ޑެޑްލައިނެއް ނެތި މުޅި އަހަރު ސްޓޫޑެންޓް ލޯނަށް އެދުމުގެ ފުރުސަތު ހުޅުވާލަނީ
ވަކި މުއްދަތެއް ނެތި މިއަހަރު ލޯނު ސްކީމަށް ހުޅުވާލާނީ އަންނަ ހަފްތާ ފެށޭ ރޯދަމަހުގެ ފަހު 10ގެ ޗުއްޓީއަށްފަހު ދެން ސަރުކާރު ހުޅުވޭ ހަފްތާތެރޭގައި ކަމަށް ވެސް މިނިސްޓަރު ވިދާޅުވި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވީ ވަކި މުދަތެއްގެ ތެރޭގައި ސްޓޫޑެންޓް ލޯނަށް އެދުމުގެ ފުރުސަތު ހުޅުވާލުމުން ގިނަ ދަރިވަރުން ދަތިތަކާ ކުރިމަތިލާން ޖެހޭ ކަމަށެވެ.
ލޯނު ސްކީމަށް ހުޅުވާލާއިރު މުހިންމު ބަދަލުތަކެއް ގެނައުމަށް ނިންމާފައިވާކަން ފާހަގަކުރައްވައި މިނިސްޓަރު ވިދާޅުވީ، ދެން ދަރިވަރުންނަށް ދޫކުރާނީ އިތުރު ޖާޖެއް ދައްކަން ނުޖެހޭ "ޝަރީއާ ކޮމްޕްލަޔަންޓް" ލޯނުތަކެއް ކަމަށެވެ.
"މިފަހަރު އަލަށް ލޯނަށް ހުޅުވާލާއިރު އެޕްލިކޭޝަން ޑެޑްލައިނެއް ނުބާއްވާ ލޯނަށް އެދުމުގެ ފުރުސަތު މުޅި އަހަރަށް ހުޅުވާލެވިފައި އޮންނާނެ. މިހާތަނަށް ދަރިވަރުން ލޯނު ހޯދަން އެދި ހުށަހަޅަން ވަކި މުއްދަތެއް ކަނޑައެޅިފައި އޮތުމުން، އެ މުއްދަތުގައި ލޯނަށް އެދި ހުށަހެޅުން ބައެއް ދަރިވަރުންނަށް ދަތިވޭ. އަދި ލޯނަށް އެދުމުގެ ފުރުސަތު ގެއްލޭ ގޮތް ދިމާވެފައިވާކަން ވެސް ފާހަގަކުރެވޭ،" މިނިސްޓަރު ވިދާޅުވި އެވެ.
މި ބަދަލާއެކު ލޯނަށް އެދުމަށް ފަސޭހަވެގެން ދާނެކަން ފާހަގަކުރައްވައި މިނިސްޓަރު ވިދާޅުވީ މި ބަދަލާއެކު ލޯނަށް އެދި ހުށަހަޅާނެ ލިޔުންތައް ވެސް ތަފާތުވެގެން ދާނެ ކަމަށެވެ. އަދި މުޅި އަހަރަށް ހުޅުވާލާފައި އޮތުމުން، ލޯނަށް އެދެންވާނީ ހުރިހާ ލިޔުންތަކެއް ހަމަކޮށްގެން ކަމަށްވެސް ވިދާޅުވި އެވެ.
ހަމަކުރަންޖެހޭ ލިޔުންތަކުގެ ތެރޭގައި މިނިސްޓަރު ފާހަގަކުރެއްވީ ޕްލޭސްމެންޓެއް ހޯދުމާއި އަދި އެމްކިއުއޭއިން ހޯދަންވާ ލިޔެކިޔުން ހޯދުމެވެ. އެގޮތުން އެމްކިއުއޭއިން ދޫކުރާ އިންޓެންޑެޑް ޕްރޮގްރާމް ރިކޮގްނިޝަން ލެޓާ ހޯދުން މުހިންމުވާނެ ކަމަށާއި، އޭގެ ސަބަބުން ފުރިހަމަ ކުރަން ބޭނުންވާ ޕްރޮގްރާމުގެ ސެޓްފިކެޓް އެ އޮތޯރިޓީން ވެލިޑޭޓް ކުރުމުމުން ޝަރުތު ފުރިހަމަވާކަން ކަށަވަރު ވެގެންދާނެ ކަމަށް މިނިސްޓަރު ވިދާޅުވި އެވެ.
