ކާބޯތަކެއްޗާއި ތެލާއި ގޭހަށް ނުޖެހޭ ގޮތަށް، ސަޕްލައި ގެނެވޭނެ އިތުރު މަގުތައް ހޯދަނީ

މެދުއިރުމަތީގައި ހިނގަމުންދާ ހަނގުރާމައިގެ އަސަރު ރާއްޖެއަށް ކުޑަކުރުމަށްޓަކައި، ކާބޯތަކެއްޗާއި ތެލާއި ގޭސް ރާއްޖެއަށް ގެނެވޭނެ އިތުރު މަގުތައް ބަލަމުން އަންނަ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ، ހަނގުރާމައިގެ ސަބަބުން މެދުއިރުމަތީގައި މުދާ އުފުލާ މުހިންމު ބައެއް ކަނޑުއޮޅިތައް ބަންދުކުރުމުގެ އަސަރު ދުނިޔޭގެ ބާޒާރަށް ކުރަމުންދާ ކަމަށެވެ.

ނަމަވެސް، ހަނގުރާމަ ފެށުމުގެ ކުރިން ވެސް އެ ހާލަތަށް ތައްޔާރުވުމަށް ސަރުކާރުން ދުރާލައި މަސައްކަތް ފަށައިގެން، ކާބޯތަކެއްޗާއި ތެލާއި ގޭހަށް ނުޖެހޭނެ މިންވަރަށް ގެންދެވިފައިވާ ކަމަށެވެ.

"ފުޑް، ފިއުލް އަދި އެއްވެސް ކޮމޯޑިޓީއެއްގެ ޗެލެންޖެއް އިރާދަކުރެއްވިއްޔާ ކުރިމަތިވިޔަ ނުދޭނަން،" ސައީދު ވިދާޅުވި އެވެ.

"ކުރުކޮށް ދަންނަވަންޏާ ތެލާއި ގޭހަކަށް ނުޖެހޭނެ." 

މެދުކެނޑުމެއް ނައިސް ރާއްޖެއަށް އަސާސީ މުދާ ގެނެވޭނެކަން ކަށަވަރުކުރުމުގެ އިތުރުން، ރާއްޖެއަށް އަންނަ ޓޫރިސްޓުންނާއި ބިދޭސީ މަސައްކަތްތެރިންނާއެކު ރާއްޖޭގެ ޖުމްލަ އާބާދީއަށް ބޭނުންވާ އަސާސީ މުދަލުގެ ރައްކާތެރިކަން ކަށަވަރުކުރުމަށްޓަކައި، މުދަލުގެ ސްޓޯރޭޖް ކެޕޭސިޓީ އިތުރުކުރަން މަސައްކަތްތަކެއް ވެސް ކުރަމުންދާކަން މިނިސްޓަރު މިއަދު ހާމަކުރެއްވި އެވެ.

ނަމަވެސް، އެކަމުގެ ތަފްސީލެއް ސައީދު ނުދެއްވަ އެވެ.

ހަނގުރާމައިގެ ސަބަބުން ދުނިޔޭގެ ބާޒާރުގައި އަސާސީ މުދަލުގެ އަގަށް މިހާރުވެސް ބަދަލު އަންނަން ފަށާފައިވާއިރު، ސަރުކާރުން މަސައްކަތް ކުރަނީ، މުދާ ލިބުމުގެ ދަތިތަކުގެ އިތުރަށް ތަކެތީ އަގަށް އައިސްދާނެ ބަދަލުގެ ނޭދެވޭ އަސަރު ދިވެހި ރައްޔިތުންނަށް ނުކުރާނެ ގޮތަކަށް ވިސްނައިގެން ކަމަށް އޭނާ ވިދާޅުވި އެވެ.