ގަލްފް ގައުމުތަކުގައި ބޮން ގޮއްވަން ރޭވި އިސްރާއިލް އެޖެންޓުންތަކެއް ހައްޔަރުކޮށްފި

ސައުދީ އަރަބިއްޔާއާއި ގަތަރަށް ބޮން އެޅުމަށް ރާވަމުންދިޔަ އިސްރާއީލުގެ ޖާސޫސީ އިދާރާ، މޮސާޑްގެ އެޖެންޓުންތަކެއް އެ ގައުމުތަކުން ހައްޔަރުކޮށްފައިވާ ކަމަށް އެމެރިކާގެ ސިޔާސީ މުފައްކިރު އަދި ނޫސްވެރިޔާ ޓަކާ ކާލްސަން ބުނެފިއެވެ.

ހޯމަ ދުވަހު އޭނާގެ ޝޯގައި ވާހަކަދައްކަމުން ކާލްސަން ވަނީ، އީރާނުގެ ހަމަލާތަކާ ކުރިމަތިލާންޖެހިފައިވާ ގަލްފު ގައުމުތަކަށް އިސްރާއީލުން ހަމަލާދޭން ރާވަނީ ކީއްވެގެން ތޯ ސުވާލު އުފައްދާފައެވެ. 

"އިސްރާއީލުން ބޭނުންވަނީ އީރާނުގެ އިތުރުން ގަތަރު، ޔޫއޭއީ، ސައުދީ، ބަހްރޭން، އޮމާން އަދި ކުވެއިތަށް ވެސް ގެއްލުންދޭން،" ކާލްސަން ބުންޏެވެ. 

އޭނާ ތުހުމަތުކުރި ގޮތުގައި އިސްރާއީލުން ދަނީ އެމެރިކާގެ އަރަބި އެކުވެރިންގެ މެދުގައި ނުތަނަވަސްކަން އުފައްދައި ފިތުނަ އުފައްދަމުންނެވެ.

މިދިޔަ ފެބުރުވަރީ މަހު، އެމެރިކާއިން އިސްރާއީލަށް ކަނޑައަޅާފައި ހުންނަ ސަފީރު މައިކް ހަކަބީއާ އިންޓަވިއު ކުރުމަށްފަހު އެނބުރި ދަނިކޮށް، އިސްރާއީލުގެ ސަލާމަތީ ބާރުތަކުން ކާލްސަންއާއި އޭނާގެ ޓީމު ބެން ގޫރިއަން އެއާޕޯޓުން ހިފަހައްޓާފައިވެ އެވެ.

މި އިންޓަވިއުގައި ހަކަބީ ވަނީ ފަލަސްތީނުގެ ބިމަކީ ޔަހޫދީންނަށް އޮތް "ދީނީ ހައްގެއް" ކަމަށް ބުނެ، ފަލަސްތީނުގެ ގައުމިއްޔަތަށް އިންކާރުކޮށްފައެވެ. ކާލްސަންއަކީ އިސްރާއީލުން ނަސާރާއިންނަށް ކުރާ އިހާނެތި ކަންކަމާއި ގާޒާގައި ހިންގާ ގަތުލުއާންމަށް ފާޅުގައި ފާޑުކިޔަމުންދާ މީހެކެވެ. މީގެ ސަބަބުން، ޕްރޯ-އިސްރާއީލް ގްރޫޕްތަކުން އޭނާއަކީ "އެންޓިސެމައިޓް އޮފް ދަ އިޔާ" (ޔަހޫދީންނާ ދެކޮޅުވެރި އެންމެ ބޮޑު މީހާ) ގެ ގޮތުގައި 2025 ވަނަ އަހަރު ނަންކޮށްފައިވެއެވެ.

ކާލްސަންގެ މި ވާހަކަތައް އައިސްފައިވަނީ އެމެރިކާއާއި އިސްރާއީލުން ގުޅިގެން އީރާނަށް ދެމުންދާ ވަރުގަދަ ހަމަލާތަކެއްގެ ތެރޭގައެވެ. އެގޮތުން އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަދި އަސްކަރީ މުހިންމު ލީޑަރުން ވަނީ އަވަހާރަކޮށްލާފައެވެ.
ދެކުނު އީރާނުގެ ސްކޫލަކަށް ދިން ހަމަލާއެއްގައި 150 އަންހެން ކުދިން ވަނީ މަރާލާފަ އެވެ. އަދި އީރާނުން ބަދަލުހިފުމުގެ ގޮތުން އެމެރިކާގެ 500 އަށްވުރެ ގިނަ މަރުކަޒަށް 700 ޑްރޯން އަދި އެތައް ސަތޭކަ މިސައިލް ހަމަލާ ފޮނުވާލާފައިވެ އެވެ.