ރާއްޖެ އަށް އެއާ އިންޑިއާގެ ދަތުރުތައް ފެށިތާ ބައިގަރުނު ފުރުން ފާހަގަ ކޮށްފި

އިންޑީއާގެ ގައުމީ އެއާލައިންސް، އެއާ އިންޑިއާ އިން ރާއްޖެ އަށް ދަތުރުތައް ފެށިތާ 50 އަހަރު ފުރުން މިއަދު ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ފާހަގަ ކޮށްފި އެވެ.

އެއާ އިންޑިއާއަކީ ރާއްޖެއަށް ބައިނަލްއަގުވާމީ ވައިގެ ދަތުރުފަތުރުގެ ގުޅުން އެންމެ ފުރަތަމަ ގާއިމުކުރި އިންޑިއާގެ އެއާލައިނެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން ބުނީ އެ ތާރީހީ މުނާސަބާ ފާހަގަ ކުރުމުގެ ގޮތުން މިއަދު ރާއްޖެ އައި އެއާ އިންޑިއާގެ ފްލައިޓަށް ވޯޓާ ސެލިއުޓެއް އަރުވާފައިވާ ކަމަށެވެ. 

އޭގެ އިތުރުން ފަސިންޖަރުންނަށް މަރުހަބާ ކިޔުމުގެ ގޮތުން ވީއައިއޭގެ ފަރާތުން ވަނީ ފިނިފެންމަލާއި ކުކީޒް ހަދިޔާކޮށްފައިވާ ކަމަށް އެ ކުންފުނިން ބުންޏެވެ.

އެމްއޭސީއެލް އިން ބުނި ގޮތުގައި މި ހަރަކާތަކީ އެއާ އިންޑިއާ އާއި ރާއްޖެއާ ދެމެދު އޮތް ގާތް ގުޅުން ރަމްޒުކޮށްދިނުމުގެ ގޮތުން ވީއައިއޭ އިން ކުރިޔަށް ގެންދިޔަ ހާއްސަ ހަރަކާތެކެވެ.

އެއާ އިންޑިއާ އިން ރާއްޖެ އަށް އެންމެ ފުރަތަމަ ދަތުރުތައް ފަށާފައިވަނީ ފެބްރުއަރީ 21، 1976 ގަ އެވެ.