ބޮޑު ދަރަނި މިއަދު ދައްކަން ޖެހުނަސް ފައިސާ އެބަހުރި: ރައީސް

ދައުލަތުން މި އަހަރު ދައްކަން ޖެހޭ 500 މިލިއަން ޑޮލަރުގެ ބޮޑު ދަރަނި މިހާރު ވެސް ދެއްކޭ ވަރަށް ފައިސާ ހަމަވެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ސަރުކާރުން މިވަގުތު 650 މިލިއަން ޑޮލަރަށް ވުރެ ގިނަ ފައިސާ ރައްކާ ކޮށްފައިވާ ކަމަށެވެ.

އޭގެ ތެރެއިން ސޮވަރިން ޑިވަލޮޕްމަންޓް ފަންޑް (އެސްޑީއެފް) ގައި 320 މިލިއަން ޑޮލަރު އަދި ޔޫޒަބަލް ރިޒާވްގައި 330 މިލިއަން ޑޮލަރަށް ވުރެ ގިނަ ފައިސާ އެބަހުރި ކަމަށް ރައީސް ވިދާޅުވި އެވެ.

ސަރުކާރުން 500 މިލިއަން ޑޮލަރު ދައްކަން ނިންމާފައި ވަނީ އަންނަ މަހު 8 ގަ އެވެ. 

"އެއްވެސް ކަންބޮޑުވުމެއް ނެތް. މިއަދު [ސުކޫކަށް] ފައިސާ ދައްކަން ޖެހުނަސް އެ ފައިސާ އެބަހުރި." ރައީސް ވިދާޅުވި އެވެ. 

ރައީސް ވިދާޅުވި ގޮތުގައި ރާއްޖޭގެ ގްރޮސް ރިޒާވްގައި 1.27 ބިލިއަން ޑޮލަރު އެބަހުއްޓެވެ. އެއީ ތާރީހުގައި ދުވަހަކު ވެސް ގެންދެވިފައިވާ ވަރެއް ނޫން ކަމަށް އެމަނިކުފާނު ވިދާޅުވި އެވެ.

ބޭރުގެ ދަރަނީގެ އިތުރުން އެތެރޭގެ ދަރަނިތައް ވެސް މެނޭޖް ކުރަމުން އަންނަ ކަމަށް ރައީސް ވިދާޅުވި އެވެ. އެގޮތުން ދައުލަތުން އަމިއްލަ ކުންފުނިތަކަށް ދޭން ޖެހޭ ފައިސާ ދެއްކުމުގެ މަސައްކަތް ކުރަމުން އަންނަ ކަމަށާއި އަންނަ ހަފްތާގައި އެކަނި ވެސް 200 މިލިއަން ރުފިޔާ ދޫކުރައްވާނެ ކަމަށް ރައީސް ވިދާޅުވި އެވެ.