31 ހާފިޒުން ދަސްވެނިވެއްޖެ، މިހާރު ރާއްޖޭގައި 301 ހާފިޒުން އެބަތިބި

ކީރިތި ގުރުއާން ހިތުދަސްކޮށްފައިވާ ހާފިޒުން ދަސްވެނިވުމަށް މިރޭ ބޭއްވި ޖަލްސާގައި 31 ހާފިޒުން ދަސްވެނިވެއްޖެ އެވެ.

އިސްލާމިކް މިނިސްޓްރީން ބުނީ މިއަހަރަކީ މިހާތަނަށް އެންމެ ގިނަ އަދަދަކަށް ހާފިޒުން ދަސްވެނިވެނިވި ރަސްމިއްޔާތު ކަމަށެވެ. އެގޮތުން މިރޭގެ ރަސްމިއްޔާތުގައި 31 ހާފިޒުން ދަސްވެނިވެފައިވާއިރު، 50 ހާފިޒަކަށް ވަނީ ރައީސުލްޖުމުހޫރިއްޔާ ދެއްވާ މެޑައްޔާއި އިނާމު ދެއްވާފަ އެވެ.

މި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓްރު ޑރ. ޝަހީމް އަލީ ސައީދު ވިދާޅުވީ ކީރިތި ގުރުއާނަށް ހިދުމަތް ކުރުމާއި، ކީރިތި ގުރުއާން ހިތުދަސް ކުރުމުގެ ކަންތައްތައް މުޅި ރާއްޖެއަށް ފެތުރުމުގައި ރާއްޖެ ދެކެމުން މިދަނީ ވަރަށް ހެޔޮ ދުވަސްތަކެއް ކަމަށެވެ. އެގޮތުން މިދިޔަ އަހަރު ގުރުއާނުގެ އިލްމު ފެތުރުމަށް 19 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަން ފާހަގަކުރެއްވި އެވެ.

"ދިވެހިރާއްޖޭގައި ހާފިޒުންގެ އަދަދު މިހާރު ވަނީ 301 އަށް އަރާފައި. މިއީ ވަރަށް އުފާވެރި ކަމެއް. އަމާޒަކީ މި ފަސް އަހަރުގެ ތެރޭގައި ހާފިޒުންގެ އަދަދު 500 އާއި ހަމައަށް ގެންދިއުމަށް މަސައްކަތް ކުރުން. އަދި ވުޒާރާގެ ދުރު ރާސްތާ އަމާޒަކީ އިސްލާމީ ގައުމުތަކުގެ ތެރެއިން އާބާދީގެ ނިސްބަތުން ހާފިޒުންގެ އަދަދު އެންމެ ގިނަ ގައުމަށް ދިވެހިރާއްޖެ ހެދުން،" މިނިސްޓަރު ވިދާޅުވި އެވެ.

މިދިޔަ މަހުގެ ނިޔަލަށް ރާއްޖޭގައި 301 ހާފިޒުން ތިބިއިރު، އެއީ 139 އަންހެން ހާފިޒުންނާއި 162 ފިރިހެން ހާފިޒުންނެވެ. މިހާރުވެސް 1873 ދަރިވަރުން ދަނީ ގުރުއާން ހިފްޒު ކުރަމުންނެވެ.

ސަރުކާރުން މިހާރު ވަނީ ހާފިޒުންނަށް ދޭ އެލަވަންސް ވެސް ބޮޑުކޮށްފަ އެވެ. އެގޮތުން މިހާރު ހާފިޒުންނަށް ދެމުންދަނީ 4000ރ. ގެ އެލަވަންސެކެވެ. އޭގެ ކުރިން ދެމުން ދިޔައީ 2000ރ. ގެ އެލަވަންސެކެވެ.