މިއީ ހޫނު މޫސުން | އެންމެ ސަމާލުވާންވީ އޭސީއަށް

ރާއްޖޭގެ އެންމެ ހޫނުގަދަ މޫސުން މިވަނީ ފެށިފަ އެވެ. ކަރަންޓު ބިލް ބޮޑު ވެގެން އެންމެންގެ ޝަކުވާ ބޮޑުވަނީ ވެސް މި ދުވަސްވަރެވެ. އެހެންވެ މި ދުވަސް ވަރަކީ އެންމެ ބޮޑަށް ކަރަންޓް އިގްތިސޯދު ކުރުމަށް މަސައްކަތް ކުރަން ޖެހޭ ދުވަސްވަރެވެ. މިގޮތުން އެންމެ ބޮޑަށް ސަމާލުކަން ދޭން ޖެހޭނީ ގޭގައި ބަހައްޓާފައި ހުންނަ އެއާކޮންޝަން ނުވަތަ އޭސީއަށެވެ. ސަބަބަކީ އޭސީއަކީ އެންމެ ބޮޑަށް ކަރަންޓް ނަގާ އެއްޗަށްވުމެވެ. ނަމަވެސް ގިނަ މީހުންނަށްވާ ގޮތަކީ އޭސީއަށް މާކަބޮޑު ސަމާލުކަމެއް ނުދެވެ އެވެ. މީގެ ނަތީޖާއަކީ ކޮޓަރި އާދަޔާ ހިލާފަށް ފިނިކޮށްލިނަމަވެސް ކަރަންޓު ބިލް ބޮޑު ވެގެން ދިއުމެވެ. 

ގިނަ ބަޔަކަށް ހީވަނީ އޭސީ 16 ޑިގްސީ ސެލްސިއެސްއަށް ނުވަތަ 18 އަށް ލުމުން ކޮޓަރި އަވަހަށް ފިނިވާނެ ކަމަށެވެ. ނަމަވެސް، މީގެ ސަބަބުން ކޮމްޕްރެސަރު މެދުނުކެނޑި ބާރަށް މަސައްކަތް ކުރަން ޖެހި، ބޮޑު ކަރަންޓެއް ހޭދަވެ އެވެ. ރާއްޖެ ފަދަ ހޫނު ގައުމެއްގައި އެންމެ އެކަށީގެންވަނީ 24 ޑިގްރީ ސެލްސިއެއް ނުވަތަ 25 އެވެ. މީގެ އިތުރުން ގިނަ ބަޔަކު ފަރުވާ ކުޑަކުރާ ކަމަކީ އޭސީގެ ސާފުކޮށް ބެލެހެއްޓުމެވެ. ބައެއް މީހުން އޭސީގެ އެެތޭގައި އިންނަ ފިލްޓަރު ސާފުނުކޮށް އަހަރު ދެ އަހަރުދެ އެވެ. މިއީ ކަރަންޓު ބިލް ބޮޑު ވެގެންދާނެ ކަމެކެވެ. އޭސީގެ ފިލްޓަރާއި އިންޑޯ / އައުޓްޑޯ ޔުނިޓްގައި ހިރަފުސް ޖަމާވުމުން، ވައި ދައުރުވުމަށް ހުރަސްއެޅެ އެވެ. އޭރުން އޭސީން ފިނިކޮށްދޭން ކުރަންޖެހޭ މަސައްކަތް ދެގުނަވެ، ކަރަންޓު ހޭދަވާ މިންވަރު 15% އަށް ވުރެ އިތުރުވެ އެވެ. އެހެންވެ އެންމެ މަދުވެގެން އަހަރު އެއްފަހަރު ބޮޑު ސާވިސްއެއް އަދި މަހަކު އެއްފަހަރު ފިލްޓަރު ސާފުކުރުން މުހިންމެވެ. މީގެ އިތުރުން ބޮޑު ކޮޓަރިއަކަށް ކުޑަ އޭސީއެއް ހަރުކޮށްފިނަމަ، ކޮޓަރި ފިނިކުރުމަށްޓަކައި އޭސީގެ ކޮމްޕްރެސަރު ދުވަހަކުވެސް މަޑެއް ނުވާނެއެވެ. މީގެ ސަބަބުން އިންވާޓަރ އޭސީއެއްގެ ފައިދާވެސް ނުލިބި ބިލު ބޮޑުވެއެވެ.

ކޮޓަރީގެ ދޮރުތަކާއި ކުޑަދޮރުތައް ރަނގަޅަށް ބަންދުނުވުމާއި، ދޮރުގެ ދަށުން ވައި ވަންނަ ތަންތަން ހުރުމުން ފިނި ބޭރުވެއެވެ. މީގެ އިތުރުން ސީލިންގުގައި ހުންނަ ލޯވަޅުތަކުން ހޫނު ވައި ވަންނަނަމަވެސް އޭސީން ކުރަންޖެހޭ މަސައްކަތް އިތުރުވެއެވެ. ބައެއް ބޯދާ އޭސީތަކަކީ "އޮން-އޮފް" ޓެކްނޮލޮޖީ ބޭނުންކުރާ އެއްޗިއްސެވެ. މީގެ ކޮމްޕްރެސަރު ކޮންމެ ފަހަރަކު ފަށައިގަންނައިރު ވަރަށް ގިނަ ކަރަންޓު ނަގައެވެ. އިންވާޓަރ އޭސީއަކަށް ބަދަލުކޮށްލުމުން ބިލުން ގާތްގަނޑަކަށް 40% ސަލާމަތް ކުރެވިދާނެއެވެ.

ކަރަންޓު އިގްތިސާދު ކުރަން ކުރެވިދާނެ ކަންތައްތައް - އޭސީއާއެކު ސީލިންގް ފަންކާ މަޑު ދުވެލީގައި ޖައްސާފައި ބެހެއްޓުމުން ފިނިވައި މުޅި ކޮޓަރިއަށް އަވަހަށް ފެތުރި، އޭސީއަށް ލުއިވެއެވެ. އަދި ނިދާފައި އޮންނަ ވަގުތު، ފަތިސްވާންވާއިރަށް އޭސީ އޮޓޯއިން ނިވޭ ގޮތަށް ސެޓްކުރުން މުހިންމެވެ. އަދި ދުވާލު ގަޑީގައި އިރުގެ އަލި ސީދާ ކޮޓަރިއަށް ވަންނަނަމަ، ބޯ ދޮރުފޮތި ބޭނުންކޮށްގެން ހޫނުވުން ކުޑަކުރުން މުހިންމެވެ.