ރާއްޖެއާ ގުޅުން ކަނޑާލަން މޮރިޝަސްގެ "ތާކުންތާކުނުޖެހޭ" ނިންމުމަށް ރައީސްގެ ފާޑުކިޔުން
ރައީސް ވިދާޅުވީ، މޮރިޝަސްއިން އެ ނިންމުން ނިންމާފައިވަނީ ރާއްޖެ އާ އެއްވެސް މަޝްވަރާއެއް ކުރުމެއްނެތި ކަމަށާއި، އެ ނިންމުން ނިންމިޔަސް، ޗާގޯސް ހޯދަން ރާއްޖޭން މިހާރު ފަށާފައިވާ މަސައްކަތް ހުއްޓައިނުލާނެ ކަމަށެވެ.
ޗާގޯސް ޖަޒީރާ ރަށްތަކުގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ގަބޫލުކުރަން ރާއްޖޭން ދެކޮޅު ހަދާ ކަމަށް ބުނެ، ރާއްޖެއާއެކު އޮތް ހާރިޖީ ގުޅުން ވަގުތީ ގޮތުން ކަނޑައިލަން މޮރިޝަސްއިން ނިންމި ނިންމުމަކީ "ތާކުންތާކު ނުޖެހޭ" ނިންމުމެއްގެ ގޮތުގައި ރައީސް ޑރ. މުހައްމަދު މުއިއްޒު މިއަދު ސިފަކުރައްވައިފި އެވެ.
މޮރިޝަސްގެ ކެބިނެޓުން އެ ނިންމުން ނިންމީ، ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ގަބޫލުނުކުރުމުގެ އިތުރުން، އެތަނާ ގުޅޭގޮތުން އިނގިރޭސި ސަރުކާރާ އެކު ސޮއިކުރަން މަސައްކަތް ކުރާ އެއްބަސްވުމަށް ވެސް ރާއްޖޭން އިއުތިރާޒް ކުރާ ކަމަށް ބުނެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭގޮތުން ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، މޮރިޝަސްގެ އެ ނިންމުމުން ހަގީގަތް ބަދަލުނުވާނެ ކަމަށެވެ.
"މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަކީ ވަރަށް ތާކުންތާކު ނުޖެހޭ ވަރަށް އިމެޗުއާ، ނައީވް ކަމެއް. އެ ނިންމުން އެހެން ނިންމުމަކުންނެއް ހަގީގަތް ބަދަލެއް ނުވޭ. ރާއްޖެއާ ސިޔާސީ ގުޅުން ކަނޑާލިޔަސް މޮރިޝަސްއަށް ހައްގު ނޫން ތަނެއް މޮރިޝަސްއަށް ހައްގެއް ނުވާނެ،" އެ މަނިކުފާނު ވިދާޅުވި އެވެ.
ރައީސް ވިދާޅުވީ، މޮރިޝަސްއިން އެ ނިންމުން ނިންމާފައިވަނީ ރާއްޖެ އާ އެއްވެސް މަޝްވަރާއެއް ކުރުމެއްނެތި ކަމަށާއި، އެ ނިންމުން ނިންމިޔަސް، ޗާގޯސް ހޯދަން ރާއްޖޭން މިހާރު ފަށާފައިވާ މަސައްކަތް ހުއްޓައިނުލާނެ ކަމަށެވެ.
ރައީސް މުއިއްޒު ވިދާޅުވީ ޗާގޯސް ނުވަތަ ފޯޅަވައްސަކީ މީގެ އެތައް ގަރުނެއް ކުރިން ރާއްޖޭގެ ތަނެއް ކަމަށް ތާރީހީ އެކި ފޮތްތަކުގައި ވެސް ލިޔެވިފައި އެބަހުރި ކަމަށެވެ.
އެހެންކަމުން، އެ ތަން ހައްގުވެރި ގައުމަކާ ހަވާލުކުރަންޏާ، އެ ތަން ހަވާލުކުރަންޖެހޭ ގައުމަކީ ރާއްޖެ ކަމަށް އެ މަނިކުފާނު ވިދާޅުވި އެވެ.
"އިނގިރޭސި ސަރުކާރުގެ ބާރުގެ ދަށުގަ އެ ތަން ބާއްވަންޏާ އެއީ އަދި ވަކި އިޝޫއެއް. އެކަމަކު އިނގިރޭސި ސަރުކާރުން އެ ތަން އެއްވެސް ގައުމަކާ ހަވާލުކުރަންޏާ، ހަމައެކަނި އޮތް ގައުމަކީ ދިވެހިރާއްޖެ،" ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި، އިނގިރޭސި ސަރުކާރުން ޗާގޯސް މޮރިޝަސްއާ ހަވާލުކުރަން ނިންމި ނިންމުމާ ދެކޮޅަށް ރާއްޖޭން ވަނީ މަސައްކަތް ފަށައިފަ އެވެ.
މިގޮތުން، ބައިނަލްއަގުވާމީ މިންގަނޑުގެ ތެރެއިން އެ މައްސަލަ ހުށަހަޅަންޖެހޭ ފަރާތްތަކަށް ހުށަހަޅާނެކަމަށް ވެސް ރައީސް މިއަދު ވިދާޅުވި އެވެ.
ކޮމެންޓް
Republic of Maldives