ތިލަފުށީގައި ބިދޭސީ މިހާ މަރުވީ އެކްސްކެވޭޓަރުން ޖެހި، ދުއްވަން އިން މީހާ ހައްޔަރުކޮށްފި

ކ. ތިލަފުށީގައި މަސައްކަތް ކުރާ ބިދޭސީއަކު ގެއްލިގެން ހޯދަމުން ދަނިކޮށް މަރުވެފައި އޮއްވައި ފެނުނު މައްސަލައިގައި، އެ ހާދިސާ ހިނގަން މެދުވެރިގޮތް، ސީސީޓީވީ ފޫޓޭޖުތަކުގެ މައްޗަށް ބިނާކޮށް ފުލުހުން މިއަދު ހާމަކޮށްފި އެވެ.

މި ހާދިސާގައި މަރުވެފައިވަނީ، ތިލަފުށި ވެމްކޯ ސައިޓްގައި މަސައްކަތް ކުރަމުން ދިޔަ ބަންގްލަދޭޝްގެ އަމީން މިއާ އެވެ.

އެކަމާ ގުޅިގެން ފުލުހުން މިއަދު ބުނީ، 26 ޖެނުއަރީގެ މެންދުރުގެ ވަގުތެއްގައި ކުނި ޖަމާކޮށްފައިވާ ސައިޓްގެ ބައެއްގައި އެކްސްކެވޭޓަރަކުން ކުނި ނެގުމުގެ މަސައްކަތްކުރަނިކޮށް، މި ހާދިސާ ހިނގާފައިވަނީ، އަމީން މިއާ އޭގެ ދަތްގަނޑުން ޖެހި ވެއްޓުމަށްފަހު، އެކްސްކެވޭޓަރުން ކުނިތައް އެތަނުގެ ކައިރިން އެހެން ދިމާލަކަށް ބަދަލުކުރުމުގެ ތެރޭގައި އެ މީހާގެ ހަށިގަނޑާއެކު ކުނިތައް ބަދަލުކުރެވި މީހާގެ ގައިމައްޗަށް ކުނިތަކެއް އެޅިގެން ކަމަށެވެ. 

"ހާދިސާ ހިނގި ސަރަހައްދު ފެންނަ ސީސީޓީވީ ފުޓޭޖުން ފެންނަ ގޮތުގައި، އެކްސްކެވޭޓަރުގެ ދަތްގަނޑުން އަމީން މިއާ ގައިގައި ޖެހުނު ނަމަވެސް މެދުކެނޑުމެއް ނެތި، މަސައްކަތް ކުރިއަށް ގެންގޮސްފައިވެ އެވެ،" ފުލުހުން ބުންޏެވެ.

މި މައްސަލައާ ގުޅިގެން އެކްސްކެވޭޓަރު އޮޕަރޭޓްކުރި ފަރާތް ކޯޓު އަމުރެއްގެ ދަށުން 32 އަހަރުގެ ސްރީލަންކާގެ ރައްޔިތެއް ހައްޔަރުކޮށްފައިވާ ކަމަށް ފުލުހުން ބުންޏެވެ.

މި މައްސަލައިގެ ތަހުގީގަށް ކުރިއެރުން ލިބެމުންދާ މިންވަރަކުން، ހާމަކުރެވެން ހުރި މައުލޫމާތު ހާމަކުރަމުންދާނެ ކަމަށް ފުލުހުން ބުނެފައިވެ އެވެ.

އެހެންކަމުން، މައްސަލައާ ގުޅޭ ހަބަރުތައް ގެނެސްދޭއިރު، ރަސްމީ އިދާރާތަކުން ހާމަކުރާ ތަހުގީގީ ހޯދުންތަކަށް އިސްކަންދިނުމަށް ފުލުހުން ވަނީ އިލްތިމާސްކޮށްފަ އެވެ.