ކުޑަކުއްޖަކު ގުރޫމްކޮށް، ޖިންސީ ގޯނާ ކުރި މައްސަލައިގައި ދެ މީހަކު ހައްޔަރު ކޮށްފި

ކުޑަ އަންހެން ކުއްޖަކު ގްރޫމްކޮށް، އެކްސްޕްލޮއިޓްކޮށް އެ ކުއްޖާއަށް ޖިންސީގޯނާކުރި ކަމުގެ ތުހުމަތުގައި ދެ މީހަކު ހައްޔަރުކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައި ވަނީ ހދ. ކުޅުދުއްފުށި، ސިލްވާސްޓާ، އަލީ ހަސަން 44، އާއި އެރަށު، ކަސްތޫރިގެ، މުހައްމަދު އިހުސާން 21، އެވެ. 

ފެމިލީ އެންޑް ޗައިލްޑް ޕްރޮޓެކްޝަނާއި، ކްރައިމް އިންޓެލިޖެންސް އަދި އަތޮޅު ތެރޭގެ ޕޮލިސް ސްޓޭޝަނެއް ގުޅިގެން ހިންގި އޮޕަރޭޝަނެއްގައި މި ދެ މީހުން ހައްޔަރު ކޮށްފައި ވަނީ 15 އަހަރުގެ އަންހެން ކުއްޖަކު ގްރޫމްކޮށް، އެކްސްޕްލޮއިޓްކޮށް، ޖިންސީގޯނާ ކޮށްފައިވަނީ މައްސަލައިގަ އެވެ.

ފުލުހުން ބުނީ އަލީ ހަސަން ހައްޔަރުކޮށްފައިވަނީ މިދިޔަ ޑިސެމްބަރު 24 ވަނަ ދުވަހު ކަމަށެވެ. އޭނާ ބަންދުގައި ބެހެއްޓުމަށް ކޯޓުން މިހާރު ދީފައިވާ މުއްދަތު ހަމަވާނީ އަންނަ މަހުގެ އެއް ވަނަ ދުވަހަށެވެ.

މި މައްސަލައިގައި ހިމެނޭ މުހައްމަދު އިހުސާން ހައްޔަރުކޮށްފައި ވަނީ މިމަހުގެ ތިން ވަނަ ދުވަހު އެވެ. އޭނާ ބަންދުގައި ބެހެއްޓުމަށް ކޯޓުން މިހާރު ދީފައިވާ މުއްދަތު ހަމަވާނީ އަންނަ މަހުގެ ހަވަނަ ދުވަހު ކަމަށް ފުލުހުން ބުންޏެވެ.