ފަސް އަހަރު އެތެރޭގެ ދަރަނި އެންމެ ބޮޑުވީ 2022 ގައި

މިދިޔަ ފަސް އަހަރަށް ބަލާއިރު ދައުލަތުން އެތެރޭގެ ދަަރަނި ނަގައި އެންމެ ބޮޑަށް އިތުރުކޮށްފައިވަނީ 2022 ވަނަ އަހަރުގައި ކަމަށް ދައްކައިފި އެވެ. 

މޯލްޑިވްސް މަނިޓަރީ އޮތޯރިޓީގެ "ކްލެއިމްސް އޮން ސެންޓްރަލް ގަވަމަންޓް" ރިޕޯޓް ދައްކާ ގޮތުން ސަރުކާރުގެ ދަރަނި ފަސް އަހަރުތެރޭ ދެގުނަ އަށް އިތުރުވެ ވަނީ 90 ބިލިއަން ރުފިޔާ އަށް އަރާފަ އެވެ. ނަމަވެސް 2020 ވަނަ އަހަރު ދައުލަތުގެ އެތެރޭގެ ދަރަނި ހުރީ 44.6 ބިލިއަން ރުފިޔާގަ އެވެ. 

އެމްއެމްއޭގެ މައުލޫމާތުތައް ދައްކާ ގޮތުން އެތެރޭގެ ދަަރަނި ވަނީ 2020 އިން 2025 އަށް 117 ޕަސެންޓް އިތުރުވެފަ އެވެ.

މި މުއްދަތަށް ބަލާނަމަ ޓީބިލާއި އިސްލާމިކް އިންސްޓްރޫމަންޓްސް ވިއްކި އަދަދު 2020 ވަނަ އަހަރު 24 ބިލިއަން ރުފިޔާގައި ހުރިނަމަވެސް މިދިޔަ އަހަރު ނިމުނުއިރު މި އަދަދު ހުރީ 52.2 ބިލިއަން ރުފިޔާއަށް އިތުރުވެފަ އެވެ. ތަފާސްހިސާބުތައް ދައްކާގޮތުން ކޮންމެ އަހަރަކު މި އަދަދު ދަނީ 11 ޕަސެންޓާއި 20 ޕަސެންޓާ ދެމެދުގެ މިންވަރަކަށް އިތުރުވަމުންނެވެ. އެންމެ ބޮޑު އިތުރުވުމެއް އައިސްފައިވަނީ 2022 ވަނަ އަހަރު އެވެ. އެ އަހަރު ދަރަނި ވަނީ 20.2 ޕަސެންޓް އިތުރުވެފަ އެވެ.

މި ރިޕޯޓް ދައްކާ ގޮތުން ސަރުކާރުން ވިއްކާ ޓީބިލް އެންމެ ގިނައިން ގަންނަނީ ވިޔަފާރި ބޭންކުތަކުންނެވެ. އެންމެ ބޮޑު ހިއްސާއެއް އޮތީ ބޭންކުތަކުގައެވެ. ބޭންކްތަކުން މިދިޔަ އަހަރުގެ ނިޔަލަށް ވަނީ ސަރުކާރުން ވިއްކި 27,347.9 ބިލިއަން ރުފިޔާގެ ޓީބިލް ގަނެފަ އެވެ. އަދި މާލީ އެހެނިހެން އިދާރާތައް މީގެ ތެރޭގައި އިންޝުއަރެންސް ކުންފުނިތަކާއި ޕެންޝަން ފަންޑު ފަދަތަންތަނުން ވަނީ މިދިޔަ އަހަރުގެ ނިޔަލަށް 22.4 ބިލިއަން ރުފިޔާ ޓީބިލަަށް އިންވެސްޓްކޮށްފަ އެވެ. އަދި ސަރުކާރުގެ ކުންފުނިތައް ގަނެފައިވަނީ 1,973.1 މިލިއަން ރުފިޔާ އެވެ. އަދި  ޕްރައިވެޓް ސެކްޓަރުން ވަނީ 392.3 މިލިއަން ރުފިޔާގެ ސަރުކާރުގެ ޓީބިލް ގަނެފަ އެވެ، އަދި މިބައިގައި އެމްއެމްއޭގެ ހިއްސާކުރަނީ 117.3 މިލިއަން ރުފިޔާ އެވެ.