އެއްވެސް ގައުމަކާ ހަވާލުކުރަންޏާ، ޗާގޯސް ހަވާލުކުރަންޖެހޭނީ ރާއްޖެއާ: ރައީސް

ޗާގޯސްގެ ޖަޒީރާ ރަށްތައް އެއްވެސް ގައުމަކާ ހަވާލުކުރަންޏާ، އެތަން ހަވާލުކުރަންޖެހޭނީ ރާއްޖެއާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ޗާގޯސް އާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ޗާގޯސް ނުވަތަ ފޯޅަވައްސަކީ މީގެ އެތައް ގަރުނެއް ކުރިން ރާއްޖޭގެ ތަނެއް ކަމަށް ތާރީހީ އެކި ފޮތްތަކުގައި ވެސް ލިޔެވިފައި އެބަހުރި ކަމަށެވެ. 

އެހެންކަމުން، އެ ތަން ހައްގުވެރި ގައުމަކާ ހަވާލުކުރަންޏާ، އެ ތަން ހަވާލުކުރަންޖެހޭ ގައުމަކީ ރާއްޖެ ކަމަށް އެ މަނިކުފާނު ވިދާޅުވި އެވެ.

"އިނގިރޭސި ސަރުކާރުގެ ބާރުގެ ދަށުގަ އެ ތަން ބާއްވަންޏާ އެއީ އަދި ވަކި އިޝޫއެއް. އެކަމަކު އިނގިރޭސި ސަރުކާރުން އެ ތަން އެއްވެސް ގައުމަކާ ހަވާލުކުރަންޏާ، ހަމައެކަނި އޮތް ގައުމަކީ ދިވެހިރާއްޖެ،" ރައީސް ވިދާޅުވި އެވެ. 

އެ މަނިކުފާނު ވިދާޅުވި ގޮތުގައި، އިނގިރޭސި ސަރުކާރުން ޗާގޯސް މޮރިޝަސްއާ ހަވާލުކުރަން ނިންމި ނިންމުމާ ދެކޮޅަށް ރާއްޖޭން ވަނީ މަސައްކަތް ފަށައިފަ އެވެ.

މިގޮތުން، ބައިނަލްއަގުވާމީ މިންގަނޑުގެ ތެރެއިން އެ މައްސަލަ ހުށަހަޅަންޖެހޭ ފަރާތްތަކަށް ހުށަހަޅާނެކަމަށް ވެސް ރައީސް މިއަދު ވިދާޅުވި އެވެ. 

ރައީސް ވަނީ ރާއްޖޭގެ ކަނޑުން ގެއްލުނު ބައި ހޯދައި، ޗާގޯސް ރާއްޖެއަށް ހޯދަން ވެސް އިނގިރޭސިވިލާތުގެ ސަރުކާރާ އެކު މަޝްވަރާތައް ކުރަމުން އަންނަކަން ހާމަކުރައްވައިފަ އެވެ. 

އެގޮތުން، މޮރިޝަސްއަށް ވުރެ ޗާގޯސް ހައްގީ ރާއްޖެއަށް ކަމަށް ބަޔާންކޮށް އިނގިރޭސިވިލާތުގެ ސަރުކާރަށް ދެ ސިޓީއެއް ފޮނުވައި، އެ ގައުމުގެ ޑެޕިއުޓީ ޕްރައިމް މިނިސްޓަރާ އެކު ފޯނު ކޯލަކުން މަޝްވަރާ ކުރައްވާފައިވާ ކަން ރައީސް ފާހަގަކުރެއްވި އެވެ.

ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ގަބޫލުކުރަން ރާއްޖޭން ދެކޮޅު ހަދާ ކަމަށް ބުނެ، ރާއްޖެއާއެކު އޮތް ހާރިޖީ ގުޅުން ވަގުތީ ގޮތުން ކަނޑައިލަން މޮރިޝަސްގެ ސަރުކާރުން ވަނީ ނިންމައިފަ އެވެ.

މޮރިޝަސްގެ ސަރުކާރުގެ މި ނިންމުން އައިސްފައިވަނީ، ކުރީގެ ސަރުކާރުން މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީ އަނބުރާ ގެންނަން ނިންމަވާފައިވާ ކަމަށާއި، އަދި ރާއްޖެ އާއި ޗާގޯސް އާދެމެދު އޮންނަ ކަނޑުގެ އިން ކަނޑައެޅުމަށް އިންޓްނޭޝަނަލް ޓްރައިބިއުނަލް އޮފް ލޯ އެންޑް ސީ (އިޓްލޮސް) އިން ނިންމި ނިންމުން ބަލައިނުގަންނަން ނިންމާފައިވާ ކަމަށް ރައީސް މުއިއްޒު އިއުލާނުކުރައްވާފައިވަނިކޮށެވެ. 

މީގެއިތުރުން، ޗާގޯސް މައްސަލައިގައި ކުރީގެ ސަރުކާރުން އިޓްލޮސްގައި ނެގި ސްޓޭންޑުތަކުގެ ސަބަބުން ރާއްޖެއަށް ބޮޑެތި ގެއްލުންތަކެއް ވެފައިވާ ކަމަށާއި، އެ ސްޓޭންޑުތައް ނެގި ސަބަބު އޮޅުން ފިލުވުމަށާއި ފިޔަވަޅެއް އަޅަންޖެހޭނެ ފިޔަވަޅެއް އެޅުމަށް އިންކުއަރީ ކޮމިޝަނެއް ހަދަން ނިންމާފައިވާ ކަމަށް އެ މަނިކުފާނު ވަނީ ވިދާޅުވެފަ އެވެ.

މޮރިޝަސްއިން ރާއްޖެ އާއެކު ހާރިޖީ ގުޅުން ކަނޑައިލުމަކީ، ތާކުންތާކުނުޖެހޭ "ނައީވް އަދި އިމެޗުއާ" ނިންމުމެއް ގޮތުގައި ރައީސް މިއަދު ވަނީ ސިފަކުރައްވައިފަ އެވެ.