މިދިޔަ އަހަރު ނިމުނުއިރު ޖުމްލަ ދަރަނި 154 ބިލިއަން ރުފިޔާއަށް

މިދިޔަ އަހަރު ނިމުނުއިރު ރާއްޖޭގެ ޖުމްލަ ދަރަނި  154.8 ބިލިއަން ރުފިޔާއަށް އަރާފައިވާ ކަމަށް ދައްކައިފި އެވެ. 

ފިނޭންސް މިނިސްޓްރީން އާންމުކޮށްފައިވާ 2025 ވަނަ އަހަރުގެ ހަތަރު ވަނަ ކުއާޓަރުގެ ދަރަނީގެ ތަފާސްހިސާބުތައް (ޑެޓް ބުލެޓިން) ދައްކާގޮތުން ޖުމްލަ ދަރަނި 154 ބިލިއަން ރުފިޔާއަށް އަރައި ރާއްޖޭގެ ޤައުމީ އުފެއްދުންތެރިކަމުގެ (ޖީޑީޕީ) ނިސްބަތުން ބަލާނަމަ 133.1% އަށް ވަނީ އުފުލިފަ އެވެ. 

ތަފާސް ހިސާބުތައް ދައްކާ ގޮތުން 2024 ވަނަ އަހަރު ނިމުނުއިރު ދައުލަތުގެ ޖުމްލަ ދަރަނި ހުރީ 144.9 ބިލިއަން ރުފިޔާގަ އެވެ. އެހެންކަމުން، މިދިޔަ އަހަރުގެ ތެރޭގައި ދަރަނީގެ ޖުމްލަ އަދަދަށް ގާތްގަނޑަކަށް 10 ބިލިއަން ރުފިޔާ ވަނީ އިތުރުވެފަ އެވެ.

ބަޖެޓް ސެންޓްރަލް ގަވަރުމަންޓުގެ ދަރަނި - ސީދާ ސަރުކާރުން ނަގާފައިވާ ދަރަނީގެ ޖުމްލަ އަދަދު ހުރީ 134.3 ބިލިއަން ރުފިޔާ ގައެވެ. މިއީ ޖީޑީޕީގެ ނިސްބަތުން 115.5 ޕަސެންޓެވެ. 

ސަރުކާރުން ގެރެންޓީ ދީފައިވާ ދަރަނި - ސަރުކާރު ހިއްސާވާ ކުންފުނިތަކަށް ސަރުކާރުން ގެރެންޓީ ދީގެން ނަގާފައިވާ ދަރަނީގެ ޖުމްލަ އަދަދަކީ 20.4 ބިލިއަން ރުފިޔާ އެވެ. މިއީ ޖީޑީޕީގެ ނިސްބަތުން 17.6 އިންސައްތައެވެ.

މި އަހަރުގެ އެޕްރީލް މަހު ރާއްޖޭގެ މާލީ ތާރީހުގައި ވެސް އެންމެ ބޮޑު ދަރަންޏެއް އެއްފަހަރާ އަދާކުރާނެ އަހަރެވެ. އޭޕްރީލް މަހު ދައްކަންޖެހޭ 500 މިލިއަން ޑޮލަރުގެ ސުކޫކް އަދި އެހެނިހެން ބޭރުގެ ލޯނުތަކާއެކު، މިއަހަރު ދަރަނީގެ ބުރަ ބޮޑުވާނެ އެވެ. 
އަދި މި އަހަރަށް ފާސްކޮށްފައިވާ ދައުލަތުގެ ބަޖެޓުގައިވެސް ދަރަނި އަދާކުރުމަށް ގާތްގަނޑަކަށް 13 ބިލިއަން ރުފިޔާ ކަނޑައަޅާފައިވެ އެވެ. ދަރަނި އަދާ ކުރުމުގެ ގޮތުން ސަރުކާރުން ވިސްނާފައިވަނީ ރީފައިނޭންސް ކުރުމަށެވެ. އެގޮތުން އެއްފަހަރާ ބޮޑު އަދަދެއް ދެއްކުމުގެ ބަދަލުގައި ސަރުކާރުގެ އެންމެ ބޮޑު ވިސްނުމަކީ ދަރަނީގެ ބޮޑު ބައެއް ރީފައިނޭންސް ކުރުމެވެ. އެގޮތުން، ބޭރުގެ މާލީ ބާޒާރުން 350 އިން 450 މިލިއަން ޑޮލަރާ ދެމެދުގެ އަދަދެއް ހޯދައިގެން މިހާރު އޮތް ދަރަނި ދެއްކުމަށްފަހު، އެ ފައިސާ ދިގު މުއްދަތަކުން ދައްކާ ގޮތަށް ބަދަލުކުރުމަށް ފިނޭންސް މިނިސްޓްރީން ވަނީ އަމާޒުހިފާފައެވެ. މި ލޯނު ނަގަނީ އާއްމު ރޭޓަށްވުރެ ކުޑަކޮށެވެ.  މީގެ އިތުރުން ސޮވްރިން ޑިވެލޮޕްމަންޓް ފަންޑުން ވެސް ހަރަދު ކުރާނެ އެވެ. މި ފަންޑަށް މިވަގުތު ވަނީ 275 މިލިއަން ޑޮލަރު ޖަމާކޮށްފަ އެވެ. މިއާއެކު މިހާރު ވަނީ 500 މިލިއަން ޑޮލަރު ބޮޑު ލޯނަށް ޔަގީންކޮށްފަ އެވެ.