ޓައުންޝިޕް މަޝްރޫއަކީ ކުޑަވަރެއްގެ އަތޮޅެއް ތަރައްގީ ކުރުން: ސައީދު

ސަސްޓެއިނަބަލް ޓައުންޝިޕް މަޝްރޫއަކީ އަކީ އެހެން ގޮތަކަށް ބުނާ ނަމަ ކުޑަ ވަރެއްގެ އަތޮޅެއް ތަރައްގީ ކުރުން ފަދަ ކަމެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސައީދު ވިދާޅުވީ ދުނިޔޭގެ މަޝްރަހު ހަލަބޮލިވަމުން އަންނަ އިރު ރާއްޖޭގެ އިގްތިސާދު ޑައިވަސިފައި ކޮށް ޓޫރިޒަމްގެ ތެރެއިން ފައިދާ ހޯދޭނެ އިތުރު ދާއިރާތަކުން މަސައްކަތް ކުރަމުން އަންނަ ކަމަށެވެ.

އޭގެ ތެރެއިން އެންމެ ބޮޑު އެއް ކަމަކީ ނ. އަތޮޅުގައި ހިންގާ ސަސްޓެއިނަބަލް ޓައުންޝިޕް "އާއިލާ" ކަމަށް މިނިސްޓަރު ވިދާޅުވި އެވެ.

ސައީދު ވިދާޅުވީ އެ މަޝްރޫއުގެ ތެރެއިން ބައިނަލްއަގުވާމީ ފެންވަރުގެ ސިއްހީ ހިދުމަތަކާއި ތައުލީމީ ހިދުމަތެއް ގާއިމް ކުރަން ޖެހޭ ކަމަށާއި އިއާދަކުރަނިވި ހަކަތައިން ކަރަންޓު އުފެއްދެން ޖެހޭ ކަމަށެވެ. އަދި ރާއްޖެ އަށް އެތެރެ ކުރާ ކާބޯތަކެތީގެ ވަކި ބާވަތްތަކެއް އެ ސަރަހައްދުގައި އުފައްދަން ޖެހޭ ކަމަށް އޭނާ ވިދާޅުވި އެވެ.

"ގާތްގަނޑަކަށް ކުޑަ ވަރެއްގެ ގޮއިދޫ ފުޅަދޫ ފެހެނދޫ ވަރުގެ ކުޑަ ވަރެއްގެ އަތޮޅެއް އެ ޑިވަލޮޕް ކުރެވެނީ." ސައިދު ވިދާޅުވި އެވެ.

މިނިސްޓަރު ވިދާޅުވި ގޮތުގައި ޓައުންޝިޕް މަޝްރޫއު ހިންގަނީ ރިއަލް އެސްޓޭޓް މާކެޓެއް ވެސް އުފެއްދޭ ގޮތަށެވެ. އަދި އެޕާޓްމަންޓުތައް ގަނެވިއްކާ އިރު ތިން ބޭންޑަކަށް ދައުލަތަށް ޓެކްސް ނަގަމުންދާނެ ކަމަށް މިނިސްޓަރު ވިދާޅުވި އެވެ.

އެގޮތުން ފުރަތަމަ ޓްރާންސެކްޝަންގައި އެއް ޕަސެންޓް، ދެވަނަ ޓްރާންސެކްޝަންގައި 2.5 ޕަސެންޓް އަދި ތިން ވަނަ ޓްރާންސެކްޝަންގައި ހަތަރު ޕަސެންޓް ޓެކްސް ނަގަން ނިންމާފައިވާ ކަމަށާއި އެ އަދަދުތަކަކީ ސިންގަޕޫރާއި ޔޫއޭއީ އަދި ގަތަރު ފަދަ ގައުމުތަކާ އަޅާ ކިޔާއިރު ވާދަވެރި ރޭޓުތަކެއް ކަމަށް ވެސް މިނިސްޓަރު ވިދާޅުވި އެވެ.

"މިއީ ރާއްޖޭގެ ތާރީހުގައި ހިންގޭނެ އެންމެ ބޮޑު މަޝްރޫއު." މިނިސްޓަރު ވިދާޅުވި އެވެ.