ވެލްކަމް އިންޑިއާ ރޯޑްޝޯގައި ބައިވެރިވުމުގެ ފުރުސަތު އިތުރުކޮށްފި

މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން އިންޑިއާގައި ބޭއްވުމަށް ހަމަޖެހިފައިވާ "ވެލްކަމް އިންޑިއާ" ރޯޑްޝޯގެ ދެވަނަ އެޑިޝަންގައި ބައިވެރިވުމުގެ މުއްދަތު މިމަހުގެ 28 ގެ ނިޔަލަށް އިތުރުކޮށްފިއެވެ.

މި ރޯޑްޝޯއަކީ މަޓާޓޯ އާއި ވިޒިޓް މޯލްޑިވްސް ކޯޕަރޭޝަން އަދި ނޭޝަނަލް ހޮޓެލް އެންޑް ގެސްޓްހައުސް އެސޯސިއޭޝަން އެންއެޗްގޭމް ގުޅިގެން ކުރިއަށްގެންދާ ހަރަކާތެކެވެ.

މި ހަރަކާތުގެ މައިގަނޑު މަގުސަދަކީ ރާއްޖޭގެ ޓޫރިޒަމްގެ މުހިންމު މާކެޓެއް ކަމަށްވާ އިންޑިއާގައި ރާއްޖޭގެ މަގުބޫލުކަން އިތުރުކޮށް، އެ ގައުމުގެ ޓްރެވަލް އޭޖެންޓުންނާއި ޓުއަރ އޮޕަރޭޓަރުންނާ ސީދާ ބައްދަލުކޮށް ގުޅުން ބަދަހިކުރުމުގެ ފުރުސަތު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ހޯދައިދިނުމެވެ.

މަޓާޓޯ އިން ހާމަކުރި ގޮތުގައި، މި ރޯޑްޝޯގައި ބައިވެރިވުމުގެ ފުރުސަތު ހުޅުވާލާފައިވަނީ ވަކި އަދަދަކަށެވެ. އެހެންކަމުން، ބައިވެރިވާން އެދޭ ފަރާތްތަކުން ވީހާވެސް އަވަހަށް ރެޖިސްޓްރީ ކުރުމަށް އެ ޖަމިއްޔާއިން އިލްތިމާސްކުރެއެވެ. ބައިވެރިވާން ބޭނުންވާ ފަރާތްތަކުން މި ލިންކް މެދުވެރިކޮށް ރެޖިސްޓްރީ ކުރެވޭނެއެވެ.