ހުޅުމާލޭގައި ހުރި ގުދަނެއްގައި ރޯވެ، ބޮޑު ގެއްލުމެއް

ހުޅުމާލޭގައި ހުރި ގުދަނެއްގައި ރޯވެ، ތަކެއްޗަށާއި ތަނަށް ބޮޑެތި ގެއްލުންތަކެއް ލިބިއްޖެއެވެ.

އަލިފާން ރޯވެފައި ވަނީ ޗަނބޭލީ5 ގޯޅިތެރޭގައި ހުރި ލޮޓް ނަންބަރު 11154 ގޭ ގުދަން ކުރިމަތީގައި ހުރި ކުނިތަކެއްގަ އެވެ. އެ އަލިފާނުގެ ސަބަބުން ގުދަނުގެ ބިއްލޫރިގަނޑު ތަޅައިގެން ގޮސް، ގުދަނުގެ ތެރެއަށް ވަނީ އަލިފާންގަނޑު ފެތުރިފަ އެވެ. 

އެމްއެންޑީއެފްއިން ބުނީ އަލިފާން ރޯވި ކަމުގެ މައުލޫމާތު ލިބުނީ ރޭ ދަންވަރު 3:30 ހާއިރު ކަމަށެވެ. އަލިފާން ނިއްވާލެވުނީ 3:40 ހާއިރު ކަމަށެވެ.

ކުނިތަކުގައި އަލިފާން ރޯވުމުގަ ސަބަބުން ގުދަނުގައި ހުރި މުދަލަށާއި ކަރަންޓު ވަޔަރިންއަށް ވަރަށް ބޮޑަށް ގެއްލުން ލިބިފައިވާ ކަމަށް އެމްއެންޑީއެފްއިން ބުންޏެވެ. އަދި އިމާރާތުގައި ކަރަންޓު ނެތުމުގެ ސަބަބުން އެ އިމާރާތުގައި ދިރިއުޅޭ ފަރާތްތަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އެހީތެރިކަން ފޯރިކޮށްދެމުންދާ ކަމަށްވެސް ބުންޏެވެ.

މި ހާދިސާގައި އެއްވެސް މީހަކަށް އަނިޔާއެއްވިކަމުގެ މައުލޫމާތު ލިބިފައި ނުވާ ކަމަށްވެސް އެމްއެންޑީއެފްއިން ބުންޏެވެ.