ވީއައިއޭ ތައްޔާރީ ހާލަތުގައި | ޑޮމެސްޓިކް ޓާމިނަލްގައި ހާއްސަ ސެންޓަރެއް

މެދުއިރުމަތީގެ ވައިގެ ބޮޑު ސަރަހައްދެއް ބަންދުކުރުމާއި ގުޅިގެން ގިނަ އަދަދެއްގެ ފްލައިޓްތައް ކެންސަލްވެ، ދިމާވެފައިވާ މައްސަލަތަކާ ގުޅިގެން ވެލާނާ އިންޓަނޭޝަނަލް ޓާމިނަލް ތައްޔާރީ ހާލަތަށް ގެނެސް ޑޮމެސްޓިކް ޓާމިނަލްގައި ހާއްސަ ސެންޓަރެއް ގާއިމްކޮށްފި އެވެ.

އެމްއޭސީއެލް އިން ނެރެފައިވާ ނޫސް ބަޔާނެއްގައި ބުނީ މެދުއިރުމަތީގެ ބައެއް ޤައުމުތަކުގެ ވައިގެ ސަރަޙައްދު ބަންދުކުރުމުގެ ސަބަބުން ފަސިންޖަރުންނަށް ދިމާވެފައިވާ ދަތިތަކަށް ހައްލު ހޯދައިދިނުމުގެ ގޮތުން އެމްއޭސީއެލް އިން މި އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މިމަހުގެ 28 ވަނަ ދުވަހުން ފެށިގެން ވީއައިއޭގައި ޑިސްރަޕްޝަން މެނޭޖްމެންޓް ސެންޓަރެއް ޤާއިމްކުރެވި ހިދުމަތް ފޯރުކޮށްދިނުމުގެ މަސައްކަތް ވަނީ ފެށިފައިވެ އެވެ.

އެ ކުންފުނިން ބުނީ މި މަސައްކަތުގެ ތެރެއިން ފަސިންޖަރުންނަށް ލުއިފަސޭހަ އިންތިޒާމުތައް ހަމަޖައްސައިދިނުމަށްޓަކައި ޑޮމެސްޓިކް ޓަމިނަލް މިހާރު އަންނަނީ ބޭނުންކުރެވެމުންނެވެ. މި މަސައްކަތުގައި ކަމާގުޅުންހުރި ފަރާތްތަކުގެ އެހީތެރިކަމާއެކު، ރޭގެ ނިޔަލަށް 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށްދެވިފައިވެ އެވެ.

އެމްއޭސީއެލް އިން ބުނީ މިމަހުގެ 28 އިން ފެށިގެން ޖުމްލަ 9 ފްލައިޓެއް ކެންސަލްވެ، ގާތްގަނޑަކަށް 1,716 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވެއެވެ. އަދި މިމަހުގެ އެކަކުން ފެށިގެން 19 ފްލައިޓެއް ކެންސަލްވެ، ގާތްގަނޑަކަށް 3,530 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވެ އެވެ.

"މި ހާލަތުން އަރައިގަތުމަށްޓަކައި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓާއި، ވިޒިޓް މޯލްޑިވްސްއާއި އެއަރލައިންތަކުގެ އިތުރުން ޓުއަރ އޮޕަރޭޓަރުންނާއި ގުޅިގެން، ފަސިންޖަރުންނަށް ދިމާވާ އެކިއެކި ދަތިތައް ހައްލުކުރުމުގެ މަސައްކަތް އެމްއޭސީއެލްއިން މި އަންނަނީ ކުރަމުންނެވެ،" އެމްއޭސީއެލް ބުނެފައިވެ އެވެ.

އެމްއޭސީއެލް އިން ބުނީ ކެންސަލްވެފައިވާ ފްލައިޓުތަކުގެ އެއަރލައިންތަކަށް ޚާއްސަ ސަރވިސް ކައުންޓަރުތައް ޑޮމެސްޓިކް ޓާމިނަލްގައި ވަނީ ގާއިމުކުރެވިފަ އެވެ. އަދި ފަސިންޖަރުންނަށް އެކިއެކި އިންތިޒާމްތައް ހަމަޖައްސައިދިނުމުގައި އެއަރލައިންތަކުގެ މަންދޫބުން ހަރަކާތްތެރިވަމުން އަންނަކަން މި ފުރުސަތުގައި ފާހަގަކުރަމެވެ.