އެތެރޭގެ އުދުހުންތަށް ޓާމިނަލް ދޭކަށް | މިހާރު 27 ކައުންޓަރު ހުންނާނެ

ވެލާނާ އިންޓަނޭޝަނަލް އެއާޕޯޓް (ވީއައިއޭ ) ގެ ޑޮމެސްޓިކް ޓާމިނަލްގެ އޮޕަރޭޝަންސްތައް ކުރީގެ ޓާމިނަލްއަށް ބަދަލު ކުރުމާއެކު ޗެކިން ކައުންޓަރުގެ އަދަދު 27 އަށް އިތުރު ވެގެން ގޮސްފި އެވެ. 

ޑޮމެސްޓިކް ޓަރމިނަލްގެ އޮޕަރޭޝަންތައް ޓާމިނަލް 2 އަށް ބަދަލުކުރުމުގެ ގޮތުން މިއަދު ވަނީ ހާއްސަ ރަސްމިއްޔާތެއް ބާއްވާފަ އެވެ. ރަސްމިއްޔާތު ޝަރަފުވެރިކޮށް ދެއްވީ ރާއްޖޭގެ ނައިބު ހުސައިން މުހައްމަދު ލަޠީފް އެވެ. މި ރަސްމިއްޔާތުގައި ދައުލަތުގެ ވަޒީރުން، އެމްއޭސީއެލްގެ ބޯޑް މެންބަރުން އަދި އެމްއޭސީއެލްގެ އިސްވެރިންނާއި ޓަރމިނަލްގެ އޮޕަރޭޝަންސްތައް ބަދަލުކުރުމުގައި ހަރަކާތްތެރިވި މުވައްޒަފުން ބައިވެރިވިއެވެ.

ޑޮމެސްޓިކް ޓާމިނަލްގެ އޮޕަރޭޝަންސްތައް ޓާމިނަލް 2 އަށް ބަދަލުކޮށްފައި މިވަނީ ބޮޑެތި ބަދަލުތަކެއް ގެނައުމަށްފަހު އެވެ. މިބަދަލުތައް ގެނައުމުގެ މަސައްކަތް ކޮށްފައިވަނީ އެމްއޭސީއެލްގެ އެކި ޑިޕާޓްމަންޓްތަކުގެ މުވައްޒަފުންނެވެ. 

މި ބަދަލާއެކު ކުރީގެ ޑޮމެސްޓިކް ޓާމިނަލްގައި 8 ޗެކް-އިން ކައުންޓަރު ހުރި ނަމަވެސް، ޓާމިނަލް 2 ގައި ޗެކް-އިން ވުމަށް 27 ކައުންޓަރު ހުންނާނެ އެވެ. އެގޮތުން އަދި ސެކިއުރިޓީ ކްލިއަރެންސް އަށް 3 މެޝިން ބެހެއްޓިފައިވާއިރު، 6 ޑިޕާޗާ ގޭޓު ހުންނާނެ އެވެ. މީގެ އިތުރުން ޓަރމިނަލް 2ގައި އަންހެން އަދި ފިރިހެން ބޭފުޅުންނަށް ވަކި ދެ ނަމާދު ކޮޓަރިއާއި ކުޑަކުދިންގެ ކުޅޭ ސަރަހައްދަކާއި އެފްއެންޑްބީގެ ތިން އައުޓްލެޓް ހުންނާނެ އެވެ. އަދި އަންނަ ފަސިންޖަރުންގެ ދަބަސްތައް ނެގުމަށް ވެސް ބޮޑު ބަދަލެއް ވަނީ ގެނެސްފަ އެވެ. އެގޮތުން ޓާމިނަލް 2 ގައި ކުރީގެ ޑޮމެސްޓިކް ޓަރމިނަލްގައި ހުރި ބެގޭޖް ބެލްޓަށްވުރެ ހަތަރު ގުނަ ބޮޑު ދެ ބެލްޓް ވަނީ ބެހެއްޓިފަ އެވެ.

ވީއައިއޭގައި އެތެރޭގެ އުދުހުންތަކަށް ނުވަތަ ޑޮމެސްޓިކް ދަތުރުތަކަށް ހާއްސަ ޓާމިނަލެއް އެންމެ ފުރަތަމަ ހުޅުވުނީ 19، ޑިސެމްބަރު 2012 ގައެވެ. މި ޓާމިނަލް ހުޅުއްވައި ދެއްވީ ރައީސް ޑރ. މުހައްމަދު ވަހީދު ހަސަން މަނިކެވެ. އޭގެ ކުރިން އެތެރޭގެ އުދުހުންތަކަށް ހިދުމަތް ދެމުން އައީ ބައިނަލްއަގުވާމީ ޓާމިނަލްގެ ތެރެއިން ކަމަށްވާތީ ދަތުރުވެރިންނަށް ލުއިފަސޭހަ ކޮށްދިނުމަށް ވަކި އިމާރާތެއް ބިނާކުރެވުނީ އެވެ. އަދި 2012 ގައި ހުޅުވި ޓާމިނަލަށް ފަހުން ގެނެވުނު ބަދަލުތަކާއެކު، 2015 ވަނަ އަހަރުގެ ތެރޭގައި ޓާމިނަލް އިތުރަށް ބޮޑުކޮށް، ފަސިންޖަރުންނަށް ހިދުމަތް ދޭނެ ޖާގަ އިތުރުކުރެވުނެވެ.