެޓުން، ގއ. ނިލަންދޫ، ގއ. ވިލިނގިލި އަދި ގއ. މާމެންދޫގައި ގާއިމުކުރާ އައިސްޕްލާންޓުތަކާ އެކު، ސަރުކާރުގެ އަމާޒަކީ އެ މަސައްކަތް މި އަހަރުގެ ތެރޭގައި ނިންމައި، އެ ތަންތަން އޮޕަރޭޝަނަށް ގެނައުން ކަމަށް ޝިޔާމް ވިދާޅުވި އެވެ.

މިނިސްޓަރު ވިދާޅުވި ގޮތުގައި، މި 23 އައިސްޕްލާންޓު އޮޕަރޭޝަނަށް ގެނައުމުން، މަސްވެރިން އައިސް ހޯދުމުގެ ދިމާވާ ދަތިތައް އެކީގައި ހައްލުވާނެ އެވެ.

އައިސްޕްލާންޓްތައް ގާއިމުކުރުމުގެ އިތުރުން ކޯލްޑް ސްޓޯރޭޖްގެ ކެޕޭސިޓީ އިތުރުކުރުމާއި ބާނާ މަހަށް އަގު އެއްކުރުމުގެ ގާބިލުކަން އިތުރުކުރުމަށް ސަރުކާރުން ދަނީ މަސައްކަތް ކުރަމުންނެވެ.