ދެކޮޅަށް ދުއްވޭ ގޮތަށް މަގު ފުޅާކޮށް، ބާޒާރުމަތި ސަރަހައްދު ހުޅުވާލައިފި

ބޮޑުތަކުރުފާނު މަގު ތާރުއަޅައިގެން ތަރައްގީ ކުރުމުގެ މަޝްރޫއުގެ ދަށުން، ބާޒާރުމަތި ސަރަހައްދު ދެކޮޅަށް ދުއްވޭ ގޮތަށް ފުޅާކޮށް، އާންމުންނަށް ހުޅުވާލައިފި އެވެ. 

ފުލުހުން ބުނީ ބޮޑުތަކުރުފާނުމަގު ޗާންދަނީމަގުން ފެށިގެން ފާލަންދޮށު ހިނގުމާހަމައަށް ދެކޮޅަށް ދުއްވާގޮތަށް ޓްރާންސްޕޯޓް މިނިސްޓްރީން ހަމަޖައްސާފައިވާ ކަމަށެވެ. 


ނަމަވެސް، މަގު ބޭނުންކުރާ މީހުންނަށް ދަތިނުވާ ގޮތަށް އަމަލުކުރުމަށް ފުލުހުން ވަނީ ވަނީ އިލްތިމާސްކޮށްފަ އެވެ.

މިގޮތުން، ބޯޓުފަހަރަށް މުދާއަރުވާ ބޭލުމުގައި ޑަބަލްކޮށް ވެހިކަލް މަޑު ނުކުރުމާއި ބޯޓުފަހަރަށް އަރުވާ ބާލާ މުދާ މަގުމަތީގައި ނުބެހެއްޓުމަށް ފުލުހުން އެދިފައިވެ އެވެ. 

"...ރައްކާތެރި ދުވެލީގެ މިންގަޑާއި ހިލާފަށް ނުދުއްވުމާއި، ގަވާއިދާއި ހިލާފަށް ޕާކްކުރުން ފަދަ ކަންތައް ނުކުރުމަށް ދަންނަވަމެވެ،" ފުލުހުން ސޯޝަލް މީޑިއާގައި ކުރި ޕޯސްޓުގައި ބުންޏެވެ.

އެމްޓީސީސީއާ ހަވާލުކޮށްގެން ބޮޑުތަކުރުފާނު މަގުގައި އަލުން ތާރު އަޅައި ޒަމާނީ ފެންވަރަށް ހެދުމަށް ސަރުކާރުން ފަށާފައިވާ މަޝްރޫއުގެ ދަށުން މާރުކޭޓާ ހިސާބުން ނޯތު ހާބަރާ ހަމައަށް މަގު ފުޅާކޮށް ތާރު އެޅުމުގެ މަސައްކަތް ފެށީ މިދިޔަ ޑިސެމްބަރު މަހުގެ ތެރޭގަ އެވެ.