ޗާގޯސް ހޯދަން ގާނޫނީ ގޮތުން މަސައްކަތް ފަށަން ރާއްޖޭން ތައްޔާރުވަނީ

ޗާގޯސް ޖަޒީރާ ރަށްތައް އިނގިރޭސިވިލާތުން މޮރިޝަސްއަށް ދޫކޮށްލުމަށް ނިންމާފައި ނިންމުން ހުއްޓުވުމަށް ގާނޫނީ ގޮތުން މަސައްކަތް ފެށުމަށް ތައްޔާރުވެފައިވާކަމަށް ރިޕޯޓުކޮށްފި އެވެ. 

ފޮރިން މިނިސްޓްރީގެ ތަރުޖަމާނަކު އިނގިރޭސިވިލާތުގެ ދަ ޓެލެގްރާފް ނޫހަށް ވިދާޅުވި ގޮތުގައި، އިނގިރޭސި ބޮޑުވަޒީރު ކިއާ ސްޓާމާ ޗާގޯސްގެ ސިޔާދަތީ ބާރު މޮރިޝަސްއަށް ދިނުމަށް ނިންމާފައިވާ ނިންމުމާ ދެކޮޅަށް ގާނޫނީ ގޮތުން ކުރެވެން ހުރި ކަންކަން ދިވެހި ސަރުކާރުން ދަނީ ދިރާސާ ކުރަމުންނެވެ.

އެ ނޫހުން ބުނި ގޮތުގައި، ޗާގޯސްގެ މައްޗަށް ރާއްޖޭގެ ސަރަހައްދީ ހައްގުތައް، މޮރިޝަސް އިން ކުރާ ދައުވާ އަށް ވުރެ މާ ވަރުގަދަ ދިވެހި ސަރުކާރުން ގަބޫލުކުރެ އެވެ. 

ނަން ހާމަކޮށްފައިނުވާ ތަރުޖަމާނު ވިދާޅުވީ، އިނގިރޭސިވިލާތުގެ މި ނިންމުމަކީ ބައިނަލްއަގުވާމީ ގާނޫނީ އުސޫލުތަކުގެ މައްޗަށް އެކަށީގެންވާ މިންވަރަށް ބިނާވެފައިވާ ނިންމުމެއް ނޫން ކަމަށެވެ. 

އެހެންކަމުން، ގާނޫނީ ގޮތުންނާއި ހާރިޖީ ގޮތުން ކުރެވެހެންހުރި ހުރިހާ ކަމެއް ދިވެހި ސަރުކާރުން ކުރާނެކަމުގެ ޔަގީންކަން އޭނާ ވަނީ ދެއްވައިފަ އެވެ. 

ނަމަވެސް، ޗާގޯސް ޖަޒީރާގެ ސިޔާދަތީ ބާރާ ގުޅޭގޮތުން އެއްވެސް ގައުމަކާ ދެކޮޅަށް އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) ރާއްޖެ އިން ރަސްމީކޮށް މައްސަލައެއް އަދި ހުށަހަޅާފައިނުވާ ކަމަށް އޭނާ ވިދާޅުވި އެވެ. 

ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮތް ކަމަށް ގަބޫލުކުރަން ރާއްޖޭން ދެކޮޅު ހަދާ ކަމަށް ބުނެ، ރާއްޖެއާއެކު އޮތް ހާރިޖީ ގުޅުން ވަގުތީ ގޮތުން ކަނޑައިލަން މޮރިޝަސްގެ ސަރުކާރުން ވަނީ ނިންމައިފަ އެވެ.

މޮރިޝަސްގެ ސަރުކާރުގެ މި ނިންމުން އައިސްފައިވަނީ، ކުރީގެ ސަރުކާރުން މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީ އަނބުރާ ގެންނަން ނިންމަވާފައިވާ ކަމަށާއި، އަދި ރާއްޖެ އާއި ޗާގޯސް އާދެމެދު އޮންނަ ކަނޑުގެ އިން ކަނޑައެޅުމަށް އިންޓްނޭޝަނަލް ޓްރައިބިއުނަލް އޮފް ލޯ އެންޑް ސީ (އިޓްލޮސް) އިން ނިންމި ނިންމުން ބަލައިނުގަންނަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު އިއުލާނުކުރައްވާފައިވަނިކޮށެވެ. 

މީގެއިތުރުން، ޗާގޯސް މައްސަލައިގައި ކުރީގެ ސަރުކާރުން އިޓްލޮސްގައި ނެގި ސްޓޭންޑުތަކުގެ ސަބަބުން ރާއްޖެއަށް ބޮޑެތި ގެއްލުންތަކެއް ވެފައިވާ ކަމަށާއި، އެ ސްޓޭންޑުތައް ނެގި ސަބަބު އޮޅުން ފިލުވުމަށާއި ފިޔަވަޅެއް އަޅަންޖެހޭނެ ފިޔަވަޅެއް އެޅުމަށް އިންކުއަރީ ކޮމިޝަނެއް ހަދަން ނިންމާފައިވާ ކަމަށް އެ މަނިކުފާނު ވިދާޅުވި އެވެ.

ރައީސް ވަނީ ރާއްޖޭގެ ކަނޑުން ގެއްލުނު ބައި ހޯދައި، ޗާގޯސް ރާއްޖެއަށް ހޯދަން ވެސް އިނގިރޭސިވިލާތުގެ ސަރުކާރާ އެކު މަޝްވަރާތައް ކުރަމުން އަންނަކަން ހާމަކުރައްވައިފަ އެވެ. އެގޮތުން، މޮރިޝަސްއަށް ވުރެ ޗާގޯސް ހައްގީ ރާއްޖެއަށް ކަމަށް ބަޔާންކޮށް އިނގިރޭސިވިލާތުގެ ސަރުކާރަށް ދެ ސިޓީއެއް ފޮނުވައި، އެ ގައުމުގެ ޑެޕިއުޓީ ޕްރައިމް މިނިސްޓަރާ އެކު ފޯނު ކޯލަކުން މަޝްވަރާ ކުރައްވާފައިވާ ކަން ރައީސް ފާހަގަކުރެއްވި އެވެ.