އަދި މަސައްކަތް ކުރުމަށް ރެގިއުލޭޓަރީ އޮތޯރިޓީއަކުން ހުއްދަދޭ ދާއިރާއަކުން ކިޔަވާނަމަ އެ ފުރިހަމަކުރާ ޕްރޮގްރާމަކީ އެ އޮތޯރިޓީއަކުން ހުއްދަދޭ ޕްރޮގްރާމެއްކަން އަންގައިދޭ ލިޔުންވެސް ހުށަހަޅަންވާނެ ކަމަށް މިނިސްޓަރު ވިދާޅުވި އެވެ.
އޭގެ އިތުރުން ލޯނަށް އެދި ހުށަހަޅާއިރު ފީ ސްޓްރަކްޗާއެއް ތައްޔާރުކޮށްފައި އޮންނަންވާނެ ކަމަށްވެސް ވިދާޅުވި އެވެ.
"ލޯނަށް އެދެން ބޭނުންވާ ދަރިވަރުންނަށް އަޅުގަނޑު އިލްތިމާސްކުރަނީ އިސްވެ ދެންނެވުނު ލިޔުންތައް ފުރިހަމަ ކުރުމަށްފަހު ތައްޔާރުވެގެން ތިއްބެވުމަށް. ފުރިހަމަ އެޕްލިކޭޝަން ހުށަހަޅާ ދަރިވަރުންނަށް ލޯނު ފައިސާ ހަމަޖެހުމަށް އެހެން އަހަރުތަކާ އަޅާބަލާއިރު ވަރަށް ބޮޑުތަން އަވަސްވާނެ،" މިނިސްޓަރު ވިދާޅުވި އެވެ.
ވަކި މުއްދަތެއް ނެތި މިއަހަރު ލޯނު ސްކީމަށް ހުޅުވާލާނީ އަންނަ ހަފްތާ ފެށޭ ރޯދަމަހުގެ ފަހު 10ގެ ޗުއްޓީއަށްފަހު ދެން ސަރުކާރު ހުޅުވޭ ހަފްތާތެރޭގައި ކަމަށް ވެސް މިނިސްޓަރު ވިދާޅުވި އެވެ.
ރާއްޖެއާއި ރާއްޖޭން ބޭރުގައި މަތީ ތައުލީމާއި ތަމްރީނު ހޯދަން ދޫކުރާ އަދި ދޫ ކޮށްފައިވާ ލޯނުތަކަކީ، އިސްލާމީ ހަމަތަކަށް ފެތޭ "ޝަރީއާ ކޮމްޕްލަޔަންޓް" ލޯނުތަކަކަށް ހެދުމަށް ބައެއް ކަންކަން ތަންފީޒު ކުރުމަށް ހަޔާ އެޑިއުކޭޝަން މިނިސްޓްރީއަށް ރައީސް ޑރ. މުހައްމަދު މުއިއްޒު އަންގަވާފައި ވަނީ މިދިޔަ އަހަރުގެ މާޗު މަހުގަ އެވެ.
އެ ބަދަލާއެކު ހަޔާ އެޑިއުކޭޝަން މިނިސްޓްރީން ދޫކުރާ ލޯނު، ޝަރީއާ ކޮމްޕްލަޔަންޓް ލޯނެއްގެ ގޮތުގައި ހަމަޖެއްސުމުގެ ގޮތުން ލޯނާއެކު ހިމަނާފައިވާ އެއް ޕަސެންޓްގެ އިދާރީ ފީ ގެ ގޮތުގައި ނަގަމުންދާ އަދަދު އެއްކޮށް އުނިކުރަން ވަނީ ނިންމާފަ އެވެ.
ކޮމެންޓް
Republic of Maldives