ދެ އިންތިހާބު އެއްކޮށްލުމާ ދެކޮޅަށް އެމްޑީޕީން ތެދުވުމުން މަޖިލިސް ހޫނުވެ، ބައެއް މެމްބަރުން ނެރެފި

ރިޔާސީ އިންތިހާބާއި ރައްޔިތުންގެ މަޖިލީސް އިންތިހާބު އެއްކޮށްލުމަށް ސަރުކާރުގެ ފަރާތުން ގާނޫނުއަސާސީއަށް ހުށަހަޅާފައިވާ އިސްލާހާ ދެކޮޅަށް ރައްޔިތުންގެ މަޖިލީހުގެ މިއަދުގެ ޖަލްސާގައި އިދިކޮޅު އެމްޑީޕީގެ މެމްބަރުން އަޑުގަދަކުރަން ފެށުމުން، ބައެއް މެމްބަރުންގެ ނަން އިއްވައި ތަޅުމުން ނެރެފި އެވެ. 

ރިޔާސީ އިންތިހާބާއި މަޖިލީސް އިންތިހާބު އެއްކޮށްލުމަށް ގާނޫނުއަސާސީއަށް ސަރުކާރުގެ ފަރާތުން އިސްލާހު ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ.

އެ އިސްލާހު ދިރާސާކުރި މަޖިލީހުގެ މިނިވަން މުއައްސަސާތަކުގެ ކޮމިޓީން އިލެކްޝަންސް ކޮމިޝަނާއި ބަންޑާރަ ނައިބު އަދި ސިޔާސީ ޕާޓީތަކުގެ ހިޔާލު ހޯދުމަށްފަހު، އެ އިސްލާހަށް އެއްވެސް އުނިއިތުރެއް ނުގެނެސް ފާސްކޮށްފައިވަނީ އިއްޔެ އެވެ.

ކޮމިޓީގެ ރިޕޯޓު މިއަދު ތަޅުމަށް ހުށަހަޅައި، ބަހުސް ފެށުމާ އެކު ކެންދޫ ދާއިރާގެ އެމްޑީޕީ މެމްބަރު މައުރޫފް ޒާކިރު ވަނީ ކޮޅަށް ތެދުވަޑައިގެން އެކަމާ ދެކޮޅަށް އަޑުއުފުއްލަވައިފަ އެވެ.

މައުރޫފް ޒާކިރު ވިދާޅުވަމުން ގެންދެވީ، ބޭނުންހާ ގޮތަކަށް ގާނޫނުއަސާސީއަށް ބަދަލު ގެނައުމުގެ ބާރު މަޖިލީހަށް ލިބިގެންނުވާ ކަމަށެވެ. 

ގޮނޑިކޮޅުގައި އިށީނދެވަޑައިގަތުމަށް ރިޔާސަތުން ތަކުރާރުކޮށް އެދުމުން ވެސް، މައުރޫފް އެކަމަށް އިޖާބަ ނުދެއްވުމުން، އޭނާގެ ނަން އިއްވައި ތަޅުމުން ވަނީ ނެރެފަ އެވެ.

އެއަށްފަހު ކޮމިޓީގެ ރިޕޯޓަށް ބަހުސް ކުރެއްވި، ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް އާއި ހުޅުމާލެ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު ވަނީ ސަރުކާރަށާއި ވެރިކަންކުރާ ޕީއެންސީއަށް ވަރަށް ބޮޑަށް ފާޑުވިދާޅުވެފަ އެވެ. 

އެގޮތުން، ހަރަދު ކުޑަކުރުމުގެ ނަމުގައި ޕީއެންސީން ރާވަމުންދަނީ 2028ގެ ރިޔާސީ އިންތިހާބު ވަގަށް ނަގައި، ރައްޔިތުންނަށް ލިބިދީފައިވާ ވޯޓުލުމުގެ ހައްގު ނިގުޅައިގަތުމަށްކަމަށް އެ މެމްބަރުން ތަކުރާރުކޮށް ތުހުމަތުކުރެއްވި އެވެ.

