ތާރިގް ބޮޑުވަޒީރުކަމުގެ ހުވާކުރެއްވުމުގެ ރަސްމިއްޔާތަށް ރައީސް ބަންގްލަދޭޝަށް

ބަންގްލަދޭޝްގެ އިންތިހާބީ ބޮޑުވަޒީރު، ތާރިގް ރަހްމާން މަގާމުގެ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް، ރައީސް ޑރ. މުހައްމަދު މުއިއްޒު ބަންގްލަދޭޝަށް ފުރާވަޑައިގެންފި އެވެ. 

ރައީސް އޮފީހުން ބުނީ، ބަންގްލަދޭޝްގެ އިންޓަރިމް ސަރުކާރުގެ ޗީފް އެޑްވައިޒަރު، ޑރ. މުހައްމަދު ޔޫނުސްގެ ދައުވަތަކަށް ކުރައްވާ މިދަތުރުފުޅަކީ، އެ ގައުމުގެ އާ ސަރުކާރު ހުވާކުރެއްވުމަށް ބާއްވާ ރަސްމިއްޔާތުގައި ބައިވެރިވެވަޑައިގަތުމަށް އެ މަނިކުފާނު ކުރައްވާ ދަތުރުފުޅެއް ކަމަށެވެ. 

ހުވާ ކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާގެ ވަގުތެއްގަ އެވެ. 

"މިހިނގާ ފެބުރުވަރީ މަހުގެ 16 އިން 18 އަށް ރައީސުލްޖުމްހޫރިއްޔާ ކުރައްވާ މިދަތުރުފުޅުގައި، ބަނގްލަދޭޝްގެ ބޮޑުވަޒީރުކަމަށް އަލަށް އިންތިހާބުވެވަޑައިގެންނެވި ތާރިޤް ރަޙްމާނާއި ބައްދަލުކުރެއްވުމަށް ވަނީ ހަމަޖެހިފަ އެވެ،" ރައީސް އޮފީހުން ބުންޏެވެ.

ބަންގްލަދޭޝްގެ ދަރިވަރުންނާއި ޒުވާނުން އިސްވެ ކުރި މުޒާހަރާތަކަށްފަހު އޭރުގެ ބޮޑުވަޒީރު ޝެއިހް ހަސީނާގެ ވެރިކަން ވެއްޓުމަށްފަހު، ބޭއްވި ފުރަތަމަ އާންމު އިންތިހާބުގައި ތާރިގްގެ ބަންގްލަދޭޝް ނެޝަނަލް ޕާޓީ (ބީއެންޕީ)އިން ވަނީ ތަނަވަސް އަޣުލަބިއްޔަތަކުން ކާމިޔާބުކޮށްފަ އެވެ.

މިގޮތުން، ބަންގްލަދޭޝްގެ ގާނޫނު ހަދާ މަޖިލީހުގެ 299 ގޮނޑީގެ ތެރެއިން 200އަށް ވުރެ ގިނަ ގޮނޑި ބީއެންޕީ އިސްވެ އޮތް އިއްތިހާދުން ވަނީ ކާމިޔާބުކޮށްފަ އެވެ.

ތާރިގް ރަހްމާނަކީ، ދާދިފަހުން އަވަހާރަވި ބަންގްލަދޭޝްގެ ކުރީގެ ބޮޑުވަޒީރު ހާލިދާ ޒިއާގެ ދަރިކަލުންނެވެ.