ބަހްރޭނުގައި ހުންނަ އެމެރިކާގެ އަސްކަރީ މަރުކަޒަކަށް ހަމަލާ އަރައިފި

ބަހްރޭންގެ ވެރިރަށް މަނާމާގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓްގެ މަރުކަޒަށް އަމާޒުކޮށް ވަރުގަދަ މިސައިލް ހަމަލާތަކެއް ދީފި އެވެ.

މި ހަމަލާއާ ގުޅިގެން މަނާމާގެ ޖުފެއިރު ސަރަހައްދުން ބޯކޮށް ދުން އަރަމުންދާ މަންޒަރު ފެންނަ ވީޑިއޯތަކާއި ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ.

ރޮއިޓާސް އިން ރިޕޯޓްކޮށްފައިވާ ގޮތުގައި، މި ހަމަލާ ދީފައިވަނީ އެމެރިކާ އާއި އިސްރާއީލުން ގުޅިގެން އީރާނަށް ދޭން ފެށި "އޮޕަރޭޝަން އެޕިކް ފިއުރީ" އަށް ރައްދު ދިނުމުގެ ގޮތުން އީރާނުންނެވެ. އީރާނުގެ ރިވޮލިއުޝަނަރީ ގާޑްސް އިން ވަނީ ބަހްރޭނާއި، ގަތަރު އަދި ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލް ފޮނުވާލާފައިވާ ކަމަށް ބުނެފައެވެ.

ހަމަލާތަކާ ގުޅިގެން ބަހްރޭންގެ މިނިސްޓްރީ އޮފް އިންޓީރިއާ އިން ވަނީ މުޅި ގައުމުގައި ސައިރަން އަޅުވައި، ރައްޔިތުންގެ ސަލާމަތަށްޓަކައި ހާއްސަ އިރުޝާދުތަކެއް ނެރެފައެވެ.  

މި ހަމަލާތަކާ ގުޅިގެން ބަހްރޭން، ގަތަރު އަދި ޔޫ.އޭ.އީގެ ވައިގެ ސަރަހައްދު މިހާރު ވަނީ ވަގުތީ ގޮތުން ބަންދުކޮށްފައެވެ. އެމެރިކާގެ އެމްބަސީތަކުން ވެސް ވަނީ އެ ގައުމުތަކުގައި އުޅޭ އެމެރިކާ ރައްޔިތުން ރައްކާތެރިކަމުގެ ފިޔަވަޅުތައް އެޅުމަށް އަންގާފައެވެ.