ރާއްޖޭގެ 67 ކުންފުންޏަކާއެކު އައިޓީބީ ބާލިން ފެއާ ފަށައިފި

ފަތުރުވެރިކަން އިސްތިހާރު ކުރާ އައިޓީބީ ބާލިން ފެއާ މިއަދު ފަށައިފި އެވެ.

މެދުއިރުމަތީގައި ހަނގުރާމަ ހިނގަމުން އަންނަ މި ދަނޑިވަޅުގައި ޖާމަނީގެ ބާލިންގައި ފެށި މި ފެއާގައި ވިސިޓް މޯލްޑިވްސް ކޯޕަރޭޝަން (ވީއެމްސީ) އާއެކު ރާއްޖޭގެ 67 ކުންފުންޏަކުން ވަނީ ބައިވެރިވެފަ އެވެ.

ވީއެމްސީން ބުނި ގޮތުގައި އައިޓީބީގެ ތެރެއިން ރާއްޖޭގެ މަގުބޫލުކަން އިތުރުކުރުމަށް ކުރިއަށް ގެންދާ ހަރަކާތްތަކުގެ އިތުރުން ދިވެހި ޓޫރިޒަމް ސިނާއަތުގެ މުސްތަގުބަލާ ގުޅުންހުރި މުހިންމު ކަންތައްތަކެއް އިއުލާން ކުރާނެ އެވެ. 

ފެއާގައި "މޯލްޑިވްސް، ދަ ސަނީ ސައިޑް އޮފް ލައިފް" ބްރޭންޑުގެ ދަށުން ތައްޔާރުކޮށްފައިވާ ސްޓޭންޑުން ރާއްޖޭގެ މަތީ ފަންތީގެ ރިސޯޓުތަކާއި ގެސްޓްހައުސްތަކާއި ސަފާރީތަކުގެ އިތުރުން ވެލްނަސް އަދި އާއިލީ ޗުއްޓީތަކަށް ހުރި ފުރުސަތުތަކާއި ދެމެހެއްޓެނިވި ފަތުރުވެރިކަމުގެ ތަޖުރިބާތައް ދައްކާލާނެ ކަމަށް އެ ކުންފުނިން ބުންޏެވެ.

ވީއެމްސީން ބުނީ ފެއާގެ ތެރެއިން މި ފަހަރު ކުރިޔަށް ގެންދާ ހަރަކާތްތަކުގެ ތެރޭގައި "މޯލްޑިވިއަން ނައިޓް" ހިމެނޭ ކަމަށެވެ. އެއީ ވިލާތުގެ ބޮޑެތި ޓުއާ އޮޕަރޭޓަރުންނާއި އެއާލައިންތަކާއި މީޑިއާ އަދި ފަތުރުވެރިކަމުގެ ދާއިރާގެ އިސް ފަރާތްތަކާ ގުޅުން ބަދަހިކުރުމަށް ބާއްވާ ހާއްސަ ހަފުލާއެއް ކަމަށް އެ ކުންފުނިން ބުންޏެވެ.

އޭގެ އިތުރުން ބޭންކް އޮފް މޯލްޑިވްސް (ބީއެމްއެލް) އާ ގުޅިގެން ބާއްވާ މި ހަފުލާގައި ރާއްޖެއަށް ޒިޔާރަތްކުރާ ފަތުރުވެރިންނަށް ފައިސާގެ މުއާމަލާތްތައް ފަސޭހަކޮށްދިނުމަށް ތައާރަފުކުރާ "ސްވައިޕް" ޑިޖިޓަލް ޕޭމަންޓް ސޮލިއުޝަނެއް ތައާރަފުކުރުމަށް ވެސް ހަމަޖެހިފައިވާ ކަމަށް ވީއެމްސީން ބުންޏެވެ. 

އިތުރު ހަރަކާތްތަކުގެ ތެރޭގައި ދިވެހި ކާބޯތަކެތީގެ މުއްސަނދިކަން ދައްކާލުމާއި ބައިނަލްއަގުވާމީ މީޑިއާތަކަށް ހާއްސަކޮށްގެން ބާއްވާ ނޫސްވެރިންގެ ބައްދަލުވުމުގައި 2027 ވަނަ އަހަރު ރާއްޖޭގެ ފަތުރުވެރިކަން ކުރިއެރުވުމަށް ގެންގުޅޭނެ މުހިންމު ސްޓްރެޓީޖީތައް އިއުލާން ކުރުން ހިމެނޭ ކަމަށް އެ ކުންފުނިން ބުންޏެވެ.