ތެލުގެ އަގު އުފުލި ފީފާއެއް 100 ޑޮލަރަށް އެރުމުގެ ބިރު

މެދުއިރުމަތީގެ މަސްރަހު ގޯސްވެ، ތެޔޮ އެކްސްޕޯޓްކުރާ މުހިންމު މަގުތަކަށް ހުރަސްއެޅުމުގެ ބިރު ބޮޑުވުމާއެކު، ދުނިޔޭގެ ބާޒާރުގައި ސާފުނުކުރާ ތެލުގެ އަގު އުފުލި 100 ޑޮލަަރަށް ތެޔޮ ފީފާއެއް އަރައިފާނެ ކަމަށް ބެލެވިއްޖެ އެވެ. 

ތެލުގެ އަގަށް އަންނަ ބަދަލު ދިރާސާ ކުރާ ފަރާތްތަކުން ބުނެފައިވާ ގޮތުން މިހާރު 70 ޑޮލަރުގައި ހުރި ނަމަވެސް މި ހާލަތުން ތެޔޮ ފީފާއެއްގެ އަގު 100 ޑޮލަރާ ހަމައަށް އެެރުމުގެ ބިރު އެބައޮތެވެ. 

ވެސްޓް ޓެކްސަސް އިންޓަމީޑިއަޓް (ޑަބްލިއުއައިޓީ) - ފާއިތުވި ހުކުރު ދުވަހު ހުރި 67 ޑޮލަރުން، 7.3 އިންސައްތަ އިތުރުވެ، ފީފާއެއްގެ އަގު މިހާރު ހުރީ 72 ޑޮލަރުގަ އެވެ.
ބްރެންޓް ކްރޫޑް - ބައިނަލްއަގުވާމީ މިންގަނޑެއް ކަމަށް ބަލާ ބްރެންޓް ކްރޫޑްގެ އަގު 7.8 އިންސައްތަ މައްޗަށް ގޮސް، ފީފާއެއްގެ އަގު ވަނީ 78.55 ޑޮލަރަށް އަރާފަ އެވެ.

ތެލުގެ އަގު މިހާ ބޮޑަށް އުފުލެން މެދުވެރިވި އެންމެ ބޮޑު ސަބަބަކީ ސްޓްރެއިޓް އޮފް ހޯރްމޫޒް މެދުވެރިކޮށް ތެޔޮ އުފުލުމަށް ހުރަސްތަކެއް ކުރިމަތިވުމެވެ. ދުނިޔޭގައި އުފައްދާ ތެލުގެ ގާތްގަނޑަކަށް 20 އިންސައްތަ (ދުވާލަކު 15 މިލިއަން ފީފާ) ދަތުރުކުރަނީ މި ހަނި ސަރަހައްދުންނެވެ. ސައުދީ އަރަބިއްޔާ، ކުވައިތު، އިރާގު، ގަތަރު އަދި ޔޫއޭއީ ފަދަ ގައުމުތަކުން ބޭރު ދުނިޔެއަށް ތެޔޮ ބޭރުކުރާ މައިގަނޑު މަގަކީ މިއެވެ.

ބާޒާރުގެ ނުތަނަވަސްކަން ކުޑަކުރުމުގެ ގޮތުން ސައުދީ އަރަބިއްޔާ އާއި ރަޝިއާ ހިމެނޭހެން އަށް ގައުމަކުން ވަނީ އޭޕްރީލް މަހުން ފެށިގެން ދުވާލަކު 206,000 ފީފާ އިތުރަށް އުފެއްދުމަށް ނިންމާފަ އެވެ. ނަމަވެސް، މާހިރުން ބުނާ ގޮތުގައި ތެޔޮ އުފުލާ މަގުތައް ބަންދުވެއްޖެނަމަ، އުފައްދާ މިންވަރު އިތުރުކުރުމަކުން ބާޒާރަށް މާބޮޑު ލުޔެއް ނުލިބޭނެއެވެ.