ސަރުކާރުން ބުނަނީ ވާހަކަ ދައްކަމޭ، ލާމުތާ ބުނަނީ އެއީ ދޮގެކޭ

މހޮރައިޒަން ފިޝަރީޒްގެ، މާންދޫގައި އެރަށް ނިސްބަތްވާ ލ. އަތޮޅާއި އަދި ކަރިން ތ. އަތޮޮޅުގެ މަސްވެރިން ހިތްހަމަ ނުޖެހިގެން ޝުއޫރުތަކާއެކު ނުކުމެ ހުއްޓާ ނުލައި ދަނީ މާންދޫގައި އިހުތިޖާޖުތައް ކުރަމުންނެވެ. އެ ކަމާ ގުޅުވައި މިއަދު "މި" ނޫހުން ސުވާލު ކުރުމުން އެ މައްސަލައަށް ހައްލެއް ހޯދަން މަސްވެރިންނާ ވާހަކަ ދައްކަމުން ގެންދާ ކަމަށް ސަރުކާރުން ބުންޏެވެ. އެކަމަކު ސަރުކާރުގެ އެ ޖަވާބާ އެކު ތާ އާއި ލާމުގެ މަސްވެރިން ބުނަނީ އެއީ ދޮގެކޭ އެވެ. އެއްވެސް ވާހަކައެއް ނުދައްކަ އެވެ. އަޅައެއް ވެސް ނުލަ އެވެ. ހަދަނީ ހުސް ދޮގެވެ.

މަސް ކިރުވާފައި ފައިސާ ނުލިބި ގިނަ ދުވަސްވުމުގެ ސަބަބުން ލާމުތާ، ދެ އަތޮޅުގެ މަސްވެރިން މުޒާހަރާ ކުރަމުންދާތާ މި އަދު މިއީ ގުނާ ދެ ދުވަހެވެ. މަސްވެރިންގެ ޑިމާންޑަކީ އެ މީހުން މާންދޫ ފެކްޓަރީއަށް ކިރުވި މަހަށް ދޭންޖެހޭ 21 މިލިއަނަށްވުރެ ގިނަ ރުފިޔާ ހިފަހައްޓައިގެން ނުތިބެ އަވަހާ ދޫކޮށްލުމެވެ. މި މައްސަލަ ވަރަށް ބޮޑަށް ގޯސްވެ މާންދޫގައި ސުލްހަވެރި މުޒާހަރާއެއް ކުރަމުން ދިޔަ ނަމަވެސް ސަރުކާރުން މިހާތަނަށް މިކަމުގައި އެއްވެސް އެއްޗެއް ބުނެފައެއް ނުވެ އެވެ.

މި މައްސަލާގައި ފުރަތަމަ ފަހަރަށް ނޫހަކަށް ސަރުކާރުގެ ފަރާތުން ވާހަކަ ދައްކަވަމުން ފިޝަރީޒް މިނިސްޓަރު އަދި މާންދޫ ފެކްޓްރީ ނިސްބަތްވާ މަޝްހޫރު ވިޔަފާރިވެރިޔާ ގާސިމް އިބްރާހިމްގެ ޖުމްހޫރީ ޕާޓީގެ ޑެޕިއުޓީ ލީޑަރު ޑރ. ހުސެއިން ރަޝީދު ހަސަން މިއަދު ވިދާޅުވީ ލާމުތާގެ މަސްވެރިންގެ ޝަކުވާތަކުގައި ހިމެނޭ ހައްލު ކުރަން ވާހަކަ ދައްކަމުން ގެންދާ ކަމަށެވެ. އެކަމަކު ވާހަކަ ދައްކަނީ ކޮން ގޮތަކަށް ކަމެއް މިނިސްޓަރު ވިދާޅެއް ނުވެ އެވެ. އެއްވެސް ތަފުސީލެއް ވެސް ނުދެއްވަ އެވެ.

ސަރުކާރުގެ ފަރާތުން ފުރަތަމަ ފަހަރަށް މި މައްސަލާގައި އިވިގެން ދިޔައިރު، އެ ވާހަކަ އެ ދެ އަތޮޅުގެ މަސްވެރިން ދޮގު ކުރެ އެވެ. ލާމުތާ މަސްވެރިންގެ ފަރާތުން "މި" ނޫހަށް ވާހަކަ ދައްކަމުން ލ. ގަން މަސްވެރިންގެ ޖަމިއްޔާގެ ރައީސް ހުސެއިން ހަނީފު ވިދާޅުވީ "މިނިސްޓަރު ހުސައިން ކަނޑައެޅިގެން އިތުރުފުޅު ހައްދަވަމުން ގެންދަވާ" ކަމަށެވެ.

