ތެލާއި ކާބޯތަކެތީގެ ދަތިކަމެއް އަދި ނެތް: ރައީސް

މެދުއިރުމަތީގައި ހިންގަމުންދާ ހަނގުރާމަ އާ ގުޅިގެން ރާއްޖެ އަށް ތެލާއި ކާބޯތަކެތީގެ ދަތިކަމެއް އަދި ކުރިމަތިވެފައި ނުވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ ތެލާއި ކާބޯތަކެތީގެ ކަންބޮޑުވުމެއް އަދި ނެތް ކަމަށެވެ.

"އިރާދަކުރެއްވިއްޔާ ވަރަށް ރަނގަޅަށް އޮތީ ހަމަޖެހިފައި. ކުރިޔަށް އޮތް ދުވަސްތަކުގައި [ތެލާއި ކާބޯތަކެތި] ނުލިބޭނެ ކަހަލަ ގޮތަކަށް ނުވަތަ ކަންބޮޑުވާން ޖެހޭ ގޮތަކަށް ނެތް." ރައީސް ވިދާޅުވި އެވެ.

ހަނގުރާމައިގެ ސަބަބުން ޓޫރިޒަމް އާއި ތެލާއި އަދި ކާބޯތަކެތީގެ ދާއިރާ އިން ލިބޭ ގެއްލުން ކުޑަ ކުރުމަށް ފިޔަވަޅުތަކެއް އަޅަމުން އަންނަ ކަމަށް ރައީސް ވިދާޅުވި އެވެ.

އެގޮތުން މިދިޔަ ހޮނިހިރު ދުވަހު އޮމާންގެ ބޯޓެއް ތެލުގެ އާ ޝިޕްމަންޓެއް ހިފައިގެން ރާއްޖެ ދަތުރު ފަށާފައިވާ ކަމަށައި އިތުރު ޝިޕްމަންޓެއް ހޯދުމުގެ މަސައްކަތް ވެސް ފަށާފައިވާ ކަމަށް އެމަނިކުފާނު ވިދާޅުވި އެވެ. 

އެމެރިކާ އާއި އިޒްރޭލް ގުޅިގެން އިރާނަށް ދެމުން ގެންދާ ހަމަލާތަކުގައި އިނގިރޭސިވިލާތުން ވެސް ވަނީ އެހީތެރިކަން ފޯރު ކޮށްދޭން ނިންމައިފަ އެވެ. އެ ހަމަލާތަކާ ގުޅިގެން އިރާނުން އަންނަނީ މެދުއިރުމަތީގެ އަރަބި ގައުމުތަކުގައި ހުރި އެމެރިކާގެ ބޭސްތަކަށް ހަމަލާ ދެމުންނެވެ.