ސަބަބު ނޭނގި އެމެރިކާގެ ހަނގުރާމަ މަތީ ބޯޓުތަކެއް ވެއްޓިއްޖެ

ވެއްޓޭ ސަބަބު ނޭނގި އެމެރިކާގެ ގިނަ އަދަދެއްގެ ހަނގުރާމަ މަތީ މަތިންދާ ބޯޓުތަކެއް ކުވެއިތުގައި ވެއްޓިއްޖެ އެވެ. 

ކުވެއިތުގެ ޑިފެންސް މިނިސްޓްރީން ނެރުނު ބަޔާނެއްގައި ބުނީ އެމެރިކާގެ އަސްކަރީ "އެތައް" މަތިންދާބޯޓެއް މިއަދު ވެއްޓިފައިވާ ކަމަށް އެ ގައުމުގެ ޑިފެންސް މިނިސްޓްރީން ހާމަކޮށްފިއެވެ. ނަމަވެސް، މި ހާދިސާގައި އެއްވެސް މީހަކު މަރުވެފައި ނުވާ ކަމަށާއި، ހުރިހާ ފަޅުވެރިން ސަލާމަތުން ތިބި ކަމަށް އެ މިނިސްޓްރީން ބުނެއެވެ.

ކުވެއިތުގެ ޑިފެންސް މިނިސްޓްރީގެ ތަރުޖަމާނު ކާނަލް ސައީދު އަލް-އަތުވާން ނެރުއްވި ބަޔާނެއްގައި ވިދާޅުވީ، ބޯޓުތައް ވެއްޓުމާއެކު ސާޗް އެންޑް ރެސްކިއު އޮޕަރޭޝަނެއް ވަގުތުން ފަށާފައިވާ ކަމަށެވެ. ވެއްޓުނު ބޯޓުތަކުގެ ފަޅުވެރިން މިހާރު ވަނީ ހޮސްޕިޓަލަށް ގެންގޮސް ފަރުވާ ދޭން ފަށާފައެވެ. އެ އެންމެންގެ ހާލުވެސް "ސްޓޭބަލް" ކަމަށް މިނިސްޓްރީން މައުލޫމާތުދެއެވެ.

ސީ.އެން.އެން އިން އާންމުކޮށްފައިވާ ވީޑިއޯތަކުން ފެންނަ ގޮތުގައި، ވެއްޓުނު ބޯޓުތަކުގެ ތެރޭގައި F-15 މަރުކާގެ ހަނގުރާމަމަތީ ޖެޓެއް ހިމެނެ އެވެ. މި ޖެޓް ވެއްޓިފައިވަނީ ކުވެއިތުގައި ހުންނަ އެމެރިކާގެ "އަލީ އަލް ސާލިމް" އެއާބޭސްއާ 10 ކިލޯމީޓަރު ދުރަށެވެ. 

ވީޑިއޯއިން ފެންނަނީ ބޯޓުގައި ރޯވެ، ކޮންޓްރޯލުން ނެއްޓިގެން ބިންމައްޗަށް ވެއްޓޭ މަންޒަރާއި، ޕައިލެޓް ޕެރަޝޫޓެއްގައި ފައިބާ މަންޒަރެވެ.

މި ބޯޓުތައް ވެއްޓެން މެދުވެރިވި ސީދާ ސަބަބެއް އަދި ކަށަވަރެއް ނުވެއެވެ. ނަމަވެސް މި ހާދިސާ ހިނގާފައިވަނީ މެދުއިރުމަތީގައި މަސްރަހު ވަރަށް ބޮޑަށް ގޯސްވެ، އީރާނާއި އެމެރިކާ / އިސްރާއީލާ ދެމެދު ހަނގުރާމައެއް ފެށިފައިވާ ދަނޑިވަޅެއްގަ އެވެ. 

ބައެއް ރިޕޯޓުތައް ބުނާގޮތުގައި އީރާނުން ވަނީ އެމެރިކާގެ ބޯޓެއް ވައްޓާލި ކަމަށް ދައުވާކޮށްފައެވެ. އަދި މިއީ އެމެރިކާގެ އަމިއްލަ ދިފާއީ ނިޒާމުން "އޮޅުމަކުން" ދިން ހަމަލާއެއް ކަމަށް ވެސް ބައެއް ފަރާތްތަކުން ލަފާކުރެ އެވެ.