"މި މައްސަލަ [މަސް ކިރުވާފަ ފައިސާ ނުލިބުމު] ކަންކަމުގައި ސަރުކާރުން އެއްވެސް ވާހަކައެއް ނުދައްކާ. އަޅުގަނޑުމެން އެބަދަން [ކާރުހާނާގެ] މެނޭޖުމަންޓާ މިކަމުގައި ވާހަކަ ދައްކަމުން،" ހަނީފު ވިދާޅުވި އެވެ.

އޭނާ ވިދާޅުވީ މި މައްސަލަ ހައްލު ކުރަން މިއަދުވެސް ހޮރައިޒަން ފިޝަރީޒުގެ ސީނިޔަ މެނޭޖުމަންޓާ ބައްދަލު ކޮށްފައިވާ ކަމަށާ މަސްވެރިންގެ ބޭނުންވާ ފަދައިން އެދެވޭ ކުރިއެރުމެއް އެ ބައްދަލުވުމުގައި ވެސް ނުލިބުނު ކަމަށެވެ.

"މަސްވެރިން އެދެނީ މަސް ކިރުވާފައި ފައިސާ ނުދީ ހުރި ދުވަސްތަކުގެ ފައިސާ ދޭން. އަޅުގަނޑުމެން އެދުނީ 21 މިލިއަން ނުދެވޭނަމަ ދެ ބައިކުޅަ އެއްބަ ދޭން. އެކަމަކު އެކޮޅުން ބުނަނީ އެވަރު ވެސް ދެވެން ނެތް ކަމަށް. އަޅުގަނޑުމެން ގަބޫލު ކުރަނީ އެވަރު ދެވޭނެ ކަމަށް. މިވަރުގެ ފެކްޓްރީއެއް ހިންގާ ބަޔަކަށް އެވަރު ނުދެވޭނަމަ ގަބޫލު ކުރަނީ އެހަމަ ގަސްތުގައި ނުދެނީ ކަމަށް،" ހަނީފު ވިދާޅުވި އެވެ.

މަސްވެރިން މާންދޫގައި އިހުތިޖާޖު ކުރަމުންދާއިރު އެ އިހުތިޖާޖު ކުރާ ސަރަހައްދުގެ އަމަން ބެލެހެއްޓުމުގައި ފުލުހުންގެ ޓީމެއް ވެސް ހަރަކާތްތެރިވަމުން ދެއެވެ. ބައެއް ފަހަރު ފުލުހުންނާ ދެމެދު ކުދިކުދި ހިތްހަމަ ނުޖެހުންތައް ދިޔަނަމަ ވެސް ކުރިމަތިލުމަށް ދިއުންފަދަ ކަމެއް ނުހިނގަ އެވެ. އިހުތިޖާޖް އޮތީ ސުލްހަވެރިކޮށެވެ.

ހަނީފު ވިދާޅުވީ މި އިހުތިޖާޖުގެ ކަންކަން ދާގޮތް ފުލުހުންނަށް އެނގޭނެ ކަމަށާ، ހޮރައިޒަން ކުންފުނިން ބޭނުން ވަނީ ފެކްޓްރީގެ އޮޕަރޭޝަން ކުރިއަށް ގެންދެވޭނެ ގޮތެއް ހަދައިދޭނެ ކަމަށެވެ. ނަމަވެސް މަސްވެރިންނަށް އެތައް މިލިއަން ރުފިޔާއަކަށް ދަރައި، އެ ނުދީ މަސްވެރިން ހާލުގައި ތިބިއިރު އެ ފެކްޓްރީގެ އޮޕަރޭޝަން ކުރިއަށް ގެންދަން ޖެހޭ ސަބަބެއް ނެތް ކަމަށެވެ.

ލާމު ތާގެ މަސްވެރިންގެ އަނެއް ޑިމާންޑަކީ ތެލާއި އައިސް އެކަށީގެންވާ ގޮތެއްގައި ލިބުމެވެ. މިހާރު ދޯންޏަކަށް މާންދޫން ދޫކުރަނީ 700 ލިޓަރާއި 800 ލިޓަރުގެ މިންވަރެވެ. އެވަރަކީ މަހަށް ފުރާ ދޯންޏަކަަށް ކުޑަ އަދަދެކެވެ. އަދި އައިސް ވިއްކަނީ 500 ކިލޯގެ މަގުންނެވެ. މަސްވެރިންގެ ޑިމާންޑަކީ މަދުވެގެން ދެ ޓަނުގެ އައިސް ދޯންޏަކަށް ވިއްކުމެވެ.