އިހުލާސްތެރި މުސްލިމެއްގެ ހައިސިއްޔަތުން ޚާމަނާއީ އަވަހާރަކޮށްލުން ކުށްވެރިކުރަން: ރައީސް މައުމޫން

އެމެރިކާއާ ގުޅިގެން އިޒްރޭލުން މިދިޔަ ހޮނިހިރު ދުވަހު އީރާނަށް ދޭން ފެށި ހަމަލާތަކުގައި، އީރާނުގެ ރޫހާނީ ލީޑަރު އާޔަތުﷲ އަލް ޚާމަނާއީ އަވަހާރަ ކޮށްލުމާ ގުޅިގެން ކުރީގެ ރައީސް ރައީސް މައުމޫން އަބްދުލްގައްޔޫމް ތައުޒިޔާ ވިދާޅުވެއްޖެ އެވެ.

މައުމޫން ރޭ އެކްސްގައި ކުރެއްވި ޕޯސްޓެއްގައި ވިދާޅުވީ 'އިހުލާސްތެރި މުސްލިމެއްގެ ހައިސިއްޔަތުން' ރަހުމްކުޑަކޮށް ޚާމަނާއީ އަވަހާރަކޮށްލުން ކުށްވެރި ކުރައްވާ ކަމަށެވެ. 

މި ހިތާމައިގައި ޚާމަނާއީގެ ފުރާނައަށް ރަހުމަތް ލައްވައި އާއިލާ އާއި އީރާނުގެ ރައްޔިތުންނަށް ކެތްތެރިކަން ދެއްވުމަށް ވެސް ރައީސް މައުމޫންގެ ޕޯސްޓުގައި ލިޔުއްވާފައިވެ އެވެ.

އިޒްރޭލާއި އެމެރިކާ ގުޅިގެން އީރާނަށް ދޭން ފެށި ހަމަލާތަކާ ގުޅިގެން، މެދުއިރުމަތީގެ އެކި ގައުމުތަކުގައި އެމެރިކާއިން ގާއިމުކޮށްފައިހުރި އަސްކަރީ މަރުކަޒުތަކަށް އަމާޒުކޮށް، އީރާނުން ވެސް ވަނީ ރައްދު ހަމަލާތައް ދެމުންނެވެ.

އީރާނުގެ ދައުލަތުގެ މީޑިއާއިން ބުނި ގޮތުގައި، އެ ހަމަލާތަކުގައި، ޚާމަނާއީގެ އިތުރުން އެމަނިކުފާނުގެ އަންހެން ދަރިފުޅާއި، ދަނބިދަރިފުޅު އަދި ކާފަދަރިފުޅު ވެސް ވަނީ ޝަހީދުވެފަ އެވެ.

ޚާމަނާއީ އަވަހާރަކޮށްލުން ދިވެހި ސަރުކާރުން ކުށްވެރިކޮށްފައެއް ނުވެ އެވެ. އަދި ރަސްމީކޮށް ތައުޒިޔާ ކިޔައިފައެއް ވެސް ނުވެ އެވެ. މީގެ ކުރިން އީރާނުގެ ރައީސުން އަވަހާރަވުމާ ގުޅިގެން ބައިދަނޑިއަށް ދިދަ ތިރިކުރި ނަމަވެސް މިފަހަރު އެ އުސޫލަށް އަމަލުކޮށްފައެއް ނުވެ އެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ޑރ. މުހައްމަދު މުއިއްޒު ވިދާޅުވެފައި ވަނީ މި ހަނގުރާމައިގައި ބައިވެރިވާ އެއްވެސް ގައުމެއް ރަނގަޅު ނޫން ކަމަށެވެ. ވިދާޅުވީ، "ވަރަށް ބޮޑު ގޯސްކަމެއް ހަމަލާ ދޭ ހުރިހާ ގައުމަކުންވެސް އެކުރަނީ،" މިހެންނެވެ.

އެ ނޫސްވެރިންގެ ބައްދަލުވުމުގައި ގިނަ ނޫސްވެރިން ވަނީ އެކަމާ ގުޅޭ ގޮތުން އެމަނިކުފާނާ ސުވާލު ކޮށްފަ އެވެ. ނަމަވެސް ޚާމަނާއީ އަވަހާރަވުމާ ގުޅިގެން ވަކިން އެއްޗެއް ވިދާޅެއް ނުވެ އެވެ. އެމަނިކުފާނު އަވަހާރަކޮށްލުން ކުށްވެރިކުރަންތޯ ނޫސްވެރިއަކު ސުވާލު ކުރުމުންވެސް އެކަމަށް ވަކި އެއްޗެއް ރައީސް ވިދާޅެއް ނުވި އެވެ.