ގުދަނެއްގައި ރޯވުން: 21 މީހަކަށް ވަގުތީ ބޯހިޔާވަހިކަން ދީފި

ރޭ ދަންވަރު ހުޅުމާލޭގައި ހުރި ގުދަނެއްގައި ރޯވުމުގެ ސަބަބުން އެ އިމާރާތުން ކަރަންޓު ކެނޑި، ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން 21 މީހަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.

ރޭ ދަންވަރު 3:30 ހާއިރު އަލިފާން ރޯވެފައި ވަނީ ޗަނބޭލީ5 ގޯޅިތެރޭގައި ހުރި ލޮޓް ނަންބަރު 11154 ގޭ ގްރައުންޑް ފްލޯގައި ހުރި ގުދަން ކުރިމަތީގައި ހުރި ކުނިތަކެއްގަ އެވެ. އެ އަލިފާނުގެ ސަބަބުން ގުދަނުގެ ބިއްލޫރިގަނޑު ތަޅައިގެން ގޮސް، ގުދަނުގެ ތެރެއަށް ވަނީ އަލިފާންގަނޑު ފެތުރިފަ އެވެ.

މި އަލިފާނުގެ ސަބަބުން ގުދަނުގައި ހުރި މުދަލަށާއި އެ އިމާރާތުގެ ކަރަންޓު ވަޔަރިންއަށް ވަރަށް ބޮޑަށް ވަނީ ގެއްލުން ލިބިފަ އެވެ. ތިރީގައި ގުދަން ހަދާފައި ހުރި އެ ގެއަކީ ހަ ފަންގިފިލާއަށް ހަދާފައި ހުރި އިމާރާތެކެވެ.

އެންޑީއެމްއޭއިން ބުނީ އެ އިމާރާތުގެ ކަރަންޓު ޕެނަލް ހަލާކުވުމުގެ ސަބަބުން މުޅި އިމާރާތުން ކަރަންޓު ކެނޑިފައިވާ ކަމަށެވެ. އަދި އެ އިމާރާތުގެ ދެ އެޕާޓްމަންޓަކުން 21 މީހުންނަށް އެ އޮތޯރިޓީން ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމް ހަމަޖައްސައިދީފައިވާ ކަމަށްވެސް ބުންޏެވެ.

މި އަލިފާނުގެ ހާދިސާގައި އެއްވެސް މީހަކަށް އަނިޔާއެއް ނުލިވެ އެވެ.