އޭގެފަހުން ވެސް ޕީއެންސީގެ މެމްބަރުންނާއި އެމްޑީޕީގެ މެމްބަރުންނާ ދެމެދު ބަހުގެ ހަމަލާތައް ބަދަލުކޮށް، ރިޔާސަތުގެ ކުރިމަތީގައި އިހުތިޖާޖުކޮށް އަޑުގަދަކުރަމުންދާތީ، މީކާއީލް އާއި ޝަމްހީދުގެ އިތުރުން ވައިކަރަދޫ ދާއިރާގެ މެމްބަރު މުހައްމަދު ޒިޔާދާއި، ކެޔޮދޫ ދާއިރާގެ މެމްބަރު މުހައްމަދު ނިއުޝާދުގެ ނަން ވަނީ އިއްވައިފަ އެވެ.

އަދި ނަން އިއްވި މެމްބަރުން ތަޅުމުން ނެރެވެންދެން، މަޖިލީހުގެ ޖަލްސާ ވަނީ މެދުކަނޑާލައިފަ އެވެ. 

ފަލާހު އެ ބިލު ހުށަހެޅުއްވި ސަބަބެއްގެ ގޮތުގައި ބަޔާންކޮށްފައި ވަނީ މަޖިލީހުގެ މެންބަރު ކަމަށް މީހުން ހޮވުމަށާއި ރައީސުލްޖުމްހޫރިއްޔާ ހޮވުމަށް ބާއްވާ އިންތިހާބު ބާއްވަން ވާނީ ދެ އިންތިހާބު އެކީގައި ކަމަށް ކަނޑައެޅުން ކަމަށެވެ. އަދި މަޖިލީހުގެ ދައުރު ގުނުމުގެ އުސޫލު އިސްލާހު ކުރުމަށް ކަމަށެވެ.

އެ ބިލުގައި ވަނީ، މަޖިލީސް އިންތިހާބު ބާއްވަންވާނީ ކޮންމެ ފަސް އަހަރަކުން ރައީސަކު ހޮވަން ބާއްވާ ރިޔާސީ އިންތިހާބާ އެކުގައި ކަމަށެވެ. އަދި މަޖިލީހުގެ އުމުރަކީ ޑިސެމްބަރު މަހުގެ އެއް ވަނަ ދުވަހުން ފެށިގެން ފަސް އަހަރު ދުވަސް ކަމަށް ވެސް އެ ބިލުގައިވެ އެވެ.

މި އިސްލާހު ފާސްވެ، އަމަލު ކުރަން ފެށުމުން 2028 ގެ ރިޔާސީ އިންތިހާބާއި 2029 ގެ މަޖިލިސް އިންތިހާބު ބާއްވަން ޖެހޭނީ އެކީގަ އެވެ. އަދި މިހާރު ހިނގަމުންދާ 20 ވަނަ މަޖިލީހުގެ ދައުރު ޑިސެމްބަރު 1، 2028 އަށް ހަމަވާނެ އެވެ.

މިހާރުގެ މަޖިލީސް ދައުރު ފެށުނީ މެއި 28، 2024 ގައެވެ. ގާނޫނު އަސާސީ މިހާރު އޮތް ގޮތުން ފަސް އަހަރުގެ ދައުރު ހަމަވާނީ މެއި، 2029 ގައެވެ. ނަމަވެސް މި އިސްލާހަށް އަމަލުކުރަން ފެށުމާއެކު ފަސް މަހެއްހާ ދުވަސް މި ދައުރުން އުނިވެގެން ދާނެ އެވެ.

މައި ދެ އިންތިހާބު އެއްކޮށްލުމަށްޓަކައި އާންމުން ދެކޭ ގޮތް ބެލުމަށް ނަގަންޖެހޭ ފެންނަ ނުފެންނަ ވޯޓު، އޭޕްރީލް މަހު އޮންނަ ލޯކަލް ކައުންސިލް އިންތިހާބުގައި ނެގުމަށް ސަރުކާރުން ވަނީ ވިސްނައިފަ އެވެ.