ޕީކް ލޯޑަށް މި އަހަވެސް ސްޓެލްކޯ ދުރާލާ ތައްޔާރު

ވޭތުވެދިޔަ 40 ވަރަކަށް އަހަރުގެ ތަފާސްހިސާބުތަކަށް ބަލާއިރު، ރާއްޖޭގެ އަހަރީ އެވްރެޖް ހޫނުމިން ދަނީ މަޑުމަޑުން މަތިވަމުންނެވެ. މެޓް އޮފީހުގެ ހިސާބުތަކުން ދައްކާ ގޮތުގައި، ކޮންމެ ދިހަ އަހަރަކުން ރާއްޖޭގެ ހޫނުމިން ގާތްގަނޑަކަށް 0.1°C އާއި 0.2°C އާ ދެމެދުގެ މިންވަރަކަށް މަތިވެއެވެ. ފަހަކަށް އައިސް ފާހަގަކުރެވުނު އެންމެ ހޫނު އަހަރުތަކަކީ 2016، 2019 އަދި 2023 އެވެ. މިއީ ދުނިޔޭގެ ނިސްބަތުންވެސް އެންމެ ހޫނުގަދަވި އަހަރުތަކެވެ. މިގޮތަށް މަތިވާ ކޮންމެ މަތިވުމަކީ ކަރަންޓު ބޭނުން ކުރުން މަތިވުމެވެ. މީގެ އިތުުރުން މާލެ ސަރަހައްދަށް ބަލާއިރު އާބާދީ އިތުރުވަމުން ދިއުމަކީ ކަރަންޓުގެ ޕީކް ލޯޑް މަތިވެގެންދާނެ ކަމެވެ. ރާއްޖެއަށް އެންމެ ހޫނުގަދަވާ ދުވަސްވަރު (މާޗް، އެޕްރީލް، މޭ) ކަރަންޓު ބޭނުންކުރާ މިންވަރު އާދަޔާ ހިލާފަށް މަތިވެއެވެ..
އެހެންވެ ސްޓެލްކޯއިން މި އަހަރުވެސް ދުރާލާ ވަނީ ޕީކް ލޯޑަށް ތައްޔާރުވެފަ އެވެ. އަދި ހުޅުމާލޭގެ ދެވަނަ ފިޔަވަހީގައި މީހުން އާބާދުވާން ފެށުމާއެކު، މުޅި ގްރޭޓާ މާލެ ސަރަހައްދުގެ ޖުމްލަ ލޯޑަށް ބޮޑު ބަދަލެއް އައިސްފައިވެ އެވެ. މާލެ ސަރަހައްދުގައި އަހަރަކު ގާތްގަނޑަކަށް 5% - 7% އިތުރުވުމެއް ކަރަންޓް ބޭނުން ކުރުން މަތިވެ އެވެ. 

ހަގީގަތަކީ ޕީކް ލޯޑަށް ތައްޔާރުވުމަކީ ސީޒަނަލް ކަމަކަށް ނުވުމެވެ. ރާއްޖޭގައި ކަރަންޓުގެ ހިދުމަތްދޭ ގޮތުން ކޮންމެ ފަސް އަހަރަކުން ކަރަންޓުގެ މެގަ މަަޝްރޫއެއް ހިންގަން ޖެހެ އެވެ. މިކަން އެނގެނީ އަހަރުން އަހަރަށް ކަރަންޓު ބޭނުން ކުރާ މިންވަރު އިތުރު ވެގެން ދިއުމެވެ.

މި އިތުރުވަމުންދާ ޑިމާންޑަށް ކޭޓާ ކުރުމަށްޓަކައި ސްޓެލްކޯއިން ދަނީ "ފިފްތު ޕަވަރ ޕްރޮޖެކްޓް" ފަދަ ބޮޑެތި މަޝްރޫއުތައް ހިންގަމުންނެވެ. ނަމަވެސް މިދިޔަ ސަރުކާރުން އެ މަޝްރޫއު ހިންގާފައި ނުވުމުން މި އަހަރު ސްޓެލްކޯއިން ވަނީ ޕީކް ލޯޑަށް ކުރަން ޖެހޭ މަސައްކަތް ޑަބަލްވެފަ އެވެ. މި އަހަރުވެސް އިތުރު ޖަނަރޭޓުތަކެއް ރަށްރަަށް ފޮނުމުގެ އިތުރުން ސްޓެލްކޯއިން ވަނީ މާލެ ސަރަހައްދުގައި ވެސް ކުދި ޖަނަރޭޓަރު ތަކެއް ގެނެސްފަ އެވެ. މި އިންޖީނުތަކުގެ ބޭނުމަކީ އެންމެ ޕީކް ދުވަސްވަރު ކަމަށްވާ ހޫނު މޫސުމުގައި ކަރަންޓުގެ ލޯޑް ހިފެހެެއްޓުމެވެ.