ދޯނީގައި ރޯވި އަލިފާން ކޮންޓްރޯލް ކޮށްފި، ފަސް މީހަކަށް އަނިޔާ

ކުރުނބާ މޯލްޑިވްސް ރިސޯޓު ކައިރީގައި އޮތް މަސް ދޯނީގައި ރޯވި އަލިފާންގަނޑު ކޮންޓްރޯލް ކޮށްފި އެވެ.

ޖުމްލަ 15 މީހުންނާއެކު ދަތުރުކުރަމުން ދިޔަ އެ ދޯނީގައި އަލިފާން ރޯވެފައި ވަނީ މިއަދު މެންދުރު 2:50 ހާއިރު އެވެ. ދޯނީގައި ތިބި މީހުން ސަލާމަތް ކޮށްފައިވާއިރު، އޭގެ ތެރެއިން ފަސް މީހަކަށް ވަނީ އެކިވަރުގެ އަނިޔާ ލިބިފަ އެވެ.

ފުލުހުން ބުނީ އަނިޔާވީ ދެ ދިވެހިންނަށާއި ތިން ބިދޭސީންނަށް ކަމަށެވެ. ކުރުނބާ މޯލްޑިވްސްގެ އުޅަނދެއްގައި އެމީހުން މާލެ ގެނެސް، ފަރުވާ ދެމުންދާ ކަމަށްވެސް ބުންޏެވެ. 

އެމްއެންޑީއެފް އިން މި ހާދިސާގެ އަޕްޑޭޓެއް ދެމުން ބުނީ އަލިފާންގަނޑު ކޮންޓްރޯލްވި ނަމަވެސް މުޅިން ނިއްވާލެވިފައި ނުވާ ކަމަށެވެ.

މި ހާދިސާ ހިނގަން މެދުވެރިވި ސަބަބުން ސާފެއް ނުވެ އެވެ. ބެލެވޭ ގޮތުގައި ބޭނުން ނުކުރެވޭ ވަރަށް ދޯނި ވަނީ އަނދައިފަ އެވެ.